Read Te Tusi Tapu I Te Gana Tuvalu Lomiga Lua 1 KOLINITO 2 Bible Online

1 KOLINITO 2 - Te Tusi Tapu I Te Gana Tuvalu Lomiga Lua bible

1 KOLINITO 2

¹I taku fanatuga ki a koutou, e oku taugasoa, o folafola atu mea funa kae 'tonu a te Atua,[2] ne seki fakaoga ne au a muna 'loto mo akoakoga ma'luga.

²I te mea ne manatu au ke fakapuli mea katoa i te taimi koi 'nofo tatou, vagana fua ko Iesu Keliso, mo tona mate i luga i te sataulo.

³Tela la, i taku fanatuga ki a koutou, ko oko eiloa i toku vaivai mo te polepole i te mataku,

⁴ka ko aku muna mo taku folafolaga ne seki fakatoka atu i muna 'gali o te poto faka te tagata, kae ne fai i te fakaasiga 'mana a te Agaga o te Atua.

⁵Tela la, a te otou fakatuanaki e se fakavae i luga o te poto o tino, kae i te mana o te Atua.

⁶Au e faipati ki te poto ki a latou kola ko ma'tua i te olaga faka te Agaga. Kae se se poto faka te lalolagi, io me se poto o tino kola e pule ne latou te lalolagi nei, ko latou kona ko pili o palele te lotou pule.

⁷A te poto tela e faipati au ki ei, ko te poto 'funa o te Atua, tela e 'funa mai tino, ka ko leva ne fakatoka ne te Atua mō te tou manuia ka koi tuai o faite te lalolagi.

⁸E seai ne takitaki o te lalolagi nei ne iloa ne latou a te poto tenei. Moi fai ne iloa ne latou, penei e se fakasataulo ne latou a te Aliki 'malu.

⁹E pela mo muna a te Tusi, “Ko te mea ne seki matea io me ne seki lagona ne se tino, Ko te mea ne mafaufaugina ne se tino me se mafai o tupu, Ko te mea tonu eiloa tena ne fuafuagina ne te Atua mō latou kola e a'lofa ki a ia.”

¹⁰Ka ko tatou tonu eiloa ne fakaasi ki ei ne te Atua, ke iloa ne tatou ana mea 'funa e alatu i tena Agaga. A te Agaga e fakaasi ne ia a mea katoa, e oko foki eiloa ki fuafuaga 'loto a te Atua.

¹¹E pela mo te tino, ko tena agaga eiloa e iloa ei me ne a mea i tena 'kano loto. Ia, e pena foki la te Atua, ko te Agaga eiloa o te Atua tela e iloa ne ia a mea katoa e uiga ki te Atua.

¹²Kae nei, e seki maua ne matou a te agaga o te lalolagi tenei; kae ne maua ne matou a te Agaga ne aumai ne te Atua, ko te mea ke iloa ne matou a mea katoa ne tuku mai ne te Atua ki a matou.

¹³Tela la, a matou e se fai'pati atu ki muna ne akoako mai ki te poto o tino, kae ki muna ne akoako mai ne te Agaga, i te taimi e fakamatala ei ne matou a mea tonu faka te Agaga ki a latou kola ko maua ne latou te Agaga.[3]

¹⁴Ka ko te tino tela e se maua ne ia te Agaga, e se maua foki ne ia a meaalofa mai te Agaga o te Atua. E se mafai eiloa o iloa tonu ne ia, me ne mea valea fua ki a ia, i te mea e fakamasinogina fua te lotou aoga i feitu faka te Agaga.

¹⁵A te tino tela ei i a ia a te Agaga o te Atua, e mafai ne ia o fakamasino a te tāua o mea katoa, kae seai eiloa se tino e mafai o fakamasino a ia.

¹⁶E pela mo muna a te Tusi, “Ko oi e iloa ne ia a te mafaufau o te Aliki? Ko oi e mafai ne ia o fakatonu a ia?” E seai, ka ko tatou fua kola ko maua ne tatou a te mafaufau o Keliso.