Read Te Tusi Tapu I Te Gana Tuvalu Lomiga Lua 1 TESALONIA 5 Bible Online

1 TESALONIA 5 - Te Tusi Tapu I Te Gana Tuvalu Lomiga Lua bible

1 TESALONIA 5

¹Taina, e se 'tau o tusi atu ki a koutou a taimi mo aso e 'tupu ei a mea konei.

²Me e iloa 'lei eiloa ne koutou i te Aso o te Aliki e vau e pela mo se tino kaisoa i te po.

³Kafai e fai ake pela tino, “Ko tokagamalie a mea katoa mo te manuia,” ko te mea eiloa ko oko mai te fakamaseigina ki ei! E se mafai o 'sao me oko mai eiloa. E fakatusa eiloa tena 'mae ki te fafine ka fanau.

⁴Taina, a koutou nei e se 'nofo i te pouliga, ka ko te mainaga. Tela la, ke se puketu atu koutou ne te Aso e pela mo se tino kaisoa.

⁵A koutou katoa ko tino o te mainaga, ko tino foki o te ao. A tatou e se ne tino o te po io me ko te pouliga.

⁶Tela la, e se 'tau mo tatou o 'moe e pela mo nisi tino; e 'tau mo tatou o matala kae toka.

⁷Ko te po e 'moe ei a tino, ko te po foki e ko'na ei a tino.

⁸Ka ko tatou ne tino o te ao; tela la, e 'tau mo tatou o toka. E 'tau foki mo tatou o fakapei ki otou foitino a te fakatuanaki mo te alofa ke fai mo otou ufifatafata, ka ko te tou fakamoemoega mo te fakaolataga ke fai mo puloutau.

⁹Ne seki filifili tatou ne te Atua ke puapuagatia i tena fakasalaga, ka ke maua ne tatou a te fakaolataga e alatu i te tou Aliki ko Iesu Keliso,

¹⁰tela ne mate mō tatou, ko te mea ke ola fakatasi tatou mo ia, faitalia me koi ola tatou io me ko 'mate i te taimi e oko mai ei, kae ola fakatasi eiloa tatou mo ia.

¹¹Ona ko te feitu tenei, ke fakamalosi atu te sua tino ki te sua tino, ke fesoasoani foki te sua tino ki te sua tino, e pela eiloa mo te mea e fai ne koutou i aso nei.

¹²Taina, a matou e fakamolemole atu ki a koutou, ke ava koutou ki te kau faigaluega a te Ekalesia, ko latou kona ne filifilia ne te Aliki o takitaki kae fakatonu ki a koutou.

¹³Atafai ki ei i te agaga o te ava lasi mo te alofa, ona ko te galuega e fai ne latou. Ke 'nofo filemu koutou.

¹⁴Taina, e tauanau atu matou o fakatonu a tino e ta'fao valea, o fakaloto malosi atu a tino matama'taku, o fesoasoani ki tino vaivai, kae ke loto kufaki foki ki tino katoa.

¹⁵Ke mo a foki e taui atu ne se tino te masei ki te masei, kae ke fai mo otou fakamoemoega i taimi katoa a te fai mea 'lei o te sua tino ki te sua tino, pela foki ki tino katoa.

¹⁶Ke loto fia'fia faeloa koutou,

¹⁷kae 'talo foki i taimi katoa,

¹⁸ke loto fakafetai foki koutou ki mea katoa. Tenei te mea e manako ki ei te Atua mai i a koutou, i te otou olaga i a Keliso Iesu.

¹⁹Sa 'teke ne koutou a galuega a te Agaga Tapu i loto i a koutou.

²⁰Sa taumafai o taku fakaseaoga ne koutou a muna fakapelofeta.

²¹E 'tau o iloa ne koutou te kesekesega o te masei mo te 'lei, kae puke mautakitaki ki te mea 'lei,

²²kae 'teke ki mea ma'sei katoa.

²³A te Atua tela e aumai ne ia a te filemu, ke faka'ma katoatoa ne ia koutou mō ia, ke tausi foki ne ia otou agaga katoa, loto mo foitino mai mea ma'sei, i te taimi e foki mai ei a te Aliki ko Iesu Keliso.

²⁴A ia tela e kalaga atu ki a koutou, ko ia eiloa tena e fai ne ia, me fakamaoni eiloa a ia!

²⁵Taina, ke 'talo foki koutou mō matou.

²⁶Fakatalofa ki taina katoa i te sogi tapu.

²⁷Ko fakatagi atu au i te pule a te Aliki, ke faitau ne koutou a te tusi tenei ki taina katoa.

²⁸Ke i a koutou a te alofa tauanoa o te tou Aliki ko Iesu Keliso.