Read Te Tusi Tapu I Te Gana Tuvalu Lomiga Lua KOLOSE 4 Bible Online

KOLOSE 4 - Te Tusi Tapu I Te Gana Tuvalu Lomiga Lua bible

KOLOSE 4

¹Pule, fai faka'lei kae a'lofa ki otou pologa, me e iloa eiloa ne koutou me isi se otou Pule i te lagi.

²Ke mautakitaki koutou i te olaga 'talo, ke tumau koutou i ei mo te loto fakafetai ki te Atua,

³kae 'talo foki mo matou, ko te mea ke 'tala ne te Atua mo matou se mataloa mō te muna, ko fakaasi atu ei te mea 'funa a Keliso, tela ko ala ei au o fale puipui,

⁴ko te mea ke fakamalamalama atu ne au, manafai e isi se mea 'tau e faipati atu ei au.

⁵Ke 'poto koutou mo otou faiga ki tino se talitonu, ke fakaaoga 'tau te ukega o taimi.

⁶Ke isi se alofa i otou pati e fai sale, ke faka'kona foki ki te masina ke tumau tena aoga, ko te mea ke iloa ne koutou o tali atu ki so se tino e fesili mai ki a koutou.

⁷ Ka taku atu ne Tukasi ki a koutou a mea katoa e uiga ki aku galuega, a ia se taina fagasele kae se faifeau fakamaoni, kae se tavini foki i te Aliki.

⁸Ne uga atu a ia ne au ki a koutou mō te feitu eiloa tenei, ko te mea ke iloa ne koutou me pefea te motou nofonofoga, ke fakamalosia ei foki otou loto.

⁹Ka olo atu mo ia a Onosemu se taina fakamaoni kae fagasele, tela se tino foki mai i a koutou, ka tala atu ne laua ki a koutou a mea katoa ne 'tupu i konei.

¹⁰Ko alofa atu toku taina pagota ko Alitako ki a koutou, pela foki mo Maleko te fakataina o Panapa. Ko oti ne maua ne koutou nisi fakamatalaga e uiga ki a ia, ke talia ne koutou manafai e fanatu ki a koutou,

¹¹pela foki mo Iesu tela e igoa ki a Iuso. Ko latou fua konei ne pilitome e ga'lue mo au mō te Malo o te Atua, kae ne tino ne fesoasoani malosi mai ki a au.

¹²Ko alofa atu foki a Epafala ki a koutou, se tino mai i a koutou, se tavini a Keliso Iesu; kae se puli faeloa koutou i ana 'talo, ko te mea ke tumau koutou i te fai mo tino ma'tua, kae tuku atu foki katoatoa otou loto o fai te loto o te Atua.

¹³Me e molimau au e uiga ki a ia, me ko oti a ia ne galue malosi mō koutou, pela foki mo taina kola i Laotikaia mo Hialapoli.

¹⁴Ko alofa atu foki a Luka te tokita fagasele, pela foki mo Tema.

¹⁵'Moli atu omotou alofaaga ki Kelisiano i Laotikaia, pela foki mo Numefa mo te Ekalesia i tona fale.

¹⁶Kafai ko oti ne faitau ne koutou a te tusi nei, faitau atu foki ki te Ekalesia i Laotikaia, kae ke masaua foki o fai'tau koutou ki te tusi mai Laotikaia.

¹⁷Fai atu ki a Akepasi penei, “Ke fai ne koe a te galuega tela ne maua ne koe mai i te Aliki.”

¹⁸Ko au ko Paulo: ko tusi atu ne au alofaaga konei ki taku tusi lima. Ke masaua mai au ne koutou i au tenei e fale puipui. Ke i a koutou te alofa tauanoa.