Read Te Tusi Tapu I Te Gana Tuvalu Lomiga Lua LOMA 15 Bible Online

LOMA 15 - Te Tusi Tapu I Te Gana Tuvalu Lomiga Lua bible

LOMA 15

¹Ko tatou kola e malosi i te fakatuanaki, e 'tau mo tatou o fesoasoani ki mea e se mafai ne tino vaivai, kae ke se fakafiafia ifo tatou ki a tatou eiloa.

²E 'tau mo tatou takitokotasi o fakafiafia otou tuakoi mo te olotou 'lei, ko te mea ke fakatupu ake ei a ia i te fakatuanaki.

³Me i a Keliso e seki fakafiafia ki a ia eiloa, kae muna mai a te Tusi, “Ko muna ma'sei katoa kola ne faipatigina ne latou kola ne muna masei atu ki a koe, ne pa'ku katoa ki luga i a au.”

⁴Me i mea katoa kola ne tusi i te Tusi, ne tusi ke akoako ei tatou, ko te mea ke maua ne tatou a te fakamoemoega e alatu i te kufaki, mo te fakamalosiga e alatu i te Tusi.

⁵Ke tuku atu ki a koutou ne te Atua o te kufaki mo te fakamalosiga, a te olaga lototasi, e pela eiloa mo te loto o Keliso Iesu,

⁶ko te mea ke mafai ne koutou katoa i te leo e tasi, o 'viki ki te Atua tela ko te Tamana o te tou Aliki ko Iesu Keliso.

⁷Ke talia ne koutou te sua tino mo te sua tino, e pela eiloa mo Keliso ne talia ne ia koutou mō te vikiga o te Atua.

⁸Me i a au e fai atu ki a koutou; a Keliso ne fai mo tavini a tino Iutaia, e fakaasi atu ei te tonu katoatoa o te Atua, ko te mea ke fakamautu ei a feagaiga kola ne tuku mai ki tupuga o tatou,

⁹kae ke mafai foki ne fenua fakaatea o 'viki ki te Atua mo tena alofa 'nau. E pela mo muna a te Tusi, “Tela la, ka 'viki atu au ki a koe i fenua fakaatea; Kae pese atu foki au ki tou igoa.”

¹⁰Kae toe muna mai foki a te Tusi, “Fiafia, koutou tino o fenua fakaatea, ke fiafia fakatasi koutou mo ona tino!”

¹¹Ko toe muna mai foki a te Tusi, “Ke 'viki atu koutou ki te Aliki, tino katoa o fenua fakaatea, Ke 'viki a tino katoa ki a ia!”

¹²Toe muna mai foki a Isaia, “Ka tupu mai se aka o Iese; Se tino e tupu ake o pule a fenua fakaatea, Tela ka fakamoemoe ki ei a tino o fenua fakaatea.”

¹³A te Atua tela ko te pogai o fakamoemoega, ke fakafonu ne ia koutou ki fiafiaga mo filemu katoa, i te talitonu ki a ia, ko te mea ke ola koutou i te fakamoemoega i te mana o te Agaga Tapu.

¹⁴Oku taina, au nei ko loto malie eiloa ki a koutou, i te mea i a koutou ko 'fonu i te 'lei, ko 'fonu i poto valevale, ka ko mafai foki ne koutou o fakatonu atu te sua tino ki te sua tino.

¹⁵Kae i nisi manatu, ne tusi atu au mo te loto toa e fakamasaua atu ki a koutou, ona ko te alofa tauanoa ne aumai ne te Atua ki a au;

¹⁶ke fai au mo faifeau a Iesu Keliso ki fenua fakaatea, i te galuega faka faifeau i te Tala 'Lei a te Atua, ko te mea ke fai a fenua fakaatea mo taulaga e talia ne te Atua, kae fakatapu ne te Agaga Tapu.

¹⁷Tela la, e isi se pogai e fakamatamata ei au i a Keliso Iesu i taku galuega mo te Atua.

¹⁸E se fia saga au o faipati ki so se mea, vagana eiloa a te mea tela ne galue ne Keliso i loto i a au, ke faka'logo a tino o fenua fakaatea; i pati mo faiga,

¹⁹i te mana o fakailoga mo fakaasiga fakaofoofogina, pela foki mo te mana o te Agaga Tapu, ne folafola katoatoa ei ne au a te Tala 'Lei a Keliso mai Ielusalema o fakatamilo ake ki Iluliko.

²⁰A toku fakamoemoega, ko te fia folafola atu faeloa a te Tala 'Lei i koga kola e seki lagona eiloa ne latou a te Keliso, ko te mea ke se ati ake au i luga o te fakavae ne fai ne te sua tino.

²¹Muna a te Tusi, “Ko latou kola e seki taku atu ki a latou a ia, ka matea ne latou, Pela foki latou kola e seki lagona eiloa ne latou a ia, ka iloa ne latou.”

²²Tenei eiloa te feitu ko ala ei au o taofia faeloa i toku fanatu ki a koutou.

²³Kae nei la, ko palele taku galuega i koga katoa konei, ka ko leva ne manako au i tausaga e uke, ke fanatu au o asiasi atu ki a koutou,

²⁴kae fakamoemoe nei au ke na fakataunu. Au e manako ke fetaui tatou i toku auala ki Sepania, kae ke fesoasoani mai foki koutou ki a au i toku fano ki kona, manafai ko malie toku loto i te tou 'nofo fakatasi i se taimi toetoe.

²⁵I te taimi nei, au e fano ki Ielusalema o ave a te meaalofa mō Kelisiano.

²⁶Me ko fia'fia tino Maketonia mo tino Eleni o fai meaalofa ki tino ma'tiva o te kau Kelisiano i Ielusalema.

²⁷Ne fia'fia o fai a meaalofa, kae tonu me kaitalafu latou ki a latou, i te mea kafai ne o'mai a tino o fenua fakaatea o kau fakatasi mo tino Iutaia i olotou manuia faka te Agaga, e 'tau foki mo tino o fenua fakaatea o ga'lue mo tino Iutaia i olotou manuia faka te lalolagi.

²⁸Tela la, kafai ko oti a te mea nei, ko palele foki ne tuku atu ki a latou a te meaalofa, ko te mea eiloa ko fanatu au i toku auala ki Sepania, e ui atu i a koutou.

²⁹Kafai e oko atu au ki a koutou, e iloa ne au me ka fanatu au mo te katoatoaga o te manuia o Keliso.

³⁰Taina, au e fakamolemole atu ki a koutou i te tou Aliki ko Iesu Keliso, mo te alofa o te Agaga; ke kau fakatasi tatou i te 'talo fakatauanau ki te Atua mō au;

³¹ko te mea ke mafai au o sao mai lima o tino se talitonu o Iutaia, kae ke talia foki ne Kelisiano i Ielusalema taku galuega mō latou.

³²Kae ke fanatu au ki a koutou i te fiafia, manafai ko te loto eiloa o te Atua, ke fakatau fia'fia fakatasi ei tatou i toku oko atu.

³³Ke i a koutou katoa te Atua o te filemu; Amene.