Read Te Tusi Tapu I Te Gana Tuvalu Lomiga Lua LOMA 3 Bible Online

LOMA 3 - Te Tusi Tapu I Te Gana Tuvalu Lomiga Lua bible

LOMA 3

¹Se a te mea e sili ei te Iutaia i tino o fenua fakaatea? Io me isi foki te aoga o te pilitome?

²E maumea i mea katoa! Ne mua o tuku atu ki a latou te muna a te Atua.

³Kae kafai la e isi ne tino o latou ko se fakamaoni; e a, e mafai ne te lotou se fakamaoni o fakaseaoga te fakamaoni o te Atua?

⁴Ikai, e se pena! A te Atua e tonu faeloa, ka ko tino katoa e pati 'loi. E penei muna a te Tusi e uiga ki te tonu o te Atua: “E 'tau o fakaasi ne koe te mea tonu, Ko manumalo ei koe i te fakamasinogina.”

⁵Kae kafai la ko fai te tou amio masei e fai mo ala e fakaasi 'lei ei te fai mea tonu o te Atua, se a te muna a tatou e mafai o fai atu? I te Atua e se fai mea tonu i tona fakasala mai ki a tatou? Au e faipati penei, e pela eiloa mo pati a tino.

⁶Ikai, e se pena! Kafai te Atua e se amiotonu, e a, e mafai la pefea o fakamasino ne ia te lalolagi?

⁷Kae kafai ko toku fai mea se tonu e fai mo auala o vikiga o te Atua i te fakaasi atu ke iloa 'lei tona tonu katoatoa; kae ai a la ka fakasala faeloa au e pela mo se tino agasala?

⁸Kai a e se fai ei ne tatou te masei ke maua mai ei te 'lei? Ne isi ne tino ne muna masei mai ki a au, i te 'ti mai ne latou me e a aku a muna konei ne fai, e fakasalagina eiloa latou.

⁹Ko 'lei, e isi se mea e sili atu ei tatou tino Iutaia i tino o fenua fakaatea? E seai lele eiloa![3] Ko leva ne fakailoa atu ne au ki a koutou i a Iutaia mo fenua fakaatea e pau, kae 'nofo katoa mai lalo i te pule a te agasala.

¹⁰Pela mo muna a te Tusi: “E seai eiloa se tino e tokotasi e amiotonu;

¹¹E seai foki se tino e maina, io me salasala ki te Atua.

¹²Ne 'fuli keatea katoa tino mai i te Atua, ne 'se katoa latou. E seai foki se tino e 'lei, e seai lele eiloa.

¹³Ka ko olotou kato e pela mo se tanuga fakamaga. Ko fakaaoga foki olotou alelo o takolekole, Ko iai foki i olotou laugatu te poisini o te gata.

¹⁴Ko 'fonu olotou gutu i muna fetu mo muna 'kona.

¹⁵E toka faeloa latou o tatino;

¹⁶So se koga e olo latou ki ei, e fakamasei ne latou mea kae fakafi'ta ki tino.

¹⁷Kae e se iloa foki ne latou te auala o te filemu,

¹⁸E seai foki se mataku ki te Atua i olotou mata.”

¹⁹Kae nei, ko iloa ne tatou i mea katoa i te Tulafono, e faka'tau katoa mō tino kola e ola i lalo o te Tulafono, ko te mea ke fakagata fakamasakoga faka te foitino, kae ke aumai ei te lalolagi katoa ki te fakamasinoga a te Atua.

²⁰Me e seai se tino e mafai o takuamiotonugina i mua o te Atua, manafai e fai ne ia fakatonuga o te Tulafono; me i te galuega a te Tulafono, ko te fakaasi atu ne ia ki te tino te agasala.

²¹Kae nei, ne fakaasi mai te amiotonu a te Atua kae seki iai te tulafono, kae ne molimau foki te Tulafono mo pelofeta ki ei,

²²ko te amiotonu tena a te Atua e alatu i te fakatuanaki ki a Iesu Keliso, mo tino katoa kola e talitonu, me e seai eiloa se kesekesega:

²³ko 'mao tatou mai te 'malu o te Atua, me ko agasala a tino katoa.

²⁴Kae ne takuamiotonugina latou i tena meaalofa tela ko te alofa tauanoa, ko te fakaolataga i a Keliso Iesu.

²⁵Ne ofogina atu a ia ne te Atua, kae mai i tena toto,[4]ne mafai ei a ia o fai mo pogai e fakamagalo ei agasala a tino mai te olotou fakatuanaki ki a ia. Ne fai ne te Atua te mea tenei e fakaasi ei tena amiotonu. I taimi ko teka a ia ne kufaki kae seki fia saga ki agasala a tino, kae i te taimi nei a ia ko saga tonu ki olotou agasala, ko te mea ke fakaasi ei tena amiotonu. I te auala tenei ne fakaasi i ei ne te Atua me i a ia e amiotonu, kae ne tuku atu ne ia a te amiotonu ki a latou kola e talitonu ki a Iesu.

²⁷Kae se a la, e isi se mea e 'tau o fakamata'mata ki ei tatou? E seai! I te feitu fea? Ki te feitu ki galuega? Ikai, ko te feitu ki te fakatuanaki.

²⁸E talitonu matou, me e takuamiotonugina te tino i te fakatuanaki, kae se ko galuega a te Tulafono.

²⁹A te Atua, se Atua fua mō Iutaia? E se se Atua foki mō tino o fenua fakaatea? Ao, mō tino foki o fenua fakaatea.

³⁰Ona ko te Atua e tokotasi, ka takuamiotonugina ne ia latou kola ne pilitome i te fakavae o te lotou fakatuanaki, pela foki mo latou kola e seki pilitome e alatu i te lotou fakatuanaki.

³¹E a, ko te uiga o te mea nei, ke tiaki ne tatou te Tulafono ona ko te fakatuanaki tenei? Ikai, e se pena! Me i te sua feitu, e fakamautu ne ia te Tulafono.