Read Te Tusi Tapu I Te Gana Tuvalu Lomiga Lua EFESO 5 Bible Online

EFESO 5 - Te Tusi Tapu I Te Gana Tuvalu Lomiga Lua bible

EFESO 5

¹Ona ko koutou ko fanau atafai a te Atua, e 'tau ke pela koutou mo ia.

²E 'tau o pule otou olaga ne te alofa, e pela mo Keliso ne alofa mai ki a tatou, ne tuku atu foki tona ola mo tatou, ke fai mo taulaga manogi 'lei, mo taulaga togiola e fiafia ki ei te Atua.

³Ona ko koutou ko tino o te Atua, tela la, se mea se 'tau ke faipatigina koutou e fina lalolagi, e amio se tonu mo te kaimanako.

⁴E se 'tau foki mo koutou o faipati ki pati masei, pati valea mo pati lailai. Kae e 'tau mo koutou o avatu te fakafetai ki te Atua.

⁵E iloa tonu eiloa ne koutou a te mea nei: e seai lele eiloa se tino e fina lalolagi, e amio se tonu mo te kaimanako e maua sona vaega i te Malo o Keliso mo te Atua. A te kaimanako ko te sua vaega o tapuakiga ki tupua.

⁶Ke se faka'segina koutou ne se tino ki ana muna valea; ona ko mea kona, e oko atu ei te fakasalaga a te Atua ki luga i tino kola e se faka'logo ki a ia.

⁷Tela la, sa fia saga lele eiloa ki vaega tino pena.

⁸A koutou ne 'nofo muamua i te pouliga, kae nei ko 'nofo koutou i te mainaga, i te mea ko oti koutou ne fai mo tino o te Aliki. Tela la, e 'tau koutou o ola e pela mo tino e 'nofo i te mainaga.

⁹Me i fua o te mainaga,[5] e maua i mea 'lei katoa, i te amiotonu mo mea tonu.

¹⁰Taumafai o tauloto ki mea kola e fiafia ki ei te Aliki.

¹¹Sa kau fakatasi mo tino kola e fai ne latou amioga se aoga, kola ko amioga o te pouliga. E 'tau o faka'sae mai katoa amioga penei ki te mainaga.

¹²Se mea mataga ki eiloa o faipati ki olotou amioga 'funa.

¹³Kae kafai ko faka'sae mai a mea katoa ki te mainaga, ko matea 'lei ei olotou foliga tonu;

¹⁴me ko so se mea e fakaasi 'lei mai ke matea, ko te mainaga foki tena.[6] Tena te pogai ne fai ake ei a te muna a te Tusi penei, “Ala mai, a koe tena e moe, Tu ki luga mai tino 'mate! Ka ko Keliso e maina i luga i a koe.”

¹⁵Mafaufau fakalei ki auala e 'tau o ola koutou i ei. Sa ola e pela mo ne tino valea, kae ke pela mo tino 'poto.

¹⁶Fakaaoga faka'lei so se avanoa e maua ne koutou, i te mea ko aso masei a aso nei.

¹⁷Sa fakavale'vale, kae taumafai o salasala ake, me se a te mea e loto ki ei te Aliki ke fai ne koutou.

¹⁸Ke mo a e ko'na koutou i te uaina, tela e fakamasei ne ia a koutou, ka ke 'fonu koutou i te Agaga.

¹⁹Ke fakatau faipati koutou ki muna o salamo, ki muna o pese, e pela foki ki muna o pese tapu; ke usu foki ne koutou a pese lotu mo salamo ki te Aliki mo otou loto tavae.

²⁰Ke fakafetai faeloa koutou ki te Atua te Tamana mo mea katoa, e alatu i te igoa o te tou Aliki ko Iesu Keliso.

²¹Ke fakalogo te sua tino ki te sua tino, ona ko te otou ava ki a Keliso.

²²A koutou e fafine, ke faka'logo koutou ki otou avaga, e pela eiloa mo te otou faka'logo ki te Aliki.

²³Me i te tagata e isi sena pule i luga i tena avaga, e pela eiloa mo Keliso e isi foki sena pule i te Ekalesia; ka ko Keliso eiloa te Fakaola o te Ekalesia, tela ko tona foitino.

²⁴Tela la, a fafine e 'tau o fakalogo fakamaoni ki olotou avaga, ke pela eiloa mo te Ekalesia e fakalogo ki a Keliso.

²⁵A koutou e tagata, ke a'lofa koutou ki otou avaga, e pela eiloa mo Keliso ne alofa ki te Ekalesia, kae tuku atu foki tona ola mō te Ekalesia.

²⁶Ne fai ne ia a te mea nei, ko te mea ke fakatapu ne ia a te Ekalesia mō te Atua i ana muna, i te otiga ne faka'ma ne ia ki te vai,

²⁷ko te mea ke tuku atu te Ekalesia ki a ia ko gali katoatoa, ko 'ma kae e seai ne ona masei, e se ilaila io me pakiakia, io me se a ake foki se isi ona pona.

²⁸A tagata e 'tau o a'lofa ki olotou avaga e pela eiloa mo te lotou atafai ki olotou foitino tonu. A te tagata e alofa ki tena avaga, e alofa foki ki a ia eiloa.

²⁹E seai lele eiloa se tino e ita ki tena foitino. E atafai 'lei ki ei, i te fagai ne ia kae fai faka'lei ki ei, e pela foki eiloa mo faiga a Keliso ki te Ekalesia;

³⁰me i a tatou ko vaega o tona foitino.

³¹E pela mo muna a te Tusi, “Tenei te pogai e tuku ei ne te tagata tona tamana mo tona matua, kae fakatasi mo tena avaga, ke fai laua mo foitino e tasi.”

³²E isi se mea tonu mo te tāua e fakaasi i te Tusi tenei, ka ko toku iloa i ei e fakauiga ki a Keliso mo te Ekalesia.

³³Kae e aoga foki a te muna tenei mo koutou: e 'tau mo tagata katoa o a'lofa ki olotou avaga, e pela eiloa mo te lotou alofa ki a latou eiloa, kae e 'tau foki i fafine o ava ki olotou avaga.