Read Te Tusi Tapu I Te Gana Tuvalu Lomiga Lua LOMA 7 Bible Online

LOMA 7 - Te Tusi Tapu I Te Gana Tuvalu Lomiga Lua bible

LOMA 7

¹Taina, e se iloa ne koutou i a au e faipati ki a latou kola e iloa ne latou te tulafono; i te tulafono e pule fua i te tino i te taimi e ola ei a ia?

²A te fafine avaga, e ligina ne te tulafono ki tena avaga ka koi ola a ia; kae kafai ko mate tena avaga, ko saoloto ei a ia mai i te tulafono tela ne ligina ei a ia.

³Kae ka fakaigoa a ia ki se fafine mulilua, manafai ko avaga mo se isi tagata ka koi ola tena avaga. Kae kafai ko mate tena avaga, ko saoloto ei a ia mai i te tulafono; kae kafai foki e avaga mo se isi tagata, ko se taku ei a ia se fafine mulilua.

⁴E pena foki koutou e taina, ko oti ne 'mate koutou ki te Tulafono i te foitino o Keliso, kae nei ko fai koutou mo ia tela ne toetu mai tino 'mate, ko te mea ke aoga otou ola mō te Atua.

⁵I te taimi ne ola ei tatou i feitu faka te foitino, ne fakagasue otou manakoga agasala ne te Tulafono, kae nei ko galue i otou foitino o fakatupu te mate.

⁶Kae nei la, ko saoloto tatou mai i te Tulafono, i te mea i a tatou ne 'mate muamua ki te mea tela ne pologa tatou ki ei. Ko se toe tau'tali tatou ki te ala mua o te tulafono tusia, ka ko te ala fou i te Agaga.

⁷Ne a la pati a tatou ka fai? I te Tulafono se agasala? Ikai, e se pena! A te Tulafono, ne fai ne ia au ke iloa ne au te agasala. E se iloa lele eiloa ne au te kaimanako, manafai e seki taku mai ne te Tulafono, “Sa kaimanako.”

⁸Ko maua te ala o te agasala o fakagasue a vaega o manakoga valevale i loto i a au, e alatu mai i fakatonuga. I te agasala se mea mate fua manafai e seai se tulafono.

⁹I a au se tino ne ola foki mai mua, kae seki oko mai te tulafono; kae i te okomaiga o fakatonuga, ne ola ake te agasala, kae mate ei au.

¹⁰Ka ko fakatonuga kola ne folafola mai ei te ola, ne aumai fua ne latou te mate.

¹¹I te mea ko maua te auala o te agasala o galue i te fakatonuga, o fakaloiloi mai au, kae ne tamate foki ne ia au.

¹²A te Tulafono e 'malu, e tonu kae 'lei.

¹³Kafai la se mea 'lei, e a, e mafai ne ia o aumai te mate ki a au? Ikai, e se pena! Ko te agasala ne aumai ne ia te mate ki a au, kae i te auala tenei, e fakaasi tonu mai ei i te agasala se agasala eiloa. Tela la, e alatu i fakatonuga ko na gasolo atu ei o masei te agasala.

¹⁴E iloa ne tatou i te Tulafono se mea faka te Agaga; ka ko au se tagata faka te lalolagi, ne 'togi atu e pela mo se pologa ki te agasala.

¹⁵E se iloa ne au aku mea ne fai, me se fai ne au a mea kola e manako au o fai, kae ne fai ne au a mea kola e se loto au ki ei.

¹⁶Kafai la ne fai ne au a mea kola ne seki loto au o fai, e fakaasi mai ei i a au e taofi pela i te Tulafono se mea tonu.

¹⁷Tela la, e se ko au eiloa tela ne fai ne ia a te mea nei; ka ko te agasala tela e nofo i loto i a au.

¹⁸E iloa ne au i toku feitu faka te foitino, e seai eiloa se 'lei e nofo i ei. E tiga eiloa te nofo mo au te manako o fai te 'lei, e se mafai eiloa ne au o fai.

¹⁹Me e se fai ne au te 'lei e manako au ki ei o fai, kae fai eiloa ne au te masei tela e se manako au ki ei o fai.

²⁰Kafai la e fai ne au a te mea tela e se fiafia au o fai, ko tena uiga e se ko au tela ne fai ne ia; ka ko te agasala tela e nofo i loto i a au.

²¹Tela la, ko maua ne au i te tulafono tenei e galue nei, e leake eiloa au me ko te mea 'lei tela e fai ne au ke tu ei te tulafono, kae tagaila se mea masei fua.

²²Ka ko toku tina kanoloto tonu eiloa: e fiafia ki te tulafono a te Atua.

²³Kae e matea foki ne au te sua tulafono e galue i toku foitino, ko te tulafono tela e taua mo te tulafono e tonu ki toku mafaufau. Ko fai ne ia au e pela mo se pagota ki te tulafono o te agasala, tela e galue i toku foitino.

²⁴Ko seai la se tino malaia penei mo au! Ko oi la ka fakaola ne ia a au mai i te foitino mate tenei?

²⁵Fakafetai ki te Atua, e alatu i te tou Aliki ko Iesu Keliso! Tela la, a te mea tenei ko te mea e masani ei a kita nei: i a au eiloa; e mafai ne au o tavini ki te tulafono a te Atua i toku mafaufau, ka ko toku feitu faka te foitino, e tavini ki te tulafono a te agasala.