Read Te Tusi Tapu I Te Gana Tuvalu Lomiga Lua KOLOSE 1 Bible Online

KOLOSE 1 - Te Tusi Tapu I Te Gana Tuvalu Lomiga Lua bible

KOLOSE 1

¹Ko au ko Paulo, ko te apositolo a Keliso Iesu i te loto o te Atua, ko maua tasi mo Timoteo te tou taina i konei.

²Ko tusi atu maua ki Kelisiano i Kolose, ko latou kona ko omotou taina fakamaoni i a Keliso. Ke i a koutou te alofa tauanoa mo te filemu mai i te Atua te tou Tamana.

³E fakafetai sale eiloa maua ki te Atua te Tamana o te tou Aliki ko Iesu Keliso, i taimi e 'talo ei maua mō koutou,

⁴i te mea ko oti ne lagona ne maua te otou fakatuanaki ki a Keliso Iesu, pela foki mo te otou alofa mō Kelisiano katoa,

⁵ona ko te fakamoemoega ne fakatoka mō koutou i te lagi. Ona ko te mea nei, ko oti ne lagona ne koutou muamua te munatonu o te tala 'lei,

⁶tela ne oko atu ki a koutou, e pela foki mo te lalolagi katoa, ko fua mai ka ko tupu foki, e pena foki eiloa ki a koutou, mai i te aso tela ne lagona ei ne koutou, kae e iloa foki ne koutou mo te fakamaoni te alofa tauanoa o te Atua,

⁷e pela eiloa mo te akoakoatuga ki a koutou ne Epafala se tavini a Keliso e fesoasoani ki a maua.

⁸Ne fakaasi mai foki ne ia ki a maua te otou alofa e alatu i te Agaga.

⁹Tela la, mai i te taimi ne lagona ei ne maua a tala e uiga ki a koutou, ne seki gata eiloa te ma 'talo mō koutou, e fakatagi atu ei maua ke fakafonu koutou i te iloa o te loto o te Atua, i poto katoa mo te iloa faka te Agaga,

¹⁰ke takitaki ei se olaga e aoga mō te Aliki, e fonu i mea e fakafiafia ki a ia, kae fua mai foki i galuega 'lei katoa, kae ke 'tupu ake foki koutou i te iloa 'lei o te Atua.

¹¹Ke fakamalosia koutou i malosi katoa e pela eiloa mo te malosi sili, ko te mea ke mafai ne koutou o kufaki a mea katoa mo te kolomaki i te fiafia.

¹²Ke fakafetai atu foki koutou ki te Tamana i te loto fiafia, me ko ia ne fai ne ia ke kau fakatasi tatou i te tofi o Kelisiano kola e 'nofo i te malo o te mainaga.

¹³Ko oti ne fakasaoloto ne ia tatou mai i te malo o te pouliga, kae ne fakamasiki atu ne ia tatou ki te malo o tena Tama Fagasele,

¹⁴tela e maua mai ei ne tatou i a ia te fakaolataga, ka ko fakamagalogina foki o'tou agasala.

¹⁵A Keliso ko te fakatusa o te Atua tela e se matea ki mata, ko te uluaki o mea katoa ne faite; e sili foki a ia i mea katoa ne faite.

¹⁶Me ne faite a mea katoa e alatu i a ia, ko mea i te lagi mo mea i te lalolagi, ko mea e matea mo mea se matea, me ko nofogaaliki io me ko aliki, me ko fonopule io me ko pule, ne fai a mea katoa e alatu i a ia kae mō ia foki.

¹⁷Ne muamua a ia i mea katoa, ka ko akutu fakatasi a mea katoa ki a ia.

¹⁸A ia ko te ulu o te foitino, ko te Ekalesia; a ia ko te kamataga, ko te uluaki ne toetu mai tino 'mate, ko te mea ke tulaga muamua a ia i mea katoa.

¹⁹Me ko loto te Atua ke nofo i loto i a Keliso a ona uiga katoatoa.

²⁰Ne fakalei ne te Atua a te lalolagi katoa ki a ia e alatu i tena Tama tela ne mate i luga i te sataulo. I te faiga tenei, ne fai ei ne te Atua te filemu i tona va mo mea katoa i te lagi mo te lalolagi.

²¹Ka ko koutou kola ne 'mao mo te Atua i aso mua, ne fai fili foki koutou ki a ia, i te fai ne koutou o amioga ma'sei.

²²Nei, ko oti ne faka'lei ne ia koutou i tona mate faka te foitino, ko te mea ke tuku atu koutou ki ona mua, i te olaga tapu, i te se takumaseigina, mo te 'ma mai te agasala,

²³manafai e tumau faeloa koutou i te fakatuanaki, i te fakavae mautakitaki, ko te mea ke se ma'taga koutou keatea mai te fakamoemoega o te tala 'lei tela ne lagona ne koutou, tela ko oti ne folafolagina ki tino katoa mai lalo o te lagi, tenei ko fai ei au, Paulo, mo tavini i ei.

²⁴Nei, au ko fiafia ona ko oku fi'taga faka te foitino mo koutou, me mai oku fi'taga kona, ko taumafai ei au o fakaoti a puapuaga o Keliso mō tona foitino, tela ko te Ekalesia,

²⁵tela ne fai ei au mo faifeau mō koutou ki te galuega a te Atua tela ne tuku mai ki a au, ko te mea ke iloa katoatoa ne koutou a te muna a te Atua,

²⁶tela ne 'funa i tausaga mo kautama e uke, kae nei ko fakaasi atu ki Kelisiano.

²⁷A tino o te Atua ne filifili ne ia o fakailoa atu ki tino o fenua fakaatea, a te lasi o te maukoloa o te 'malu o te mea 'funa tenei, tela ko Keliso tenei e ola i loto i a koutou. Ko tena uiga ko kau fakatasi tatou i te 'malu o te Atua.

²⁸Ko ia tena e folafola atu ne matou, e polopoloki atu ei matou, kae akoako foki matou ki tino katoa i poto katoa, ko te mea ke tuku atu ne matou a tino katoa kola ko ma'tua i a Keliso ki a ia.

²⁹Ona ko te mea tenei, e kausaki ei au mo te loto finafinau, o fakaaoga te malosi sili tela ne aumai ne Keliso, tenei e galue i loto i a au.