Read Te Tusi Tapu I Te Gana Tuvalu Lomiga Lua LOMA 4 Bible Online

LOMA 4 - Te Tusi Tapu I Te Gana Tuvalu Lomiga Lua bible

LOMA 4

¹Se a la te pati a tatou e uiga ki a Apelaamo te tou tupuga i te foitino?

²I te mea kafai ne takuamiotonugina Apelaamo i ana galuega ne fai, e isi se mea e 'tau o fakamatamata ki ei a ia, kae se i mua o te Atua.

³Kae ne a muna a te Tusi? “Ne fakatuanaki a Apelaamo ki te Atua, tena te pogai ne takua ei a ia ko te tino amiotonu.”

⁴A te tino galue e 'togi, ka ko tona 'togi e se taku se meaalofa, kae se taui o tena galuega.

⁵Ka ko te tino tela e se galue, kae fakatuanaki ki te Atua tela e takuamiotonugina ne ia latou kola e se amio atua, a tona fakatuanaki ko takua e pela mo se amiotonu.

⁶E pela foki eiloa mo Tavita, ne folafola atu ne ia a te fakamanuiaga ki te tino tela ko takua ne te Atua me e amiotonu, e atea mai i ana galuega:

⁷“Amutia a latou kola ko fakamagalogina olotou amio masei, Mo olotou agasala foki ko fakapulougina;

⁸Ke amutia foki a te tino tela ko se saga atu te Aliki ki ana agasala!”

⁹A te fakamanuiaga tenei, ne folafola atu fua mō tino ne pilitome, io me mō latou foki kola e seki pilitome? Ne muna atu matou me i te fakatuanaki tela ne takua ei a Apelaamo, ko te amiotonu.

¹⁰Kae ne fakailoa atu pefea ki a ia? Mai mua io me mai tua ifo o tena pilitomega? E se mai tua ifo o tena pilitomega, kae mai mua atu.

¹¹Ne pilitome fakamuli ifo, ka ko tona pilitome; se fakailoga e fakamaoni ei tena amiotonu ne maua i tona fakatuanaki mai mua o tena pilitomega. Ko te pogai, ke fai a Apelaamo mo tamana o tino fakatuanaki kola e seki pilitome, me ne takua foki me e a latou te amiotonu,

¹²kae ne fai foki a ia mo tamana o tino ne pilitome, fakatasi foki mo latou kola e sasale i kalafaga o te fakatuanaki, tela ne maua ne te tou tamana ko Apelaamo, ka koi tuai o pilitome a ia.

¹³Ne fai feagaiga te Atua ki a Apelaamo mo ana fanau, me ka fai te lalolagi mo olotou tofi, e se i te Tulafono kae i te amiotonu i te fakatuanaki.

¹⁴Kae kafai la ko latou kola e tausi ki te Tulafono e fai mo suitonu, ko se aoga te fakatuanaki mo te feagaiga.

¹⁵I te mea e aumai ne te Tulafono ki te tino a te fakasalaga, kae kafai e seai se tulafono, e seai foki mo se ofa tulafono.

¹⁶A te feagaiga e fakavae i luga o te fakatuanaki, ko te mea ke moe tonu i luga i te alofa tauanoa, kae ke tumau foki ki ana fanau katoa; e se ki a latou fua kola e tausi ki te Tulafono, kae aofia ei foki a latou kola e kau fakatasi i te fakatuanaki o Apelaamo; me ko ia ko te tamana o tatou katoa.

¹⁷E pela eiloa mo muna a te Tusi, “Ne fai ne au koe mo fai te tamana o fenua e uke,” i mua o te Atua tela e talitonu ki ei a ia, tela ne avatu ne ia te ola ki tino 'mate, kae ne fakatonu foki ne ia a mea kola e seai, ke iai.

¹⁸I te fakamoemoe ne se talitonu a ia ki te fakamoemoe, me ka fai a ia mo tamana o fenua e uke, e pela eiloa mo te poloakiatuga ki a ia: “Ka pena eiloa te tokouke o tau fanau.”

¹⁹Ne seki vaivai tona fakatuanaki, manafai ne mafaufau ifo ki tona foitino, me ko pela mo se tino mate, i te mea ko tai katoa te selau ona tausaga, io me ko tena mafaufau ifo foki ki te se fanau o Sala.

²⁰Ne seki teka eiloa keatea mo ia tona fakatuanaki, kae se fakalotoloto lua foki ki te feagaiga a te Atua; i te mea ko fakafonu a ia ne tona fakatuanaki ki te mana, kae ne 'viki ki te Atua,

²¹kae ne talitonu mo tona loto katoa, me i te Atua e mafai ne ia o fai a mea katoa kola ne fai feagaiga ki ei.

²²Tena te pogai, “Ne takua ei tona fakatuanaki ko te amiotonu.”

²³Ka ko muna konei, “ne takua a ia,” ne seki tusi fua mo ia tokotasi,

²⁴kae mo tatou foki. Ne tusigina foki ki a tatou kola e talitonu ki a ia tela ne ana fakatugina a Iesu te tou Aliki mai tino 'mate,

²⁵tela ne tuku atu ke mate ona ko te ofa tulafono a tatou, kae toe fakatu ake foki mō te tou takuamiotonugina.