Read Te Tusi Tapu I Te Gana Tuvalu Lomiga Lua KALATIA 5 Bible Online

KALATIA 5 - Te Tusi Tapu I Te Gana Tuvalu Lomiga Lua bible

KALATIA 5

¹A te saolotoga tenei ko maua ne tatou, ne fakasaoloto ei tatou ne Keliso. Tumau la i ei, kae sa toetuku atu koutou ke toe fai mo pologa.

²Faka'logo mai, au ko Paulo ko fai atu penei: kafai e loto koutou ke pilitome, ko se aoga Keliso ki a koutou katoa.

³Ko toe fakamalosi atu ne au a te mea nei, kae toe fai atu foki au ki so se tino e fia pilitome: e 'tau mo ia o tausi a te Tulafono katoa.

⁴A koutou kola e fia takuamiotonugina i te Tulafono, ko tena uiga ko mavae keatea koutou mai i a Keliso. Ko 'to ki tua koutou mai i te alofa tauanoa o te Atua.

⁵Ka ko matou, a te motou fakamoemoega ke maua te amiotonu tela e fakatalitali ei matou mo te loto naunau; ko te galuega tena a te Agaga e alatu i te fakatuanaki.

⁶Me ko te pilitome io me ko te se pilitome, e se taulia a mea kona i a Keliso Iesu; kae na ko te fakatuanaki fua tela e galue i te alofa, e taulia.

⁷Ne fanofano 'lei eiloa koutou! Ka ko oi ne fakalavelave ne ia koutou, ke se faka'logo ki te mea tonu?

⁸A te fakakolekolega tenei, ne seki fai ne te Atua tela ne ana kalagagina koutou.

⁹E pela mo muna o te faigamuna e tasi “Ne mo mea fua o te mea fakafete, kae fakafete ne ia te paluga katoa.”

¹⁰Ka ko au, koi talitonu eiloa ki a koutou i te Aliki, me e se talia eiloa ne koutou se isi talitonuga; ka ko te tino tela ne fakalavelave ne ia koutou e tusa eiloa me ko oi a ia, e fakasala eiloa ne te Atua.

¹¹Ka ko au e oku taina, kafai e mau eiloa toku talai atu ki te pilitome, me se mea e 'tau; ai a la e fakasauagina ei au? Kafai la tena, ko tona uiga ko taku talaiga ki te sataulo o Iesu, e se toe fai mo fakalavelave ki a koutou.

¹²Au e manako ki a latou kola e fakalavelave ki a koutou, ke pena latou.

¹³Ka ko koutou e oku taina, ne kalagagina koutou ki te saolotoga; ke sa fai la ne koutou te saolotoga tenei mo mea e pule i ei te feitu faka te foitino, kae ke fai te alofa mo auala e fakatau tavini ei koutou.

¹⁴Me i te Tulafono katoa ko akutu i te fakatonuga e tasi: “Alofa ki tou tuakoi, e pela eiloa mo koe ki a koe.”

¹⁵Kafai la e tumau eiloa koutou i te fai taua mo te finau, ko tona uiga e fakamasei koutou ne mea konei.

¹⁶E fai atu au penei, ke takitaki te Agaga i otou olaga, kae ke se fiafia koutou ki lagona faka te foitino.

¹⁷I te mea, e 'teke atu a manako o te foitino ki manako o te Agaga, e 'teke atu foki a manako o te Agaga ki manako faka te foitino: a mea konei e lua, e fai fili; ko tena uiga e se mafai ne koutou o fai a mea e loto koutou ki ei.

¹⁸Kafai e takitaki koutou ne te Agaga, ko se 'nofo koutou mai lalo o te Tulafono.

¹⁹E iloa 'lei faeloa a mea e fai ne te manako faka te foitino. Ko mea penei: sulaitetapu, amio masei, mo faiga masei;

²⁰ifo ki tupua, fai vailakau, fai fili, fai taua, loto masei, loto ita, manatu fakapito, finau valea, mo te fia fakamavaevae;

²¹kaisano, 'kona, fiafiaga o te 'kona, mo nisi mea katoa penei. Ko polopoloki ne au koutou nei, pela foki mo aku polopolokiga mua; a tino e fai ne latou a mea konei, e se talia ne latou a te Atua ke fai mo olotou tupu.

²²Ka ko fua o te Agaga, ko te alofa, te fiafia, te filemu, te kufaki, te mataalofa, te 'lei, te fakamaoni,

²³te loto malalo, mo te loto pulea. E seai se tulafono mo mea konei.

²⁴Ka ko tino kola ko ola i a Keliso Iesu, ko oti ne fakasataulo ne latou a te feitu faka te foitino mo ona manako, mo mea foki e fina ki ei.

²⁵Ko ola tatou i te Agaga, tela la, e 'tau o fakatonutonu foki tatou ne te Agaga.

²⁶E se 'tau mo tatou o fakamata'mata, faka'itaita te sua tino ki te sua tino.