Read Te Tusi Tapu I Te Gana Tuvalu Lomiga Lua LOMA 16 Bible Online

LOMA 16 - Te Tusi Tapu I Te Gana Tuvalu Lomiga Lua bible

LOMA 16

¹E fakailoa atu ne au ki a koutou a te tuagane o tatou ko Fipe, tela se tiakono o te Ekalesia i Kenikelea.

²Ke talia ne koutou a ia i te igoa o te Aliki, me se mea 'tau eiloa o fai ne Kelisiano, kae fesoasoani foki ki a ia i so se mea e manako a ia ki ei mai i a koutou; i te mea i a ia se fafine ne fesoasoani ki te tokoukega o tino e pela foki mo au.

³Ko alofa atu au ki a Pisila mo Akuila, ne tino ne galue fakatasi matou i te galuega a Keliso Iesu,

⁴kola ne tuku atu o la ola mo oku. Au e fakafetai ki a laua, e se ko au fua, kae pela katoa Ekalesia o fenua fakaatea.

⁵Ko alofa atu foki au ki te Ekalesia tela e potopoto sale i te la fale. Oku alofaaga foki mō toku taugasoa pele ko Epaineto, tela ko te tino muamua eiloa ne talitonu ki a Keliso i Asia.

⁶Oku alofaaga foki ki a Malia, tela ne galue malosi mō koutou.

⁷Oku alofaaga foki ki a Aneloniko mo Iunia, ne tino o toku fenua kola ne fale puipui fakatasi matou, kae e iloa 'lei eiloa ne apositolo, kae ne mua foki laua i a au o fai mo Kelisiano.

⁸Oku alofaaga foki ki a Amepelia, ko toku taugasoa pele i te mafutaga a te Aliki.

⁹Oku alofaaga foki ki a Upano, se tino ne galue fakatasi mo matou i te galuega a Keliso, pela foki ki a Sataku, ko toku taugasoa pele.

¹⁰Oku alofaaga foki ki a Apele, tela ko iloa tonu tena fakamaoni ki a Keliso. Alofa atu foki mo latou kola e aofia i loto i te kaiga o Alisopulo.

¹¹Alofaaga foki ki a Helotiona, se tino o toku fenua, pela foki ki taina Kelisiano i te kaiga o Nakiso.

¹²Oku alofaaga foki ki a Tufaina mo Tufosa, kola e ga'lue foki i te galuega a te Aliki, pela foki ki toku taugasoa pele ko Peseti, tela ko uke ana galuega ne fai mo te Aliki.

¹³E 'moli atu foki oku alofaaga ki a Lufo, se tino galue 'lei i te galuega a te Aliki, pela foki ki tona matua, tela ne atafai mai ki a au e pela eiloa au mo sena tama.

¹⁴Oku alofaaga foki ki a Asugelito, Fegona, Helama, Patelopa, mo Helemea ei, mo nisi taina ake Kelisiano e 'nofo mo latou.

¹⁵Alofaaga foki ki a Filoloko mo Iulia, pela foki ki a Neleu mo tona tuagane, pela foki ki a Olumepa mo Kelisiano katoa kola e 'nofo fakatasi mo latou.

¹⁶Ke fakatalofa atu koutou ki so se tino i te sogi tapu. Ko a'lofa atu katoa a Ekalesia a Keliso ki a koutou.

¹⁷Oku taina, au e fakamolemole atu ki a koutou, ke fakaeteete koutou mai tino kola e fakatupu ne latou te finauga mo te faigata, me e 'teke ki akoakoga kola ne akoakogina ei koutou; ke faka'mao koutou mai i a latou.

¹⁸Me ko latou kola e amioga pena, e se tavini latou ki a Keliso te tou Aliki, kae tavini eiloa ki olotou manako ma'sei, i te gali olotou pati mo lauga fakakolekole, e fakaloiloi ei ne latou mafaufauga o tino va'lea.

¹⁹A tino katoa, ko oti ne 'logo i te otou fakamaoni ki te tala 'lei, kae lifu faeloa au ki a koutou mō te feitu tenei. Au e manako ke 'poto koutou ki mea 'lei, kae ke valea ki mea masei.

²⁰Ka ko te Atua tela ko te pogai o te filemu, ke lakalaka ne ia Satani i lalo otou vae. Ke i a koutou katoa te alofa tauanoa o te tou Aliki ko Iesu Keliso.[15]

²¹Ko alofa atu foki Timoteo, se tino ne galue maua; pela foki mo Lukio, Iasona mo Sosepatelo, ne tino o toku fenua.

²²Ko au ko Tesio, ko te failautusi o te tusi tenei, ko alofa atu foki au ki a koutou i te Aliki.

²³ Ko alofa atu a toku tausi ko Kaio, pela foki te Ekalesia katoa ki a koutou. Ko alofa atu foki ki a koutou Elata te teu tupe o te fa'kai, pela foki te tou taina ko Kuata.[16]

²⁴(Ke i a koutou katoa te alofa tauanoa o te tou Aliki ko Iesu Keliso. Amene.)

²⁵Ki a ia tela e mafai ne ia o fakamalosi koutou ki taku Tala 'Lei mo taku folafolaga i a Iesu Keliso, e tusa eiloa mo te fakaasiga o mea 'funa kola ne 'funa faka'galo i tausaga e uke.

²⁶Tenei ko fakaasi mai i tusitusiga fakapelofeta, ka ko fakailoa atu foki ki te lalolagi katoa e alatu i fakatonuga a te Atua, ko te mea ko tino ke talitonu kae faka'logo.

²⁷Ke i te Atua poto e tokotasi te vikiga e se gata mai, e alatu i a Iesu Keliso! Amene.[17]