Read Te Tusi Tapu I Te Gana Tuvalu Lomiga Lua FILIPI 2 Bible Online

FILIPI 2 - Te Tusi Tapu I Te Gana Tuvalu Lomiga Lua bible

FILIPI 2

¹E a, e mafai ne te otou ola i a Keliso o fai ne ia koutou ke malosi? E a, e fakamafanafanagina koutou ne tena alofa? E mafuta fakatasi koutou mo te Agaga? E lagona ne koutou te agaga o te alofa kaimalie mo te alofa fia fakatau fesoasoani?

²Ona ko te iai mo koutou a uiga konei, tela la, au e taumafai malosi atu ki a koutou, ke fakakatoatoa ne koutou toku fiafia i te tasi o te otou manatu, i te tasi o te otou alofa, i te tasi o otou agaga mo te mafaufau.

³Sa fai ne koutou ne mea e fakavae i luga i te manatu fakapito mō te 'lei o te tino, io me i luga i te fakamatamata; kae ke fakatau loto malalo koutou, ke mo a foki e manatu ake koutou me 'lei atu koutou i nisi tino.

⁴Kilokilo ki mea e 'lei ei nisi tino, kae se ko mea fua e 'lei ei koutou.

⁵A te faifaiga e 'tau o maua ne koutou, ko te faifaiga foki tela ne fai ne Keliso Iesu:

⁶E ui eiloa ne iai mo ia a te 'malu faka‐Atua, Ne seki saga ki tena tulaga Atua Se manatu tela ne seki fakataua ne ia.

⁷Mai luga i tona loto malie, ne tiakina katoatoa ne ia tona 'malu faka‐Atua, Kae fai mo tavini. Ne liu tino a ia, ne fanau foki a ia i foliga faka te foitino.

⁸Ne loto malalo a ia kae ne sasale foki i te auala o te fakalogo muna, ke oko eiloa ki tona mate, Tela ko tena mate i luga i te sataulo.

⁹Tenei te pogai ne siki ake ei a ia ne te Atua ki te koga e tafa sili i te maluga, Kae tuku atu ki a ia a te igoa tela e sili atu i igoa katoa.

¹⁰Tela la, ona ko te malu o te igoa o Iesu, Ko 'tau o totuli ki ei a tino katoa i te lagi, mo tino i te lalolagi, mo tino mai lalo ifo o te lalolagi,[2]

¹¹Kae ka takutonu ne tino katoa i a Iesu Keliso ko te Aliki, Mō te vikiga o te Atua te Tamana.

¹²Tenei la e taugasoa pele, e pela mo te otou faka'logo mai ki a au i aso ne fakatasi ei tatou, se mea e 'tau ke faka'logo mai koutou ki a au, ka koi galo au mai i a koutou. Ga'lue mo te mataku mo te polepole, ko te mea ke katoatoa te otou fakaolataga,

¹³me i te Atua e galue faeloa i loto i a koutou, o fai ne ia koutou ke talia o fai a mea kola e loto a ia ki ei.

¹⁴Ke fai a mea katoa e aunoa mo te muimui io me ko te kinau,

¹⁵ko te mea ke taku koutou ne tino 'lei kae 'ma, ko te fanau a te Atua e 'lei katoatoa i loto i te lalolagi fai mea pikopiko mo te kaiu. E 'tau mo koutou o maina atu ki a latou e pela mo ne fetu e fakamaina ne latou a te lagi,

¹⁶i te folafola atu ne koutou te muna o te ola. Kafai e fai ne koutou, ka maua a te pogai ka fakamatamata ei au i te Aso o Keliso ona ko koutou; me ko fakaasi mai ei i aku taumafaiga mo aku galuega e se maumau.

¹⁷Kafai e fakamaligi toku toto e pela mo se taulaga e ofo atu ki te Atua ona ko te otou fakatuanaki, e fiafia eiloa au ki ei, kae ke fia'fia fakatasi foki tatou i toku fiafia.

¹⁸Ke pena foki koutou, e 'tau mo koutou o fia'fia, kae ke fia'fia fakatasi tatou i te otou fiafiaga.

¹⁹Au e fakamoemoe ki te Aliki ko Iesu, ke mafai o uga atu ne au fakavave ki a koutou a Timoteo, ko te mea ke fiafia toku loto o fakalogo ki tala e uiga ki a koutou.

²⁰Me e seai ake se tino i konei e pau mo ia, i te fiafia o galue fakamaoni mo te otou 'lei.

²¹A tino katoa ko 'kilo faeloa ki mea e 'lei ei latou, ka ko se fia'fia ki a Iesu Keliso.

²²Ko oti ne iloa tonu ne koutou tena aoga, i te ga'lue fakatasi o maua i te tala 'lei, e pela eiloa mo se tamana mo tena tama.

²³Tela la, ko fakamoemoe au me ka uga atu ne au fakavave ki a koutou a Timoteo, manafai ko vave iloa ne au a fanofanoga o mea ka 'tupu ki toku ola;

²⁴kae fakatuaga eiloa au ki te Aliki, ke mafai o oko atu au ki a koutou i se taimi pili fua mai mua nei.

²⁵Ko oti ne fuafua ne au me se mea tau ki o uga atu ki a koutou a Epafeloti, tela ne tuku mai ne koutou ki a au ke fai mo otou sui, o fesoasoani ki a au i te taimi ne manako ei au ki se tino fesoasoani, ke galue kae kau fakatasi maua.

²⁶Ko oko eiloa i tona fia feiloai mo koutou katoa, ka ko oko foki eiloa i te se toka tona mafaufau i a koutou ne 'logo i a ia ne masaki.

²⁷E tonu eiloa me ne masaki, momea eiloa kae mate, kae ne alofa te Atua ki a ia; e se ki a ia fua kae pela foki ki a au, me ne fakasao ne ia au mai te fetaotaomaki o fanoanoaga.

²⁸Tela la, ko oko eiloa i toku manako ke na uga atu fakavave ne au a ia ki a koutou; ka fiafia koutou o toe 'kilo ki a ia, kae ka galo atu foki i ei a toku fanoanoa.

²⁹Ke talia ne koutou a ia mo te fiafia i te Aliki; kae fakaaloalo koutou ki tino pena,

³⁰me moi mate eiloa a ia ona ko te galuega a Keliso, kae ne tuku mai tona ola o fesoasoani ki a au, ko te mea ke tuku mai ne ia ki a au, a te fesoasoani tela ne seki mafai ne koutou o faka katoatoa mai ki a au.