Read Te Tusi Tapu I Te Gana Tuvalu Lomiga Lua LOMA 14 Bible Online

LOMA 14 - Te Tusi Tapu I Te Gana Tuvalu Lomiga Lua bible

LOMA 14

¹Ke talia ne koutou a te tino tela e vaivai i te fakatuanaki, kae sa finau mo ia e uiga ki ona mafaufauga.

²A te tino fakatuanaki, e mafai o kai ki so se mea; ka ko te tino tela e vaivai i te fakatuanaki, e kai faeloa ki lakau 'tupu o te laukele.

³A te tino tela e kai ki so se mea, ke se fakatauemu ne ia a ia tela e se kai ki ei. A te tino foki tela e se kai ki ei, ke se fakamasino ne ia a te tino tela e kai ki ei. A te Atua e pau faeloa tona alofa ki so se tino o laua.

⁴Ko oi koe e fakamasino atu ei ne koe te tavini a te sua tino? Ko te Atua fua e fakamasino ne ia me ko ia e iloa ne ia me e 'lei me e masei. Kae ka pukemaugina a ia, i te mea e mafai eiloa ne te Aliki o fai a ia ke 'lei i aso katoa.

⁵Ko manatu ifo te tino me e sili atu te isi aso i lo te sua aso, ka ko te sua tino ko manatu ake me pau faeloa aso katoa. E 'tau eiloa i tino takitokotasi o iloa tonu ne ia tona manatu.

⁶Ko te tino tela e faka'malu ki se aso e tasi, e faka'malu ne ia mō te vikiga o te Aliki, ko te tino foki tela e kai, e kai mō te vikiga o te Aliki, me e fakafetai eiloa ki te Atua. Ka ko ia tela e se kai, e se kai mō te vikiga o te Aliki, kae fakafetai foki ki te Atua.

⁷E seai se tino i a tatou e ola mo ia eiloa, kae e seai foki se tino o tatou e mate mō ia eiloa.

⁸Kafai e ola tatou, e ola tatou mō te Aliki, kae kafai foki e 'mate tatou, e 'mate tatou mō te Aliki; tela la, me e ola tatou io me 'mate, ko tino o te Aliki tatou.

⁹Me i a Keliso ne mate kae ne toetu, ko te mea ke fai mo Aliki o tino ola, pela foki mo tino 'mate.

¹⁰Ai a e fakamasino ei ne koe tou taina? Ka ko koe foki, ai a e fakatauemu ei ne koe tou taina? I te mea ka 'tu katoa tatou i mua o te nofoga fakamasino o te Atua;

¹¹e pela mo muna a te Tusi, “Muna a te Aliki, au e ola kae ka to'tuli a tino katoa ki a au, Mo gutu katoa ka 'viki katoa ki a au.”

¹²Tela la, ko 'tau i a tatou takitokotasi o avatu se tala o ia ki te Atua.

¹³Tela la, ke se fakamasino atu a te sua tino ki te sua tino, kae ke se mafaufau koutou ki se mea ke fakapaku io me se mea e 'pono ei te ala o tou taina.

¹⁴E iloa ne au kae ne fakamalosia foki au i te Aliki ko Iesu, me e seai se mea e se 'ma i a ia eiloa; kae e lailai fua ki a ia tela e manatu ki ei me lailai.

¹⁵Kafai ne 'mae tou taina i au mea e kai; ko tena uiga e seki sasale koe i te alofa. Ke se fai tau mea e kai mo mea e fakamasei ei a ia tela ne mate ei a Keliso.

¹⁶Ke se fai ne koutou te mea tela e 'lei ki a koutou mo mea e faipatigina me se mea masei.

¹⁷Me i te malo o te Atua e se ko tona uiga ko meakai mo mea inu, ka ko te amiotonu, te filemu mo te fiafia i te Agaga Tapu.

¹⁸Ko te tino tela e tavini ki a Keliso i mea kona, e talia ne te Atua kae fakamaoni ne tagata.

¹⁹Ke salasala ne tatou a mea e tupu ei te filemu, mo mea e fakatau putiputi ake ei tatou.

²⁰Sa fakamaseigina a te galuega a te Atua ona ko meakai. Me 'ma a mea katoa, kae se mea 'se ki so se tino ke fakapakū ne ia a nisi tino i ana mea e kai.

²¹E se se mea 'lei te kai ki 'kano o manu, io me inu ki uaina io me e fai a so se mea e paku ei tou taina.

²²A tou fakatuanaki tela e nofo mo koe, tausi eiloa i tou va mo te Atua; amutia la a ia tela e seai sena sala e fakamasino ei a ia, ki te mea tela ko tonu ki tona loto.

²³Ko te tino tela e isi ona manatu fakalotoloto lua, e fakasala manafai e kai eiloa a ia ki ei, i te mea e seki fai ne ia mai te fakatuanaki; me ko te mea tela e se vau i te fakatuanaki, se agasala.