Read Te Tusi Tapu I Te Gana Tuvalu Lomiga Lua KALATIA 1 Bible Online

KALATIA 1 - Te Tusi Tapu I Te Gana Tuvalu Lomiga Lua bible

KALATIA 1

¹Ko au ko Paulo, ko te apositolo e se mai tino io me mai se tino, kae mai i a Iesu Keliso mo te Atua te Tamana, tela ne fakatu ne ia a Iesu mai tino 'mate.

²E fakatalofa atu au fakatasi mo taina Kelisiano katoa kola e 'nofo mo au ki Ekalesia i Kalatia.

³Ke i a koutou a te alofa tauanoa mo te filemu mai i te Atua te Tamana mo Iesu Keliso te Aliki o tatou.

⁴Ne tuku atu a Keliso ne ia eiloa mo agasala a tatou, ke fakasaoloto tatou mai te vaitaimi masei tenei, e pela eiloa mo te loto o te Atua te Tamana o tatou.

⁵Ke i te Atua te tavaega e se gata mai, e se gata mai eiloa. Amene.

⁶Ko oko eiloa i toku ofo i a koutou, i te vave o tiakina ne koutou a ia tela ne kalagagina ne ia koutou i te alofa tauanoa o Keliso,[1] ka ko 'fuli koutou ki se tala 'lei fakaatea.

⁷E se fai pela me isi ake foki se isi tala 'lei, ka ko te mea e isi ne tino mai i a koutou e olotou kosugina koutou, kae taumafai foki o fuli te tala 'lei a Keliso.

⁸Kae kafai ko matou konei, io me se agelu mai i te lagi, e talai atu se tala 'lei e kese mai te mea ne folafola atu ne matou, ke maua sona kaitoa.

⁹Pela mo omotou muna ne fai atu muamua, kae nei ko toe fai atu foki ne au: kafai se tino e folafola atu ki a koutou se tala 'lei e kese mai i te tala 'lei ne talai atu ne matou, ke maua sena kaitoa!

¹⁰E a, e salasala nei ne au a te loto o tino, me ko te loto o te Atua? Io me taumafai au ke taku'leia au ne tino? Kafai e tumau foki toku fia taku'leia ne tino, ko se 'tau o fai au mo tavini a Keliso.

¹¹Taina, e fakailoa atu ne au ki a koutou, me i te tala 'lei tela ne folafola atu ne au, e se se tala 'lei a se tino.

¹²I te mea, e seki maua mai ne au mai se tino io me ne akoga au i ei, ka ko Iesu Keliso eiloa ne fakaasi mai ne ia ki a au.

¹³Ne 'logo koutou i toku olaga mua i te faka Iutaia, i toku fakasaua masei ki te Ekalesia a te Atua, kae ne taumafai foki au o ofa.

¹⁴Ne tulaga muamua foki au i faifaiga o te lotu faka-Iutaia i oku kautama i toku fenua, i toku toaga malosi ki munatuku a oku tamana.

¹⁵Ka ko te Atua ne filifili ne ia a au i tona alofa tauanoa, ka koi tuai o fanau mai au, ne kalagagina foki au ne ia ke tavini atu ki a ia.

¹⁶Kae ne loto foki ke fakaasi mai tena Tama ki a au, ko te mea ke folafola atu ne au a ia ki fenua fakaatea, kae ne seki filifili au mo se tino.

¹⁷Ne seki fano foki au ki Ielusalema, ki a latou kola ne mua o fai mo apositolo i a au, kae ne fano eiloa au ki Alapi; toe foki ei au ki Tamaseko.

¹⁸I te tolu tausaga fakamuli ifo, au ne fano ki Ielusalema o asi a Petelu, kae ne 'nofo fakatasi maua i vaiaso e lua.

¹⁹Ne seki fetaui au mo nisi apositolo, kae na fua ko Iakopo[2] fua te taina o te Aliki.

²⁰A mea konei, e tusi atu ne au ki a koutou i mua o te Atua, kae se loi atu au.

²¹Fakamuli ifo, au ne fano ki Sulia mo Kilikia,

²²kae ne seki lavea 'lei eiloa oku foliga ne Ekalesia a Keliso i Iutaia.

²³Ne 'logo fua latou i te pati, “A ia tela ne fakasaua mai ki a tatou i aso ko teka atu, kae nei ko talai mai ne ia te fakatuanaki tela ne taumafai a ia o ofa!”

²⁴Ne 'viki atu ei latou ki te Atua ona ko au.