Read Te Tusi Tapu I Te Gana Tuvalu Lomiga Lua KALATIA 4 Bible Online

KALATIA 4 - Te Tusi Tapu I Te Gana Tuvalu Lomiga Lua bible

KALATIA 4

¹Au e fai atu, i aso koi foliki ei te suitonu, e ui eiloa e a ia a mea katoa, kae se kese eiloa a ia mo te pologa.

²E nofo eiloa a ia mai lalo o te tausiga a ona tausi mo tavini pule, ke oko ki te aso ne fakamoe ne tona tamana ke pule ei a ia.

³E pena foki tatou, ka koi fo'liki tatou, ne 'nofo pologa tatou i te malosi o agaga pule muamua o te lalolagi.

⁴I te okoga ki te taimi tonu ne fakamoe ei ne te Atua, ne uga mai ne ia a tena Tama, ne fanau i te fafine, kae ne fai katoa ne ia a mea e fakatonu mai ne te Tulafono.

⁵Ne fai ne ia o fakasaoloto a latou kola e i lalo o te pule a te Tulafono, ko te mea ke fai tatou mo tamapuke a te Atua.

⁶Ke fakaasi ia koutou;[4] ko ana tama, ne uga mai ei ne te Atua te agaga o tena tama ki loto o tatou, tela ko ia e kalaga atu penei, “Tamana, toku Tamana.”

⁷Tela la, ko se toe fai koe mo pologa, kae se tama; kae kafai se tama se suitonu eiloa e alatu i te Atua.

⁸I aso ko teka atu, ne se iloa ne koutou a te Atua, me ne 'nofo pologa koutou ki mea e se ne atua.

⁹Kae nei, ko iloa ne koutou a te Atua, ko iloa foki ne te Atua a koutou. Ne mafai pefea koutou o 'fuli ki feitu vaivai o agaga pule muamua o te lalolagi kola e vaivai mo te se taulia? Ai a e toe ma'nako ei koutou ke toe fai mo pologa i ei?

¹⁰E taofi koutou me i te lotu kelisiano e fakavae i luga i te tāua! Tausi ne koutou aso tāua, masina tāua, tau mo tausaga tāua!

¹¹Ko se toka toku loto i a koutou, i te mea ma iku ki te fakaseaogagina aku galuega ne fai mo koutou.

¹²Taina, au e fakamolemole atu ki a koutou, ke fai koutou e pela mo au, me i a au e pela foki mo koutou. Ne seki fai mai eiloa ne koutou se mea 'se ki a au;

¹³e masaua ne koutou a te pogai, ne ala ei o folafola atu ne au a te tala 'lei ki a koutou i te taimi muamua, ona ko toku masaki.

¹⁴E ui eiloa i te fai toku foitino vaivai e pela mo se tofotofoga ki a koutou, kae ne seki fakatauemu kae 'teke mai koutou ki a au, me ne talia ne koutou au e pela mo se agelu a te Atua, e pela foki eiloa mo Keliso Iesu.

¹⁵Se a te mea ne maua ne koutou mai te fiafia tela ne maua ne koutou? E molimau au ki a koutou, moifai ne mafai, penei la ko oti ne tapale otou mata, kae aumai ki a au!

¹⁶E a, ko fai au mo fili o koutou, i te taku atu ne au a te mea tonu?

¹⁷Ko oko eiloa i te lotou atafai ki a koutou, kae se alofa loi, me manako o 'vae keatea koutou mai i a au, ko te mea ke fakamaoni koutou ki a latou kae se ko au.

¹⁸E sili te taku'leia i te mea 'lei i taimi katoa, kae se ko te taimi fua e fakatasi ei tatou.

¹⁹Taku fanau, au e toe kufaki i oku 'maega, ko te mea ke foliga mai Keliso i loto i a koutou.

²⁰Au e manako ke 'nofo tasi tatou nei, ko te mea ke sui aku faiga kia koutou. Ko oko eiloa i te se toka o toku mafaufau ona ko koutou.

²¹Fai mai, a koutou kola e fia 'nofo mai lalo o te pule a te Tulafono, e a, e se iloa ne koutou a muna o te Tulafono?

²²Ne fai mai i a Apelaamo e tokolua ana tama tagata, e tokotasi i te fafine pologa, kae tokotasi i te fafine saoloto.

²³A te tama a te fafine pologa, ne fanau mai i manako faka te foitino, ka ko te tama a te fafine saoloto, ne fanau mai i te folafolaga a te Atua.

²⁴A te mea nei se tala fakatusa: a fafine konei e tokolua, ko fakatusa o feagaiga e lua. E tasi te feagaiga mai te mauga o Sinai, ke fanau mai ei a tamaliki pologa, (ko Hakala tena;)

²⁵Hakala, tena ko te fakatusa o te mauga o Sinai i Alapi;[5] ko te ata o Ielusalema i aso nei, tela e nofo pologa fakatasi mo ana tino katoa.

²⁶Ka ko Ielusalema faka te lagi e saoloto mai te nofo pologa ki te Tulafono; ko ia ko te matua o tatou.

²⁷Muna a te Tusi, “Ke lifu koe te fafine se fanau! Ke pakalaga koe kae tagi mo te fiafia, a koe tela e seki lagona ne koe te 'mae o te fafine fanau! E tokouke a tama a te fafine taka, i tama a te fafine avaga.”

²⁸Taina, a tatou ko te fanau a te folafolaga, e pela mo Isaako.

²⁹Kae i te taimi tena, a ia tela ne fanau i te foitino, ne fakasaua ne ia a ia tela ne fanau mai faka te Agaga; e pena foki i aso nei.

³⁰Kae ne a muna a te Tusi? “Atuli keatea a te fafine pologa mo tena tamaliki; me i te tama a te fafine pologa, e seai sona tofi fakatasi mo te tama a te fafine saoloto.”

³¹Tela la e taina, a tatou e se ne tama a te fafine pologa, ka ko tama a te fafine saoloto.