Read Te Tusi Tapu I Te Gana Tuvalu Lomiga Lua EFESO 6 Bible Online

EFESO 6 - Te Tusi Tapu I Te Gana Tuvalu Lomiga Lua bible

EFESO 6

¹A koutou e tamaliki, se tiute faka-Kelisiano o koutou,[7] o fakalogo ki otou matua, me tena eiloa te mea tonu e 'tau o fai ne koutou.

²“Ava ki tou tamana mo tou matua,” Tenei a te tulafono muamua e isi sona taui.

³“Ko te mea ke solosolo lei tou olaga, kae ke ola leva foki koe i te fenua.”

⁴A koutou e tamana, sa faka-itaitagina otou tamaliki, kae ke puti ake i te olaga 'lei mo akoakoga faka‐Kelisiano.

⁵A koutou e Pologa, fakalogo ki otou pule faka te foitino, i te agaga o te mataku mo te polepole; kae fai otou galuega mo te loto fiafia, e pela eiloa me tavini atu koutou ki a Keliso.

⁶Sa ga'lue malosi fua i mata otou pule, ko te mea ke fiafia atu latou ki a koutou, kae galue eiloa mo te fakamaoni e pela mo pologa a Keliso, i te fai o te loto o te Atua.

⁷Fai otou galuega e pela mo ne pologa e loto fia'fia o galue, e pela eiloa me tavini atu koutou ki te Aliki, kae se ki tino fua.

⁸Ke masaua ne koutou, me e taui atu ne te Aliki ki tino takitokotasi e tusa mo olotou galuega 'lei ne fai, me se pologa io me se saoloto e maua eiloa tena taui.

⁹A koutou e pule, ke pena foki otou faiga ki otou pologa; kae fakagata te fakasaua ki a latou. Ke masaua i a koutou mo otou pologa, e a te Pule e tokotasi tela i te lagi, tela e pau ana faiga ki tino katoa.

¹⁰Konei aku muna fakaoti, ke ati ake te otou malosi i te kau fakatasi mo te Aliki i tona mana malosi.

¹¹Ke fakaeke ki luga i a koutou a meatau katoa kola ne tuku atu ne te Atua, ko te mea ke mafai ne koutou o agai atu ki auala ma'sei o te Tiapolo.

¹²Me i a tatou e se taua mo tino, kae taua mo malosi masei faka te tiapolo i te lagi, ko pule, malo, mo te malosi o te lalolagi pouliuli i aso nei.

¹³Tela la, puke ki meatau katoa a te Atua, ko te mea ke mafai ne koutou o 'teke te oko mai o te fili, kae kafai e taua eiloa koutou ke oko ki te fakaotiga, e tumau eiloa koutou i te koga tena.

¹⁴Tela la, ke 'tu mautakitaki koutou: ke fai a te munatonu mo kafanoa e li fakatamilo i otou taugasulu; ke fakapei ki luga i otou foitino a te amiotonu ke fai mo otou ufifatafata,

¹⁵ka ke toka foki koutou o takutaku atu a te Tala 'Lei o te Filemu, ke pela mo ne taka mō otou vae.

¹⁶E 'tau o ave sale a te fakatuanaki i taimi katoa ke fai mo talita; ko te mea ke mafai ne koutou o tamate ki ei a matasana 'ka a te Tino Masei.

¹⁷Ke talia ne koutou a te fakaolataga ke fai mo otou pulou tau, mo te muna a te Atua ke fai mo pelu, e pela eiloa mo te tukuatuga ne te Agaga ki a koutou.

¹⁸Ke fai katoa ne koutou a mea konei i te 'talo, e fakatagi atu ei koutou ki te Atua mo tena fesoasoani. 'Talo i taimi katoa, e pela eiloa mo te takitakiga a te Agaga. Ona ko te feitu tenei, ke matapulapula koutou, kae sa loto vaivai; 'talo faeloa mo Kelisiano katoa.

¹⁹'Talo foki mo oku, ko te mea ke tuku mai ne te Atua te muna ki a au, i te 'tala ne ia a toku gutu o takutaku atu a mea 'funa o te tala 'lei,

²⁰i a au nei ko te sui o te Aliki ko saisaigina ki seni; ko te mea ke taku atu ne au a te tala 'lei mo te se poi, me e 'tau eiloa o fai pena ne au.

²¹ A Tukasi te tou taina pele, tela se tavini fakamaoni foki i te galuega a te Aliki, ka tala atu katoa ne ia a tala e uiga ki a au, ko te mea ke iloa ne koutou me pefea te fanofanoga o taku galuega i aso nei.

²²Tena te pogai ko uga atu ei ne au a ia ke fanatu ki a koutou, e fakailoa atu ki a koutou me pefea te fanofanoga o galuega katoa a matou, ke fakamalosi ei otou loto.

²³Ke tuku atu ne te Atua te Tamana mo te Aliki ko Iesu Keliso a te filemu mo te alofa, ki te kau taina kelisiano.

²⁴Ke i luga foki i a latou kola e alofa fakamaoni ki te tou Aliki ko Iesu Keliso, a te alofa tauanoa o te Atua.