Read Te Tusi Tapu I Te Gana Tuvalu Lomiga Lua 1 KOLINITO 14 Bible Online

1 KOLINITO 14 - Te Tusi Tapu I Te Gana Tuvalu Lomiga Lua bible

1 KOLINITO 14

¹Ke fai te alofa mo otou fakavae, kae kinau mo te loto malosi ke maua ne koutou a meaalofa faka te Agaga, ko te mea ke mafai ne koutou o folafola atu te muna a te Atua.

²Me ko te tino tela ko mafai ne ia o faipati ki 'gana kesekese kola e se iloa ne ia e alatu i te mana o te Agaga Tapu, e se faipati ki tino kae ki te Atua; i te mea e seai se tino e malamalama ki ana pati, kae faipati fua ne ia a mea 'funa i te mana o te Agaga.

³Kae i te sua feitu, a ia tela e folafola atu te muna a te Atua, e faipati ki tino mō te lotou ati ake, te lotou fakamalosiga mo te fakamafanafanaga.

⁴A ia tela e faipati ki 'gana kesekese kola e se iloa ne ia e alatu i te mana o te Agaga Tapu, e aoga eiloa ki a ia mō te fakatupuakega o tena fakatuanaki, ka ko ia tela e folafola atu te muna a te Atua, e fakatupuake ne ia te Ekalesia.

⁵Nei, au e manako ki a koutou katoa ke faipati ki 'gana kesekese kola e se iloa ne koutou e alatu i te mana o te Agaga Tapu, kae sili atu i mea konei, ko te folafola atu o te Muna a te Atua. E sili atu a ia tela e folafola atu te Muna a te Atua, i lo i a ia tela e maua te meaalofa mai te Agaga, ko te faipati ki 'gana kesekese kola e se iloa ne ia, seiloga la ke isi se tino e fakamatala ne ia, ko te mea ke fakatupu ake ei te Ekalesia.

⁶Kae nei e oku taina, kafai e fanatu au ki a koutou mo te meaalofa mai te Agaga ko te faipati ki 'gana kesekese kola e se iloa ne au, ka pefea la o aoga ki a koutou? E aoga fua manafai e fakamatala 'lei ne au ki a koutou i fakaasiga ne maua ne au, mo te poto i folafolaga o te muna a te Atua pela foki mo ana akoakoga.

⁷Kafai foki ko lakau fakatagitagi kola e seai ne ola i ei, e pela mo te pu fakatagitagi io me ko te kitala, kae 'pau a nota e 'tagi i ei i te tiuni eiloa e tasi, e faigata o iloa ne koe me tefea te lakau e ta seiloga ko ta mai takitatasi.

⁸Kae kafai se tino e ili ne ia te piukila, ko se ili tonu ne ia te tāga tonu mō te taua, ko oi la ka fakatokatoka ki te taua?

⁹E pena foki koutou; kafai ne fai'pati koutou ki 'gana kesekese kola e se iloa ne koutou, kae se maina 'lei, ka malamalama la pefea se tino ki muna ne faipatigina? Ko otou muna ne fai, e seai eiloa ne olotou uiga.

¹⁰E uke a 'gana kesekese i te lalolagi, kae seai eiloa se 'gana e seai sena uiga;

¹¹kae kafai e se iloa ne au a te uiga o te 'gana, ka fai au mo se tino fakaatea ki te tino tela e faipati mai, e pena foki a te tino e faipati mai ki a au.

¹²E pena foki koutou; ona ko te otou kinau ki ne fakaasiga o te Agaga, taumafai la malosi o putiputi ake ke 'lei te Ekalesia.

¹³Tela la, a ia tela e faipati ki se 'gana kese tela e se iloa ne ia e alatu i te mana o te Agaga Tapu, e 'tau mo ia o 'talo mo te mana ke mafai ne ia o fakamatala.

¹⁴I te mea kafai au e 'talo ki se 'gana kese tela e se iloa ne au, e 'talo fua a toku agaga, ka ko toku mafaufau e se maua mai i ei ne fua aoga.

¹⁵Se a taku mea ka fai? Ka 'talo au mo toku agaga, ka 'talo foki eiloa au mo toku mafaufau ke malamalama au i ei, ka pese au mo toku agaga, ka pese foki au mo toku mafaufau ke malamalama au i ei.

¹⁶Kafai e 'talo fakafetai koe i se gana e se iloa ne koe, ka mafai pefea ne se tino e i loto i te fakatasiga o tuku atu tona mafaufau ki tau 'talo fakafetai? E seai eiloa se pogai e mafai ei ne ia o malamalama ki au muna.

¹⁷Me pefea eiloa i te 'lei o tau 'talo fakafetai ki te Atua, kae se aoga lele eiloa ki te sua tino.

¹⁸Au e fakafetai ki te Atua me uke oku taimi i lo koutou o maua te meaalofa faka te Agaga, o faipati ki 'gana kesekese kola e se iloa ne au.

¹⁹Kae kafai ko faipati au i taimi o tapuakiga faka te Ekalesia, ka sili atu toku fia fakaaoga e lima fua pati e malamalama ei koutou, i lo te fakaaoga ne au a te sefulu afe o pati i se 'gana kese tela e se iloa ne au o faipati, ke akoako atu ei a nisi tino.

²⁰Taina, sa fakatamaliki otou mafaufau ki mea konei, kae ke mafaufau faka'lei koutou ki ei, e pela mo ne tino ko ma'tua mafaufau.

²¹E tusi a muna konei i te Tusi: “Muna a te Aliki: Ka faipati au ki tino konei, Ka faipati foki au ki tino e alatu i tino e kese olotou 'gana, e pela foki mo gutu o tino fakaatea. Ka ko oku tino tonu e se faka'logo mai eiloa ki a au.”

²²Tela la, a te faipati ki 'gana kesekese kola e se iloa ne se tino e alatu i te mana o te Agaga Tapu se fakailoga e se mō kelisiano, kae mō tino se kelisiano, ka ko te lauga atu te muna a te Atua, e se mo tino se kelisiano, kae mo kelisiano.

²³Kafai la ko potopoto te Ekalesia katoa, kae fai'pati foki a tino katoa ki 'gana kesekese kola e se iloa ne latou e alatu i te mana o te Agaga Tapu, kae ulu mai foki mo tino i tua io me ko tino se kelisiano o fakalogo'logo, ka se fai ake la latou pela i a koutou e fakavale'vale?

²⁴Kae kafai ko folafola katoa ne koutou te muna a te Atua, kae ulu mai ki loto se tino se kelisiano io me se tino i tua, ka lagona fakamaoni ne ia tona agasala e tusa mo akoakoga a koutou ko lagona ne ia. Ka fakamasinogina a ia ne mea e lagona ne ia,

²⁵ka fakaasi mai foki a mea masei kola e i tena loto; kae ka punou ifo a ia o tapuaki ki te Atua, o takutonu atu foki ne ia te Atua penei, “E tonu eiloa i te Atua e i konei i a koutou!”

²⁶Kae se a la e taina? Kafai e 'luku fakatasi koutou, e isi se tino e isi sena pese, ko te sua tino se mataupu a ia e akoako atu, ko te sua tino se fakaasiga, ko te sua tino se talaiga mai te Atua, ka ko te sua tino ko te faipati ki te 'gana e se iloa ne ia, ka ko te sua tino ko te fakamatala ne ia te uiga o 'gana. A mea katoa konei ke fai mo mea e ati ake ei te kau Kelisiano i te poto o te Atua.

²⁷Kafai e isi ne tino e faipati ki 'gana kesekese kola e se iloa ne latou e alatu i te mana o te Agaga Tapu, e 'tau o faipati ne se tokolua io me se tokotolu kae ke fakasolosolo, ka ke fakamatala la ne se isi tino olotou uiga.

²⁸Kae kafai ko seai se tino e fakamatala ne ia, mo a eiloa ma faipati latou i te Ekalesia, ka ke faipati ifo eiloa ki a ia eiloa pela foki ki te Atua.

²⁹Ke faipati fua ne se tokolua io me se tokotolu o tino kola e folafola ne latou te muna a te Atua, ka ko nisi ke fakamasino ne latou a pati a tino folafola kona.

³⁰Kafai ko oko mai se fakaasiga mai te Atua ki so se tino i te otou fakatasiga, e 'tau eiloa o faipati ne ia i mo taimi kona ko te mea ke iloa ne tino. A te tino tela ne faipati i te taimi ne maua ei ne te sua tino te fakaasiga, e 'tau eiloa o fakagata tena faipati kae sagasaga ki lalo.

³¹I te mea e tofu katoa koutou takitokotasi mo otou talaiga, e folafola atu ei ne koutou a te muna a te Atua, ko te mea ke akoako kae fakamalosigina i ei tatou katoa.

³²E 'tau mo so se tino e isi sena talaiga o te muna a te Atua o pulea 'lei tena folafola atu.

³³Me ne seki kalagagina tatou ne te Atua ke sona fai otou tapuakiga, kae ke matua fai mo te agaga ava. E sona fai otou tapuakiga, ka ko nisi Ekalesia e tapuaki mo te ava.

³⁴E 'tau mo fafine o se uā i lukuga faka te Ekalesia. E se 'tau mo latou o fai'pati i lukuga faka te Ekalesia, me se 'tau mo latou o fai'pati i lukuga pena, e pela eiloa mo te Tulafono faka‐lutaia.

³⁵Kafai se mea e fia iloa ne fafine, ke fesili ki olotou avaga i olotou fale. Me se mea fakalumalumagina a te sona faipati o se fafine i lukuga faka te Ekalesia.

³⁶Kafai la e se loto koutou ki aku muna ne fai atu, au e fai atu i te muna a te Atua e seki ui mai i a koutou, ka ko te mea ko maua nei ne koutou te tala 'lei.

³⁷Kafai so se tino e manatu i a ia se tino e folafola atu te muna a te Atua, io me se tino e i a ia meaalofa faka te Agaga, e 'tau o iloa ne ia te mea e fai atu ne au, me ko te fakatonuga a te Aliki.

³⁸Kafai se tino e se fakalogo ki aku muna konei e fai atu, sa faka'logo la ki ana muna e fai atu.

³⁹Tela la e oku taina, ke loto finafinau koutou o folafola atu te muna a te Atua, kae sa fakatapugina a te faipati ki 'gana kesekese kola e se iloa ne koutou e alatu i te mana o te Agaga Tapu.

⁴⁰Ke fai a mea katoa ke fanofano 'lei kae gali i taimi o tapuakiga.