Read Te Tusi Tapu I Te Gana Tuvalu Lomiga Lua LOMA 11 Bible Online

LOMA 11 - Te Tusi Tapu I Te Gana Tuvalu Lomiga Lua bible

LOMA 11

¹Tela la, ko fesili atu au: ne 'teke ne te Atua ona tino tonu? Ikai, e se pena! Au se tino Isalaelu, se mokopuna o Apelaamo, se tino foki o te matakaiga o Peniamina.

²E seki 'teke eiloa ne te Atua ona tino tonu kola ko leva ne ana iloagina. E se iloa ne koutou a muna a te Tusi e uiga ki te tala ki a Elia i tena 'moliga i a Isalaelu ki te Atua ke fakasala?

³“Te Aliki, ko oti ne tamate ne latou au pelofeta, kae ofa foki ne latou au fata-fai-taulaga; ka ko au eiloa e tokotasi tenei koi toega, ka ko taumafai foki latou o tamate au.”

⁴Kae se a te tali a te Atua ki a ia? “Ko oti ne faka'toe ne au a te fitu afe o tino kola e seki tapuaki ki te atua loi ko Paala.”

⁵Tela la, e isi ne mo tino ne toega ki aso nei, kola ne filifiligina i te alofa tauanoa.

⁶Kae kafai ne fai i luga i te alofa tauanoa, ko tona uiga ne seki fakavae i olotou galuega, me kafai ne fai i luga i fakavae o galuega, ko se taku ei te alofa tauanoa, se alofa tauanoa.

⁷Kae se a la? Ne se maua ne tino Isalaelu a te mea tela ne 'salagina. Ne maua fua ne tino filifilia, ka ko te tokoukega ne faka'tuli.

⁸E pela mo muna a te Tusi, “Ko tuku atu ne te Atua te agaga o te moe ki a latou, mo mata ke se matea ne latou, mo taliga foki ke se lagona ne latou, ke oko mai eiloa ki te aso tenei.”

⁹Muna a Tavita: “Ke fai olotou 'kaiga mo malei, Se lua e 'to ei latou ki lalo, kae se fakasalaga foki ki a latou!

¹⁰Ke pouli foki olotou mata, ko te mea ke se mafai ne latou o matea se mea; Ka ke fakamakau foki olotou tua, ke oko eiloa ki te se gata mai.”

¹¹Tenei la, au e fesili atu ki a koutou. Ne tapatu sala olotou vae, ko te mea ke pa'ku latou? Ikai, e se pena! Tela la, ona ko te lotou ofa tulafono, ko oko mai ei foki te fakaolataga ki fenua fakaatea, ko te mea ke kaisano Isalaelu.

¹²Kafai ne fai te agasala a tino Iutaia mo auala e manuia i ei te lalolagi, io me ko te lotou paku mo auala e manuia i ei a fenua fakaatea, kati la ko se atafai eiloa i te uke o fakamanuiaga manafai ne 'kau katoa ki ei tino Iutaia!

¹³Nei, au e faipati ki tino o fenua fakaatea! Au se apositolo mo tino o fenua fakaatea, kae fakamatamata faeloa au ki taku galuega,

¹⁴ke fakakaisano ei ne au oku tino Iutaia, ko te mea ke fakaola ne au ne mo tino mai i a latou.

¹⁵Ne 'teke ne te Atua a tino Iutaia, kae talia ne ia a fenua fakaatea. Kae kafai e oko mai a te taimi e talia ei ne te Atua a tino Iutaia, ka faka'tu ake latou mai te mate ki te ola se gata mai.

¹⁶Kafai ko te katiga falaoa ne ofogina atu ke fai mo taulaga o mea muamua katoa e tapu, e pena foki te falaoa katoa; kae kafai foki te aka e tapu, e pena foki kaula.

¹⁷A nisi kaula o te olive 'toki ko oti ne 'fati keatea mai te olive, kae faka'piki atu te kaula o te olive vao ki te olive 'toki, e sui ei a kaula ne 'fati keatea. Fenua fakaatea, a koutou e pau eiloa mo te kaula o te olive vao tela ne faka'piki ki te olive 'toki, i te mea ko kau fakatasi nei koutou i te malosi mo te olaga maumea o tino Iutaia.

¹⁸Sa fakamatamata ki kaula. Kafai e fakamatamata koe ki ei, ke masaua la ne koe, me se ko koe e taofi ne koe te aka, ka ko te aka e taofi ne ia koe.

¹⁹Kae ka muna mai koutou, “Ne 'fati keatea kaula ko te mea ke faka'piki au ki ei.”

²⁰E tonu tena. Ne 'fati keatea ona ko te lotou se fakatuanaki, kae ke tumau eiloa koutou i te fakatuanaki. Tela la, sa fakamata'mata ki ei, kae 'tau koutou o ma'taku.

²¹Me kafai ne seki fakaola ne te Atua a kaula tonu ne 'tupu mai i ei, e se fakaolagina foki koe.

²²Mafaufau faka'lei ake ki te alofa kaimalie mo te kaitaua o te Atua: ko te kaitaua ki a latou kola ne pa'ku, ka ko te alofa kaimalie o te Atua mō koe, manafai e mautakitaki faeloa koe i tona alofa kaimalie, i te mea mana 'kati ei koe ke to keatea.

²³Kae kafai ko nisi tino e se tumau i te lotou fakatuanaki, ka faka'piki ki ei, me i te Atua e isi sona mana o toe faka'piki latou.

²⁴I te mea kafai ne 'kati koe keatea mai te olive vao tela ne tupu mai ei koe, kae faka'piki ki te olive 'toki, tela e seki tupu mai ei koe, ka faigofie atu manafai ko toe faka'piki a maga kona ki olotou olive tonu, kola ne 'tupu mai ei.

²⁵Oku taina, e isi se mea tonu tenei e 'funa, tela e manako au ke iloa ne koutou; i te mea mana fia 'poto ei koutou: a te loto makeke o tino Isalaelu e se tumau, kae ka tumau eiloa ke oko ki te taimi ko ifo ei tino katoa o fenua fakaatea ki te Atua.

²⁶Tela la, ka fakaolagina Isalaelu katoa, e pela eiloa mo muna ne tusi: “E vau te Fakaola mai Siona, Ka ave foki ne ia keatea te amio masei mai i te fanauga a Iakopo.

²⁷Me e tenei eiloa taku feagaiga mo latou, Manafai ko ave ne au keatea olotou agasala.”

²⁸Ona ko te 'teke o tino Iutaia ki te Tala 'Lei, ko fai ne latou mo fili o te Atua ona ko koutou. Ona ko te lotou filifilia ne te Atua, ko fai nei latou mo ana fanau fagasele ona ko olotou tupuga.

²⁹Me i meaalofa a te Atua mo tena kalaga, e se mafai eiloa o 'fuli.

³⁰E pela eiloa mo koutou, ne se faka'logo ki te Atua; kae nei ko oti ne maua ne koutou a te alofa 'nau, ona ko te se faka'logo o tino Iutaia.

³¹Tela la, ko oti nei ne se faka'logo ki ei, ko te mea ke maua foki ne latou a te alofa 'nau tela ne fakaasi atu ki a koutou.

³²I te mea ne fai ne te Atua a tino katoa ke se faka'logo, ko te mea ke isi sona alofa 'nau ki luga i tino katoa.

³³Tapa! Ko oko eiloa i te 'poko o te maukoloa, mo te poto mo te malamalama o te Atua! E faigata o sukesukegina ana fakamasinoga, e faigata foki o iloa ona auala. E pela mo muna a te Tusi:

³⁴“Ko oi e iloa ne ia te mafaufau o te Aliki? Ko oi foki e pulepule fakatasi mo ia?

³⁵Ko oi foki se tino ne fai meaalofa ki a ia, Ko te mea ke toe taui mai?”

³⁶A mea katoa ne aumai i te Atua, ne ui mai foki i a ia, kae e a ia foki. Ke i a ia te vikiga ki te se gata mai. Amene.