Read Te Tusi Tapu I Te Gana Tuvalu Lomiga Lua KOLOSE 2 Bible Online

KOLOSE 2 - Te Tusi Tapu I Te Gana Tuvalu Lomiga Lua bible

KOLOSE 2

¹Au e manako ke iloa ne koutou te lasi o toku galue malosi mō koutou, pela foki mo tino i Laotikaia, mo latou foki katoa kola e seki matea ne latou oku foliga,

²ko te mea ke fakamalosigina olotou loto, kae ke fusi tasi foki olotou loto i te alofa, ke maua foki ne latou a koloa o te poto mo te iloa 'lei o te mea 'funa a te Atua, ko Keliso,[1]

³a ia ko te ki tela e tala ei te koloa tāua o te poto mo te iloa 'lei o te Atua.

⁴Ko taku atu ne au a te mea nei, ko te mea ke seai se tino e fakavalea ne ia koutou ki ana pati fakakolekole, e tusa eiloa me pefea te gali mo te logo'lei, ke mo a ma faka'segina koutou.

⁵E ui eiloa i toku se nofo i a koutou i te foitino, ka ko toku loto e fakatasi eiloa mo koutou, kae fiafia eiloa au o onoono atu i te otou nofonofo 'lei, mo te mautakitaki o te otou fakatuanaki i a Keliso.

⁶Ona ko te mea ko oti ne talia ne koutou a Keliso Iesu ko te Aliki, tela la, ke ola koutou i a ia.

⁷Ke 'mau otou aka, ke putiputi ake foki koutou i a ia, ke ati ake foki koutou i te fakatuanaki, e pela eiloa mo te mea ne akoako atu ki a koutou, ke 'fonu foki koutou i te loto fakafetai.

⁸Ke onoono fakalei koutou, ke mo a e vau se tino o fakapologa koutou i te poto mo takolekolega se aoga, kola e fakavae i munatuku a tino, io me ko agaga pule muamua o te lalolagi, kae se fakavae i a Keliso,

⁹tela e nofo i a ia a te katoatoaga o te natula faka te Atua,

¹⁰ka ko fakakatoatoagina foki te otou olaga i a ia, ko te ulu o aliki mo pule katoa.

¹¹Ne pilitome foki koutou i tona igoa, ko tona uiga ko te pilitome e seki fai ki lima. Tenei te pilitome faka te Agaga, tela ko tena uiga ko fakasaoloto tatou ne Keliso mai manakoga faka te foitino.

¹²Ne tanu fakatasi koutou mo ia i te papatisoga, ne toetu fakatasi ake foki koutou mo ia i te fakatuanaki i galuega mana a te Atua, tela ko ia ne fakatu ake ne ia a Iesu mai tino 'mate.

¹³A koutou ne 'mate faka te agaga ona ko otou agasala. E se gata i ei, ka ko koutou foki ne tino o fenua fakaatea, kola e se aofia i te Tulafono. Kae ne aumai ne te Atua koutou ke ola fakatasi mo Keliso i te Atua. Ko fakamagalo foki ne te Atua o'tou agasala.

¹⁴Ko oti ne 'solo ne ia te tala masei o o'tou kaitalafu, pela foki mo tulafono kola e saisaitia ei tatou, kae fakatautau ne ia i te sataulo, tela ko te sataulo o Iesu.

¹⁵Mai te sataulo o Keliso, ko fakasaoloto ei a ia ne ia mai te pule mo malosi fakasatani.[2] Ne fai ne ia se fakaasiga fakaofoofogina, ki tino valevale i te takimaiga o latou mai te nofo pologa ki tena manumalo.

¹⁶Tela la, ke seai se tino e fakamasino atu ki a koutou i feitu e uiga ki meakai mo meainu, io me ko te feitu ki aso fakamanatu, mo aso fiafia o te masina sae io me ko te Sapati.

¹⁷A mea nei ne ata fua o mea ka oko mai, ka ko te mea tonu ko Keliso.

¹⁸Ke seai se tino e fakaseaoga ne ia koutou, i te fia sili ona ko fakaasiga taua ne maua ne ia, mo te loto malalo fakaloiloi mo te ifo ki agelu. A te tino pena e 'fete valea fua tona mafaufau i manatu faka te foitino,

¹⁹kae se puke mautakitaki ki a Keliso, tela ko te ulu o te foitino. Mai te pule a Keliso ko 'soko fakatasi mo te olaola 'lei sokoga mo totoga o te foitino, e pela eiloa mo te mea e loto ki ei te Atua.

²⁰Kafai ne 'mate koutou fakatasi mo Keliso, ka ko fakasaoloto foki koutou mai agaga pule o te lalolagi; ai a la e ola ei koutou, i se olaga e foliga mai pela i a koutou koi fai eiloa mo tino o te lalolagi? Ai a e faka'logo ei koutou ki olotou fakatonuga konei?

²¹“Sa puke ki ei o kai, sa tofo o kai ki ei, sa puke o kai ki ei.”

²²E se aoga katoa a tulafono konei, manafai e fakaaoga. A tulafono me ko akoakoga konei, ne mea fua ne fai ne tino.

²³A mea konei: te fai malo ke tapuaki atu ki agelu, te loto malalo fakaloiloi, te fakafita o te foitino, e foliga mai pela me maua mai i ei se 'lei, ka ko te fakalavelave e se mafai ne latou o 'teke atu manakoga agasala o te foitino.