Read Te Tusi Tapu I Te Gana Tuvalu Lomiga Lua IOSUA 11 Bible Online

IOSUA 11 - Te Tusi Tapu I Te Gana Tuvalu Lomiga Lua bible

IOSUA 11

¹I te Iogoga o te Tupu o Hasola ko Iapino i te manumalo o Isalaelu, ne ave ei tena fekau ki te Tupu o Matoni ko Iopapu, ki tupu o Similona mo Akasafo,

²pela foki ki tupu i te fenua mauga i matu, mo tupu i te Vanu o Iolitana i te feitu ki saute o te Vai o Kalilaia, mo tupu o fa'kai i lalo o mauga, mo tupu o fa'kai i te matafaga, e pili ki Toa.

³Ne ave foki tena fekau ki tino Kanana i feitu e lua o te Iolitana, ki tino Amoli, tino Heti, tino Pelise, mo tino lepuse i te fenua maugā, e pela foki mo tino Hivi kola e nofo i lalo o te Mauga o Helemoni i te fenua o Mesepa.

⁴Ne o'mai katoa latou kona mo olotou kautau ko pela eiloa mo one o te matafaga i te tokouke. E uke foki olotou kaliota mo solofanua.

⁵Ne kau fakatasi a tupu katoa kona, tela ne olo atu ei o faka'tu olotou faleie i te vai o Meloma, o fakatoka o taua ki tino Isalaelu.

⁶Muna a te Aliki ki a Iosua, “Sa mataku i a latou. I te taimi penei ma taeao, ka ko palele latou ne ta ne au. A te mea ka fai ne koutou ko te fakaseaogaga o olotou solofanua kae sunu olotou kaliota.”

⁷Tena ne olo fakapulele atu ei a Iosua mo te kautau katoa o taua atu ki a latou i te vai o Meloma.

⁸Ne fai ne te Aliki a Isalaelu ke manumalo tena ne afuli atu eiloa latou ke oko ki Miselefota Maima mo Saitonu i matu, kae ki te feitu ki te saegala o te Vanu o Mesepa. Ne taua eiloa te kautau, ke oko eiloa ki te taimi ko seai ei se tino o te fili e toe.

⁹Tena, ne fai ei ne Iosua te mea tela ne fakatonu atu ne te Aliki: ne fakaseaoga ne ia olotou solofanua kae sunu olotou kaliota.

¹⁰Ne foki atu ei Iosua mo tena kau, puke a te fa'kai o Hasola kae tamate tena tupu. I te taimi tena, a Hasola ko te toe malo malosi eiloa i malo katoa i kona.

¹¹Ne tamate ne latou a tino katoa i kona, e seai eiloa se tino ne fakasao, kae sunu foki ne latou te fa'kai.

¹²Ne fakatakavale ne Iosua a fa'kai katoa konei mo olotou tupu, kae tamate a tino katoa i ei, e pela eiloa mo te fakatonuga a Mose, te tavini a te Atua.

¹³Ne seki sunu ne tino Isalaelu a fa'kai kola e faite i luga i koga malugaluga, na ko Hasola fua, tela ne sunu ne Iosua.

¹⁴Ne puke ne tino Isalaelu ma latou a pulumakau mo mea taua i fa'kai kona, ka ko tino ne tamate katoa ne latou, seai se tino ne fakasao.

¹⁵A te Aliki ne tuku ana fakatonuga ki tena tavini ko Mose, kae ne toetuku atu ne Mose ki a Iosua, kae ne fakataunu ne Iosua. Ne fai katoa ne ia a mea ne fakatonu mai ne te Aliki ki a Mose.

¹⁶Ne fakatakavale ne Iosua te fenua katoa — ko fenua i mauga mo fenua i lalo o mauga, i matu mo saute, ko te kogā fenua katoa o Kosena, mo te fenua vela i tena feitu ki saute, pela foki te Vanu o Iolitana.

¹⁷A te kogā fenua tena e vau mai te Mauga o Halaka i saute, pili ki Etoma, ke oko ki Paalakato i matu, i te Vanu o Lepanona i te feitu ki saute o te Mauga o Helemoni. E tai leva eiloa te tauaga a Iosua mo tupu o te koga fenua tenei, kae ne fakatakavale eiloa ne ia latou, tamate katoa ei ne ia.

¹⁹E tasi eiloa te fa'kai ne fakataugasoa mo Isalaelu, ko Kipeona, tela e isi ne tino Hivi e nofo i ei. A nisi fa'kai katoa ne puke i te taua.

²⁰ Ne fai ne te Aliki a tino kona ke fia taua ki tino Isalaelu, ko te mea ke ta fakapalele eiloa latou. Tena te mea ne fakatonu ne te Aliki ki a Mose.

²¹I te taimi tenei, a Iosua ne fano o 'ta fakapalele a te gafa o tino mafi kola e fakaigoa ko tino Anaki, kola e nofo i fenua i mauga — i Hepelona, i Tipeli, i Anapa, pela foki i fenua maugā o Iuta i Isalaelu. Ne ta fakapalele eiloa ne Iosua, pela foki olotou fa'kai.

²²E seai eiloa ne tino Anaki ne toe i te fenua o Isalaelu; e isi ne nai tino o latou e toe i kasa, kata mo Asetota.

²³Ne puke ne Iosua te fenua kātoa, e pela eiloa mo te fakatonuga a te Aliki ki a Mose. Ne tuku ne Iosua mō tino Isalaelu, kae vaevae ne ia i vaega, e takitasi i matakaiga takitasi. Tena, ne ma'nava ei a tino Isalaelu mai i te taua.