Read Te Tusi Tapu I Te Gana Tuvalu Lomiga Lua IOSUA 1 Bible Online

IOSUA 1 - Te Tusi Tapu I Te Gana Tuvalu Lomiga Lua bible

IOSUA 1

¹I te mateatuga o Mose, te tavini a te Aliki, ne faipati atu ei a te Aliki ki a Iosua te tama a Nuno.

²Muna a ia penei, “A taku tavini ko Mose ko mate. Fakatoka nei koutou o olo atu ki te sua feitu o te Vaitafe o Iolitana, ki te fenua tela ka tuku atu ne au mo koutou.

³ E pela mo aku muna ki a Mose, ko oti eiloa ne tuku atu ne au a te fenua katoa tena ka olo atu koutou ki ei.

⁴A tuakoi o te otou fenua ka vau mai te vao i saute ke oko ki Mauga o Lepanona i matu; mai te Vaitafe o Eufilate i te saegala, o fano i loto i te fenua o tino Heti, ke oko ki te Tai Metitilani i te togala.

⁵ Iosua, e seai eiloa se malo e mafai ne ia o fakatakavale koe i aso koi ola ei koe. Au e fakatasi atu ki a koe, e pela mo au e fakatasi sale ki a Mose. Au ka fakatasi faeloa ki a koe; ka se tiakina eiloa ne au a koe.

⁶ A koe ke loto malosi kae fakatuanaki, me i a koe ka fai mo takitaki o tino Isalaelu i te taimi e nofo ei latou i te fenua tenei ne tauto au ke tuku ki olotou tupuga.

⁷A koe ke loto malosi kae fakatuanaki; kae masaua o tautali i Tulafono katoa kola ne tuku atu ne taku tavini ko Mose. Sa soli eiloa ne koe se vaega i ei, kae ka manumalo faeloa koe i so se koga e fano koe ki ei.

⁸Masaua ke faitau faeloa te tusi o te Tulafono i taimi e fai ei otou tapuakiga. Masaua o tauloto fakalei i ao mo po, kae taumafai o tautali i mea katoa e tusi i ei. Kafai e fai ne koe te mea tena, ko koe ka maumea kae manuia.

⁹Masaua i a koe ne fakatonu ne au ke loto malosi kae fakatuanaki! Sa mataku io me e loto vaivai, me i a au, te Aliki tou Atua e fakatasi atu faeloa ki a koe i so se koga e fano koe ki ei.”

¹⁰Tena ne fakatonu atu ei ne Iosua a takitaki

¹¹ke olo o talai atu ki tino penei, “Fakatoka ne meakai ma koutou, me i a koutou ka malaga atu i aso e tolu ki te sua feitu o te Vaitafe o Iolitana o puke te fenua tela ka tuku atu ne te Aliki te otou Atua mo koutou.”

¹² Ne fai atu a Iosua ki te matakaiga o Leupena mo te matakaiga o Kato, mo te afā o te matakaiga o Manase penei,

¹³“Masaua a pati a Mose te tavini a te Aliki ne fai atu ki a koutou, me ka tuku atu ne te Aliki te otou Atua a te lau fenua tenei i te feitu ki te saegala o te Iolitana ke fai mo otou tofi.

¹⁴A otou avaga mo otou tamaliki mo otou pulumakau ka nofo i konei, ka ko otou sotia, kola ko toka mo te taua, ka olo atu i mua o tino Isalaelu katoa, o fesoasoani ki a latou

¹⁵ke oko ki te taimi ko puke ei ne latou a te fenua i te feitu ki te togala o te Iolitana, tela ne tuku mai ne te Aliki te otou Atua mo latou. Kafai ko toka katoa a mea ne fai ne te Aliki, ko foki mai ei koutou o nofo i te otou fenua tenei i te feitu ki te saegala o te Iolitana, tela ne tuku atu ne Mose, te tavini a te Aliki.”

¹⁶Ne tali mai latou ki a Iosua penei, “Ka fai eiloa ne matou a mea kona e fai mai ne koe. Kae ka olo eiloa matou ki so se koga e fai mai koe ke olo matou ki ei.

¹⁷A matou ka faka'logo eiloa ki a koe, e pela mo matou e faka'logo sale ki a Mose. A te Aliki tou Atua ke fakatasi atu ki a koe e pela mo ia e fakatasi sale ki a Mose!

¹⁸So se tino e teke atu ki tau pule io me e se fakalogo ki au fakatonuga e tau o tamate. A koe ke loto malosi kae fakatuanaki!”