Read Te Tusi Tapu I Te Gana Tuvalu Lomiga Lua 2 KOLINITO 6 Bible Online

2 KOLINITO 6 - Te Tusi Tapu I Te Gana Tuvalu Lomiga Lua bible

2 KOLINITO 6

¹Ona ko te motou ga'lue fakatasi mo te Atua, ko fakamolemole atu matou ki a koutou, ke se taku fakaseaoga ne koutou te alofa tauanoa o te Atua tela ko oti ne maua ne koutou.

² Faka'logo ki muna a te Atua: “Ne lagona ne au tou leo i te itula o toku alofa, Ne fesoasoani atu foki au ki a koe i te aso o te fakaolataga.” Kiloke! Tenei te taimi e maua ei te alofa o te Atua, a te aso nei ko te aso o te fakaolataga!

³E se loto matou o fai ne mea faigata ki mafaufauga o nisi tino, ke mo a e sae mai ei se mea masei i te motou galuega.

⁴Kae i mea katoa e fai ne matou, e fakaasi atu ei i a matou ko tavini a te Atua, i te loto kufaki malosi ki puapuaga, ki mea faigata, ki mala,

⁵ ki kini, ki falepuipuiga, ki amioga se fuafuagina, ki galuega, ki te se moe 'lei, ki te likiliki.

⁶E fakamaonia ne matou te motou fai mo tavini a te Atua i te amio 'lei, i te poto, i te kufaki, i te alofa kaimalie, te Agaga Tapu, i te alofa tonu;

⁷i te lauga atu o te munatonu, i te mana o te Atua; i meatau o te amiotonu e tau atu ei matou kae fakasao foki matou,

⁸i te vikia mo te se vikia, ki te takumaseigina mo te taku'leigina. Ne taku matou ne tino 'loi, ka ko matou e fai'pati eiloa ki te mea tonu.

⁹Ne tino e se iloa, kae tela la e iloa matou ne tino katoa; ne tino 'mate, kae kiloke, e ola matou. Ne fakasalagina, kae ne seki 'mate matou;

¹⁰e pela me fanoanoa kae fiafia faeloa matou; ne fakamativagina, kae tokouke ne maumea; e foliga mai me e seai ne omotou mea, kae tela la e uke omotou mea valevale.

¹¹Taugasoa pele i Kolinito! Ne fai'pati tonu atu matou ki a koutou i a matou e alofa mo omotou loto katoatoa ki a koutou.

¹²Ne a'lofa atu matou ki a koutou, ka ko koutou ne seki a'lofa mai ki a matou.

¹³Ko faipati atu au penei ki a koutou e pela eiloa koutou mo ne aku tama: fakaasi mai te lagona tonu tela ne fakaasi atu foki ne matou ki a koutou. Ke a'lofa mai koutou ki a matou mo otou loto katoatoa.

¹⁴Sa taumafai o ga'lue tasi mo tino se talitonu. E se mafai o fakatasi te amiotonu mo te masei. E se mafai o mafuta fakatasi te mainaga mo te pouliga.

¹⁵E se mafai o fealofani Keliso mo te Tiapolo. E se mafai o pau a mea e maua ne te tino talitonu mo te tino se talitonu.

¹⁶E seai se sokoga o te fale tapu o te Atua mo tupua. A tatou ko te fale tapu o te Atua ola! E pela eiloa mo muna a te Atua ne fai: “E fai ne au a toku fale i a latou, ke nofo foki au i a latou, E fai foki au mo olotou Atua, ka ko latou ka fai mo oku tino.”

¹⁷ Ne toe fai mai foki te Aliki: “E 'tau o tiakina ne koutou latou, kae fakamavae keatea mo latou. Sa puke ki mea se 'ma, Ko talia ei ne au koutou.

¹⁸ Muna a te Aliki 'Malu, E fai au mo otou tamana. Ka ko koutou e fai mo aku fanau.”