Read Te Tusi Tapu I Te Gana Tuvalu Lomiga Lua KALATIA 2 Bible Online

KALATIA 2 - Te Tusi Tapu I Te Gana Tuvalu Lomiga Lua bible

KALATIA 2

¹I te sefulu fa tausaga fakamuli ifo, ne toe foki au ki Ielusalema, kae ne olo maua mo Panapa; ne puke foki ne au a Tito ke olo matou.

²Au ne fano ona ko te fakaasiga ki a au; kae ne taku malie atu ne au ki a latou i te motou fono ne fai, a te tala 'lei tela e talai ne au i fenua fakaatea, i te mea ma se aoga taku telega nei mo taku telega mua.

³Ka ko Tito tela ne fakatasi maua, e ui eiloa i a ia se Eleni, ne seki fai malo a ia ne latou ke pilitome.

⁴Kae ona ko taina 'loi kola ne taumafai ke ofi mai ki loto, ne ulu mai ki loto o alamati a te saolotoga o tatou i a Keliso Iesu, ko te mea ke fakapologa tatou ne latou.

⁵Ne seki fia takavale matou i a latou i se taimi, ko te mea ke tumau eiloa i a koutou te tonuga o te tala 'lei.

⁶Ka ko latou kola e takitaki, me pefea eiloa olotou tulaga, ka ko au eiloa i a au e seai lele eiloa se lotou kesekesega; i te Atua e se fakailoga ne ia a tino, kae muna atu au e uiga mo latou kola e takitaki; e seai se lotou fesoasoani fou ne fai mai ki a au;

⁷kae se gata i kona e tai kese te lotou manatu, i te iloaga ne latou me ne tuku mai foki ki a au a te talaiga o te tala 'lei ki tino o fenua fakaatea, e pela eiloa mo te tukuatuga ki a Petelu a te talaiga o te tala 'lei ki tino Iutaia.

⁸A te Atua tela e galue i loto i a Petelu mo tino pilitome, e galue foki i loto i a au mo tino o fenua fakaatea,

⁹kae i te iloaga ne latou i te alofa tauanoa ne tuku mai foki ki a au, ne tuku mai ei ne Iakopo, Petelu mo Ioane kola ko pou malosi a te lima fakaatamai o te mafutaga ki a maua mo Panapa, me 'tau i a maua o olo atu ki fenua fakaatea, ka ko latou ki tino pilitome.

¹⁰Ne fakatonu mai foki ke 'tau o masaua ne matou a tino ma'tiva, ka ko te mea foki eiloa tena e fiafia malosi au o fai.

¹¹I te vauga a Petelu ki Anitioka, ne tu atu au i mua o tino o 'teke a ia, i te mea ko iloa atu eiloa tona 'se.

¹²Ka koi tuai o o'mai a nisi tino mai i a Iakopo, ne 'kai fakatasi a Petelu mo tino o fenua fakaatea; kae i te lotou okomaiga ne sōsō a ia ki ona tua ke mavae keatea mai i a latou, me mataku i tino kola e fakamalosi ne latou ke pilitome a tino o fenua fakaatea.

¹³Ka ko Iutaia kola ne fakatasi mo ia i kona, ko se fai katoa ne latou a te mea tonu, to atu ei foki mo Panapa i te lotou 'se.

¹⁴Kae i taku laveaga me ko se olo tonu latou i te tala 'lei, ne muna atu ei au ki a Petelu i mua o latou katoa, “Kafai e ola koe e pela mo se tino o fenua fakaatea, kae se ola e pela mo se Iutaia, kae tonu la i a koe se Iutaia; e pefea la o fakamalosi ne koe a tino o fenua fakaatea, ke ola e pela mo ne Iutaia?”

¹⁵A tatou ne fa'nau mai, ne tinā Iutaia tonu eiloa, kae se ne tino agasala o fenua fakaatea.

¹⁶Kae e iloa 'lei foki ne tatou i te tino e se takuamiotonugina i galuega a te Tulafono, ka ko te fakatuanaki ki a Iesu Keliso. Ne fakatuanaki foki tatou ki a Keliso Iesu, ko te mea ke takuamiotonugina tatou i te fakatuanaki ki a Keliso, kae se ko galuega a te Tulafono, me se mafai lele eiloa o takuamiotonugina se tino i galuega a te Tulafono.

¹⁷Kafai la ko taumafai nei tatou ke takuamiotonugina i a Keliso, kae e iloa ake ei i a tatou ne tino agasala foki, ko tena uiga la a Keliso e tavini foki ki te agasala? Ikai, e se pena!

¹⁸Kafai e toe ati ake ne au a mea kola ne lepe ne au, ko fakaasi mai ei i a au se tino ofa Tulafono.

¹⁹Ne tupu ake au i te Tulafono, kae ne tamate au ne te Tulafono. Ne tupu te mea nei ko te mea ke ola au mō te Atua.

²⁰Ne fakasataulo fakatasi maua mo Keliso; kae se ko au tenei e ola atu, ka ko Keliso tenei ko ola i loto i a au, ka ko te olaga faka te foitino tenei e ola ei au, ko te olaga tena e ola ei au i te fakatuanaki ki te Tama a te Atua, tela ne alofa mai ki a au, kae ne tuku mai foki tona ola mō au.

²¹E se 'teke ne au a te alofa tauanoa o te Atua; kae moi fai e maua te takuamiotonugina i te Tulafono, penei ko se aoga te mate o Keliso.