Read Te Tusi Tapu I Te Gana Tuvalu Lomiga Lua EFESO 3 Bible Online

EFESO 3 - Te Tusi Tapu I Te Gana Tuvalu Lomiga Lua bible

EFESO 3

¹Au ko Paulo te pagota a Keliso Iesu ona ko koutou e tino o fenua fakaatea; tena te pogai e 'talo ei au ki te Atua mō koutou.

²E tonu me ko oti ne lagona ne koutou, i te Atua ne tuku mai ne ia ki a au a te galuega tenei i tona alofa tauanoa, ke fai mō te otou 'lei.

³Ne fakaasi ne te Atua ana fuafuaga 'funa, kae fakailoa mai foki ki a au. Ko oti ne tusi fakatoetoe atu ne au a te mea nei,

⁴kae kafai e faitau koutou ki mea ne tusi atu ne au, ko iloa ei ne koutou a toku iloa o mea 'funa e uiga ki a Keliso.

⁵Ne seki taku atu ki tino a mea 'funa konei i taimi ko teka, kae nei ko oti ne fakaasi ne te Atua ki apositolo 'malu mo pelofeta e alatu i tona Agaga.

⁶Tenei la te mea 'funa: e fakatasi tino o fenua fakaatea mo tino Iutaia i fakamanuiaga a te Atua ona ko te tala 'lei; e fai foki latou mo tino o te foitino e tasi, kae aofia foki i te folafolaga a te Atua ne fai e alatu i a Keliso Iesu.

⁷Au ne fai mo tavini o te tala 'lei e auala mai i te alofa tauanoa o te Atua, tela ko tena meaalofa ne tuku mai ki a au e alatu i te galuega a tona mana.

⁸Au ko te toe tino se taulia eiloa i tino o te Atua; ka ko tuku mai ne te Atua a te galuega tenei, o folafola atu a te Tala 'Lei o te koloa tumau o Keliso, ki tino o fenua fakaatea,

⁹ke fai foki ke iloa ne tino katoa a te faifaiga o te fuafuaga 'funa a te Atua. A te Atua tela ne faite ne ia a mea katoa, ne 'funa eiloa ne ia tena fuafuaga 'funa i kautama katoa ko teka atu,

¹⁰ko te mea ke fakailoa atu ne te Ekalesia i aso nei, a te poto o te Atua i ona vaega kesekese, ke iloa tonu ne pule o agelu mo malosi faka te lagi.

¹¹Ne fai ne te Atua a te mea nei e pela eiloa mo tena fuafuaga se gata mai, tela ne fakaoso ne ia e alatu i a Keliso Iesu te tou Aliki.

¹²I te 'soko tasi o tatou mo ia, fakatasi mo te tou fakatuanaki ki a ia, ko maua ei ne tatou a te saolotoga o olo atu ki mua o te Atua i te loto talitonu fakamaoni.

¹³Tela la, au ko fakamolemole atu ki a koutou, sa fakavaivai ona ko toku puapuagatia mo koutou; a mea katoa konei e 'tupu mo te otou manuia.

¹⁴Ona ko te feitu tenei, ko totuli ei au o 'talo i mua o te Tamana mō koutou,

¹⁵ko ia foki ko maua mai ei te igoa, ko fakaigoa ei a kaiga katoa i te lagi mo te lalolagi.

¹⁶Au e fakatagi ki te Atua, ke tuku atu ne ia ki a koutou mai te maumea o tona 'malu, a te mana e alatu i tona Agaga, ko te mea ke fakamalosigina otou foitino i loto,

¹⁷ke nofo tumau foki Keliso i otou loto e alatu i te fakatuanaki. Au e 'talo ke mautakitaki otou aka mo otou fakavae i te alofa,

¹⁸ko te mea ke iai fakatasi i a koutou mo tino katoa o te Atua, a te mana e iloa tonu ei te lauefa, te loa, te maluga mo te 'poko o te alofa o Keliso.

¹⁹Ke iloa ne koutou tena alofa, kae tonu me se mafai eiloa o iloa katoatoa tena alofa; ke faka'fonugina koutou ki te 'fonu katoatoa o te Atua.

²⁰Ke i a ia tela e mafai ne ia o fai a mea katoa ke uke atu i mea e fakatagi atu ei tatou, io me ko mea e mafaufau ki ei tatou, e alatu i te mana e galue i loto i a tatou;

²¹ke i te Atua foki te vikiga i loto i te Ekalesia mo Keliso Iesu, ki kautama katoa, ke oko ki te se gata mai, ki te se gata mai eiloa. Amene.