Read Te Tusi Tapu I Te Gana Tuvalu Lomiga Lua 1 TESALONIA 3 Bible Online

1 TESALONIA 3 - Te Tusi Tapu I Te Gana Tuvalu Lomiga Lua bible

1 TESALONIA 3

¹Tela la, ko se mafai eiloa ne matou o toe kufaki, ko oti ne fuafua ne matou ke 'nofo eiloa matou i Atenai,

²kae uga atu ne matou a Timoteo te motou taina ke fanatu, tela e galue tasi matou mō te Atua, i te talai atu ne matou a te Tala 'Lei e uiga ki a Keliso. Ko uga atu ne matou a ia o fakamalosi atu kae o fesoasoani atu foki ki te otou fakatuanaki,

³ko te mea ke seai se tino o koutou e toe foki ki tua ona ko fakasauaga konei. E iloa 'lei eiloa ne koutou i fakasauaga konei se vaega o te loto o te Atua mo tatou.

⁴I te taimi koi fakatasi ei tatou, ko leva ne taku atu ne matou i a matou ka fakasauagina; kae pela mo te mea e iloa 'lei ne koutou, tena eiloa a te mea tonu ne tupu.

⁵Tena te pogai ne uga atu ei ne au a Timoteo. Ko se mafai o toe kufaki ne au, tena uga atu ei ne au ke maua se tala e uiga ki te otou fakatuanaki. I a au e mataku manafai ko oti ne fakaosoosogina koutou ne te tino fakaosooso, tela ka se aoga ei te motou galuega katoa.

⁶Ko oti nei ne foki mai a Timoteo mai i a koutou, ko oti foki ne aumai ne ia te tala fiafia e uiga ki te otou fakatuanaki mo te otou alofa. Ne taku mai foki ne ia i a koutou e masausau mai eiloa ki a matou, kae ma'nako foki koutou ke fetaui tatou, e pela eiloa mo te motou fia fetaui ki a koutou.

⁷Tela la e taina, me pefea eiloa te motou fakapuapuagatia mo te fakasauagina, kae loto ma'losi eiloa matou ona ko tala e uiga ki te otou fakatuanaki,

⁸kae nei e ola eiloa matou manafai e tumau koutou i te Aliki.

⁹Nei, ko mafai ne matou o siki te fakafetai ki te Atua mo koutou. E fakafetai matou ki a ia mo te fiafia ko maua ne matou i mua o te tou Atua ona ko koutou.

¹⁰I po mo ao e fakatagi faeloa matou ki a ia mo omotou loto katoa, ke mafai ne ia o fakaavanoa se taimi ke fakafeagai ei tatou; ke fakakatoatoa atu foki a mea kola e se katoa i te otou fakatuanaki.

¹¹Ke fakatoka ne te Atua te tou Tamana, mo te tou Aliki ko Iesu, a te auala e oko atu ei matou ki a koutou!

¹²Ke fakatupu foki ne te Aliki a te loto fakatau a'lofa i a koutou, ke pena foki ki tino katoa, e pela eiloa mo te motou alofa atu ki a koutou.

¹³Tenei a te auala e fakamalosi ei ne ia otou loto, a koutou foki ka 'lei katoatoa, kae tapu foki koutou i mua o te Atua te tou Tamana, manafai ko foki mai a te tou Aliki ko Iesu mo latou katoa kola e kau i a ia.[2]