Read Te Tusi Tapu I Te Gana Tuvalu Lomiga Lua 2 KOLINITO 3 Bible Online

2 KOLINITO 3 - Te Tusi Tapu I Te Gana Tuvalu Lomiga Lua bible

2 KOLINITO 3

¹A matou e se pau mo faiakoga 'loi kola ne olo atu ki a koutou, e fonu i te fakamata'mata kae ne aumai ne latou a tusi e tavae ei olotou galuega.

²A koutou ko te motou tusi molimau e tusi i omotou loto, ne tusi ke iloa ka ke faitau foki a tino katoa i ei.

³ E iloa foki eiloa ne koutou me ko Keliso ne tusi ne ia te tusi, kae ne 'moli atu ne ia e alatu i a matou. Ne seki tusi ki vaitusi i luga i ma tusitusi, kae ne tusi i loto o tino i te Agaga o te Atua ola.

⁴Ko fai atu matou penei i te mea e talitonu matou ki te Atua e alatu i a Keliso.

⁵Me e seai se mea i a matou e fakatalitonu ei me mafai ne matou o fai te galuega tenei. Ka ko te motou mafai o fai te galuega, e mai te Atua:

⁶ me ko ia ne fai ne ia tatou ke mafai o tavini i te feagaiga fou, tela e seai i ei se tulafono tusia, ka ko te tulafono o te Agaga. A te tulafono tusia e aumai ne ia te mate, ka ko te Agaga e aumai ne ia te ola.

⁷ A te Tulafono ne tusi i luga i ma tusitusi, ne matea i ei a te 'malu o te Atua i te tukumaiga o te tulafono. E tonu me ne gasolo o seai se 'malu; ka ko te 'pula i mata o Mose ko oko eiloa i te malosi, ko se mafai foki ne tino Isalaelu o 'kilo tonu ki a ia. E ui eiloa i te Tulafono e aumai ne ia te mate, ka ko te mea ne tuku mai i te 'malu lasi.

⁸Ko sili atu eiloa i te taua o te 'malu tela e fai ei a galuega a te Agaga!

⁹A te Feagaiga Mua tela e aumai ne ia te fakasalaga ki te tino e fonu i te 'malu, kae sili atu la te 'malu o te Feagaiga Fou tela e fai ne ia te tino ke amiotonu!

¹⁰A te 'pula o te Feagaiga Mua, ko galo atu ona ko iai nei te 'pula o te Feagaiga Fou.

¹¹A te Feagaiga Mua e 'malu, ka ko te mea e se tumau; ka ko te Feagaiga Fou e sili atu tona 'malu, i te mea e tumau ki te se gata mai.

¹²Ona ko te fakamoemoega tenei, ko mafai ei ne au o faipati tonu atu mo te se mataku.

¹³ E se pau tatou mo Mose tela ne tuku ne ia te ufimata o 'pono ona mata, ko te mea ke se matea ne tino Isalaelu te gasolosolo malie o galo te 'pula.

¹⁴Ko fakamakekegina olotou loto; ke oko mai ki te aso nei e fakapulougina olotou loto ne te ufimata tena, manafai e fai'tau ki tusi o te feagaiga mua. A te ufimata tenei e galo fua manafai e fakatasi se tino mo Keliso.

¹⁵Ke oko mai foki eiloa ki aso nei manafai e fai'tau latou ki Tulafono a Mose, e tumau eiloa te fakapulougina olotou loto ne te veli tena.

¹⁶ E mafai o 'suke, e pela mo muna a te tusi tapu e uiga mo Mose, “Me i tena veli ne 'tapale keatea i tena fuliga ki te Aliki.”[2]

¹⁷A te fakaaoga o te pati “Aliki” i konei, ko tona uiga ko te Agaga. Ko te koga e nofo i ei te Agaga o te Aliki, e iai foki te saolotoga i kona.

¹⁸Tela la, ko tatou katoa kola e se ufiufi o'tou mata, e matea ne tatou te 'malu o te Aliki, tela e fuli malie ne ia tatou ke foliga ki a ia, i te 'malu e sili atu i 'malu katoa, tela e vau mai te Aliki ko ia ko te Agaga.