Read Te Tusi Tapu I Te Gana Tuvalu Lomiga Lua LOMA 12 Bible Online

LOMA 12 - Te Tusi Tapu I Te Gana Tuvalu Lomiga Lua bible

LOMA 12

¹Taina, au e fakamolemole atu ki a koutou i te alofa 'nau o te Atua, ke tuku atu otou foitino ki te Atua ke fai mo taulaga ola, taulaga tapu kae logomalie ki a ia, ko te otou tapuakiga tonu eiloa tena.

²Ke se amio fakatasi koutou mo te lalolagi nei, ka ke 'fuli koutou i te fakafouga otou mafaufau, ko te mea ke fakatalitonu ne koutou me se a te loto o te Atua, te mea 'lei, te mea e logomalie mo te gali.

³Ona ko te alofa tauanoa ne tuku mai ki a au, au e fai atu ki a koutou katoa, ke se manatu fia maluga se tino ki a ia eiloa, ka ke mafaufau ifo kae fakamasino ifo a te tino ki a ia eiloa, e tusa mo te lasi o te fakatuanaki ne tuku atu ne te Atua ki a ia.

⁴E uke vaega kesekese o te foitino, ka ko vaega katoa konei, e tofu mo olotou galuega.

⁵Tela la, e tonu me e tokouke tatou, kae tasi eiloa tatou i a Keliso, kae ne vaega takitasi katoa o te foitino e tasi.

⁶Ke fakaaoga ne tatou meaalofa kesekese kola ne tuku mai, e tusa mo tona alofa tauanoa ne aumai ki a tatou: kafai ko te 'valo fakapelofeta, ke fetaui 'lei eiloa mo te tou fakatuanaki;

⁷kafai ko te tavini, ke tavini atu; kafai ko te faiakoga, ke akoako atu.

⁸Ko te tino tela e fakamalosi loto, ke fakamalosi atu; ko te tino tela e tufa atu ana mea, ke fai mo te loto alofa; ko te tino tela e fai a galuega fesoasoani, ke fai mo te toaga; ko te tino foki tela e fai ne ia galuega alofa, e 'tau o fai ne ia mo te loto fiafia.

⁹Ke tonu te alofa, kaitaua ki te masei, kae pukemau ki te mea 'lei;

¹⁰ke fakatau a'lofa koutou i te alofa fakataina; kae ke fakatau fia'fia foki koutou, i te āva o te sua tino ki te sua tino.

¹¹Ga'lue malosi, kae ke se paie koutou. Ke tavini atu koutou ki te Aliki mo te loto ko fonu i te fakamaoni.

¹²Ke fia'fia koutou i te otou fakamoemoega, ke kufaki koutou i otou puapuaga, kae 'talo i taimi katoa.

¹³Ke fesoasoani koutou ki Kelisiano, kae fai te alofa kaimalie.

¹⁴Fakamanuia atu ki a latou kola e fakasaua mai ki a koutou: fakamanuia atu kae sa fetugina latou.

¹⁵'Lifu fakatasi mo latou kola e 'lifu, 'tagi fakatasi foki mo latou kola e 'tagi.

¹⁶Ke ola koutou i te lototasi; sa fakamata'mata, kae fakatakaga ki tino se taulia,[14] kae sa fia'poto koutou.

¹⁷Sa taui atu te masei ki te masei, kae pukemau te mea 'lei i mata o tino katoa.

¹⁸Fai te mea e mafai ne koutou, ko te mea ke maua te olaga filemu i te va o koutou mo nisi tino.

¹⁹Aku fagasele, sa taui mo sui, kae tuku eiloa ki te taui mo sui a te Atua, me ne fai mai te Tusi, “Muna a te Aliki, e a aku te taui mo sui, kae e a aku foki e toe 'togi atu.”

²⁰Ikai, “Kafai e fia kai tou fili, fagaigina; kafai foki e fia inu, fainugina; i te mea kafai e fai ne koe pena, ko te mea eiloa ko taema a ia i ana mea masei ne fai ki a koe.”

²¹Ke se fakatakavale koe ne te masei; ka ke fakatakavale ne koe te masei ki te 'lei.