Read Te Tusi Tapu I Te Gana Tuvalu Lomiga Lua EFESO 4 Bible Online

EFESO 4 - Te Tusi Tapu I Te Gana Tuvalu Lomiga Lua bible

EFESO 4

¹Tela la, ko fakamolemole atu au, ko te pagota mō te Aliki, ke 'tau koutou o ola i te olaga ne kalagagina ei koutou,

²i te loto malalo mo te filemu, mo te loto kufaki i taimi katoa. Ke fakatau fesoasoani koutou i te alofa.

³Ke fiafia koutou o fai te loto tasi tela ne tuku atu ne te Agaga, i te filemu tela e fusi tasi ne ia koutou.

⁴E tasi te foitino, e tasi foki te Agaga, e pena foki eiloa a te tasi o te fakamoemoega ne kalagagina ei koutou.

⁵E tasi te Aliki, e tasi te fakatuanaki, e tasi foki te papatisoga.

⁶E tasi foki te Atua te Tamana o tino katoa, tela ko te Aliki o mea katoa, e galue i mea katoa, kae nofo foki i mea katoa.

⁷Ko oti ne tuku mai ki a tatou takitokotasi a te alofa tauanoa, e pela eiloa mo te fakasoasoaga o te meaalofa a Keliso ki a tatou.

⁸E pela mo muna a te Tusi, “Ne fanake a ia ki koga pito sili i te maluga, E tokouke a pagota ne puke ne ia ke olo mo ia, Ne tuku atu foki ne ia a meaalofa ki tino.”

⁹Se a te uiga o te pati, “Ne fanake a ia”? Ko tona uiga ne muamua eiloa o fanaifo a ia ki lalo ki te fakapalelega o te lalolagi.[4]

¹⁰Tela la, a ia tela ne fanaifo ki lalo, ko ia tena ne fanake ki luga ke silia atu i lagi katoa, ko te mea ke iai a ia i koga katoa.

¹¹Ko ia foki tena “ne tuku atu a meaalofa ki tino”; ne tofi foki ne ia a nisi ke fai mo apositolo, a nisi ke fai mo pelofeta, a nisi ke fai mo tino talai te tala 'lei, a nisi ke fai mo faifeau, ka ko nisi ke fai mo faiakoga.

¹²Ne fai ne ia penei o fakatoka a tino o te Atua, mo te galuega faka-Kelisiano, o ati ake a te foitino o Keliso.

¹³Ko te mea ke oko atu tatou katoa, ki te tasi o tatou i te tou fakatuanaki mo te tou poto e uiga ki te Tama a te Atua; ke fai foki tatou mo tino ko ma'tua a mafaufau, ko te mea ke oko tatou ki te katoatoaga o te foitino katoa o Keliso.

¹⁴Ko tona uiga, ko se toe mafai tatou o fai mo tamaliki e peipei ne galu, io me agina foki ne matagi o akoakoga a tino fai togafiti, kola e takitaki 'se ne latou a tino i olotou togafiti ma'sei e maua.

¹⁵Ona ko tatou e fai'pati ki te mea tonu i te alofa, ke ola ake fakatasi tatou mo Keliso i so se feitu, me ko ia ko te ulu o mea katoa.

¹⁶Mai tena pule, ko 'soko tasi ei a vaega kesekese o te foitino, ka ko taofi mau te foitino katoa ne sokoga katoa o te foitino kola ne faite. Tela la, kafai e ga'lue katoa a vaega o te foitino e pela eiloa mo te lotou faitega, ko tona uiga ko tupu ake o ola te foitino katoa i te alofa.

¹⁷Ko te igoa o te Aliki e taku atu ei ne au a te mea nei, mo toku loto katoa ke fai ne koutou: sa ola e pela mo tino pouliuli, me se aoga olotou mafaufauga,

¹⁸kae 'nofo foki olotou mafaufau i te pouliga. E seai foki se lotou vaega o te ola ne tuku mai ne te Atua, i te mea ko oko eiloa i te valea mo te loto make'ke.

¹⁹Ko se iloa ne latou o tae'ma; e tuku atu olotou foitino mo amioga masei, kae fai katoa ne latou amioga fakatakalialia mo te loto se fia foki mai i ei.

²⁰E se tena te mea ne tauloto ne koutou e uiga ki a Keliso!

²¹Ko oti ne lagona 'lei ne koutou a ia, kae ona ko koutou ko ona soko, ne akoakogina foki koutou ki te mea tonu e i a Iesu.

²²Tela la, e 'tau o tiakina otou foitino mua, kola e fai ne latou a koutou ke ola i otou olaga mua. A te foitino mua ko fakamaseigina valevale ne ona manakoga masei.

²³E 'tau o fakafou otou loto mo otou mafaufau katoa.

²⁴E 'tau mo koutou o pei ki te foitino fou, tela ne faite i foliga o te Atua i te amiotonu mo te 'malu.

²⁵Tela la, ke se toe iai se loi. A tino katoa e 'tau o faipati ki olotou taina ki te mea tonu, i te mea ko tasi katoa tatou i te foitino o Keliso.

²⁶Kafai koe e kaitaua, ke se takitaki koe ne tou kaitaua ki te agasala; kae sa nofo mo tou kaitaua i te aso katoa.

²⁷Sa tukugina se avanoa mo te Tiapolo.

²⁸A te tino tela e masani o kaisoa, e 'tau mo ia o fakagata tena amioga tena, ka ko kamata o fakaputuputu mo tona olaga i fua o ana galuega 'lei e fai ne ona lima, ko te mea ke mafai ne ia o fesoasoani ki tino ma'tiva.

²⁹Sa faipati ki muna e 'mae ei a te loto o te sua tino. Fakaaoga eiloa a pati fesoasoani, ko vaega pati kola e aoga i te puti ake kae maua mai ei foki a mea 'lei, ko te mea ke fua mai au pati ki te 'lei, i tino kola ne fakalogologo ki a koe.

³⁰Sa faigina ke fanoanoa te Agaga Tapu o te Atua; i te Agaga ko te fakamailoga tena a te Atua i a koutou, e iloa ei i a koutou e a ia, kae se fakamailoga mo te Aso tela e fakasaoloto ei koutou ne te Atua.

³¹Tiaki a uiga fakapiau, a uiga faka'mae loto, mo uiga faka'itaita Fakagata te sona paka'laga valevale mo te pati masei! Fakagata foki a uiga katoa o te loto masei!

³²E 'tau mo koutou o fakatau alofa kae fakatau atafai; ke fakatau fakamagalo foki koutou, e pela eiloa mo te Atua ko oti ne fakamagalo ne ia koutou i a Keliso.