Read Te Tusi Tapu I Te Gana Tuvalu Lomiga Lua FILIPI 4 Bible Online

FILIPI 4 - Te Tusi Tapu I Te Gana Tuvalu Lomiga Lua bible

FILIPI 4

¹Tela la e oku taina pele, kola e alofa au ki ei kae fia feiloai ki ei, ko koutou ko toku fiafiaga mo toku fou aliki, ke mautakitaki koutou i te Aliki.

²Au e fakamolemole ki a Evotia mo Sunetui, ke tasi o la loto i te Aliki.

³A koe foki e toku takaga fakamaoni, au e manako ke fesoasoani koe ki fafine konei; me ne ga'lue malosi matou o fakasalalau a te tala 'lei, fakatasi mo Kelemene mo nisi tino ake foki ne ga'lue matou, ko 'tu olotou igoa i te tusi o te ola.

⁴Au e loto ke fia'fia koutou, kae ke fia'fia faeloa i te Aliki; ko toe fai atu foki au, ke fia'fia koutou.

⁵Ke fakaasi atu otou uiga alofa ki tino. E vave oko mai te Aliki.

⁶Sa manava'se ki se mea, kae fakatagi atu ki te Atua i mea e ma'nako koutou ki ei, kae fakatagi eiloa i te agaga fakafetai.

⁷Ka ko te filemu o te Atua, tela e sili atu i mea e iloa ne tatou, ke tausi faka'lei ne ia otou loto mo otou mafaufau i a Keliso Iesu.

⁸Taina, konei aku toe muna, ke faka'fonu otou mafaufau ki mea kola e 'lei kae maua mai i ei a te vikiga, e pela mo mea konei: ko mea tonu, ko mea tāua, ko mea 'lei, ko mea 'ma, ko mea 'gali mo mea 'malu.

⁹Ke fai ne koutou a mea kola ko oti ne tauloto ne koutou mai i a au i aku pati mo faiga. Ke i a koutou a te Atua o te filemu.

¹⁰Ko oko eiloa i toku fiafia i te Aliki me ko toe fakatupu ake ne ia te otou loto alofa ki a au. Ko leva eiloa ne tupu i otou loto a te fia alofa ki a au. Ko leva eiloa ne tupu i otou loto a te fia a'lofa mai, ka ko te mea e seai se avanoa e fai ei.

¹¹E se faipati atu au penei ona ko au e manako ki ei, i a au ko oti ne akoako ke loto malie ki so se mea e maua ne au.

¹²Ko iloa ne au o ola e pela mo se tino mativa, ko iloa foki ne au o ola e pela mo se tino maumea. Ko oti au ne akoako ki mea konei, ke toka au mo se mea o mea konei i so se koga: me ko te makona io me ko te likiliki, me ko te mativa io me ko te maumea, e pau faeloa a mea katoa kona ki a au.

¹³E mafai ne au o fai a mea katoa kona, ona ko te fakamalosi mai o Keliso ki a au.

¹⁴Ka ko oko eiloa i te otou 'lei, i te mea ko fesoasoani mai koutou ki oku puapuaga.

¹⁵E iloa 'lei eiloa ne koutou e tino Filipi, me i taku tekaga mo Maketonia, i aso koi kamata ei au o folafola te Tala 'Lei, ko koe fua te Ekalesia ne fesoasoani mai ki a au; ko koe foki ne kau fakatasi mo au, i toku 'lei mo toku puapuagatia,

¹⁶kae fakalua te aumaiga ne koutou a mea e manako au ki ei i taku nofoga i Tesalonia.

¹⁷E se ko otou meaalofa e taua ki a au, ka ko te mea e taua ki a au ko te fia iloa ne au ne fua e taku'leia ei koutou.

¹⁸Ia, tenei te pepa fakamaoni o mea katoa ne aumai ne koutou ma aku, e fakaasi ei a te otou alofa fakamaoni. Ko maua ne au a mea katoa e manako au ki ei, ko meaalofa a koutou kola ne tuku mai ne Epafeloti ki a au. A meaalofa konei a koutou, ko pela me ne mea manogi 'lei ko tuku atu mō te Atua, se taulaga e gali kae fakafiafia ki te Atua.

¹⁹Ka ko toku Atua ka fakakatoatoa atu ne ia ki a koutou a mea katoa e ma'nako koutou ki ei, mai te lasi o te 'malu o tona maumea i a Keliso Iesu.

²⁰Ke i te tou Atua te Tamana te vikiga ki te se gata mai, ki te se gata mai eiloa. Amene.

²¹Ko 'moli atu oku alofaaga ki Kelisiano katoa kola e i a Keliso Iesu. Ko a'lofa atu foki ki a koutou a taina konei e fakatasi matou i konei.

²²Ko a'lofa atu katoa a kelisiano i konei ki a koutou, kae sili eiloa alofaaga o te kaukaiga o te Tupu o Loma mō koutou.

²³Ke i a koutou katoa a te alofa tauanoa o te Aliki ko Iesu Keliso.