Read Te Tusi Tapu I Te Gana Tuvalu Lomiga Lua IOSUA 17 Bible Online

IOSUA 17 - Te Tusi Tapu I Te Gana Tuvalu Lomiga Lua bible

IOSUA 17

¹E isi foki se vaega o te fenua i te togala o te Iolitana ne tuku atu ki nisi kaiga kola ne tupu mai i a Manase, te tama matua a losefa. A Makila, te tamana o Kileata, ko te toekimua a Manase kae se sotia takutakua foki, tela la, a fa'kai o Kileata mo Pasana, i te feitu ki te saegala o te Iolitana, ne tuku mo ia.

²A te vaega i te feitu ki te togala o te Iolitana ne tuku ki te toega o kaiga takitasi i te matakaiga o Manase: ko Apiesa, Heleka, Asilielu, Sekema, Hefa, mo Semita. A latou kona ko tagata kola ne tupu mai i te gafa o Manase te tama a losefa. A latou ne ulu o kaiga takitasi.

³A Selofeata, te tama tagata a Hefa, Hefa te tama tagata a Kileata, Kileata te tama tagata a Makila, Makila te tama tagata a Manase, e seai ne ana tama tagata kae ne tama fafine fua. A igoa o tama fafine konei ko Mahala, Noa, Hokala, Milika mo Tilesa.

⁴ Ne olo atu latou kona ki a Eleasalo te faitaulaga, mo Iosua te tama a Nuno, mo takitaki o te fenua, kae fai atu penei, “A te Aliki ne fakatonu ne ia a Mose ke aumai se vaega mo matou penei foki omotou kaiga tagata i te fenua tenei.” Tena la, e pela mo te fakatonuga a te Aliki, ne avatu eiloa se vaega mo latou e pela foki olotou kaiga tagata.

⁵Tena te mea e maua ei ne Manase e sefulu vaega e aofia ei a fa'kai o Kileata mo Pasana i te feitu ki te saegala o te Iolitana,

⁶me i tagata mo fafine i te matakaiga tena e maua katoa olotou vaega. A te fenua o Kileata ne tuku mō te toega o te matakaiga o Manase.

⁷A te laukele o Manase e vau mai Asela ki Mikimetata i te feitu ki te saegala o Sekema. Mai i kona, ko fanatu ei te tuakoi faka saute, tena ko aofia ei i loto i ei a tino o Enitapua.

⁸A te fenua i tafatafa o Tapua e o Manase, ka ko te fa'kai o Tapua, tela e tu i luga i te tuakoi, e o tino Efalaima.

⁹Tena, te tuakoi e fanatu eiloa mai kona, o fano ki lalo i te vaitafe foliki o Kana. A fa'kai 'lasi i te feitu ki saute o te vaitafe foliki tena e o tino Efalaima, e ui eiloa e tu i loto i te tuakoi o Manase. A te tuakoi o Manase e fano i te feitu ki matu o te vaitafe foliki tena, kae gata mai i te Tai Metitilani.

¹⁰A Efalaima i te feitu ki saute, ka ko Manase i te feitu ki matu, ka ko te Tai Metitilani ko te tuakoi o laua ki te togala. A te vaega o te matakaiga o Asela e tu ki matu togala, ka ko Isakala ki matu saegala.

¹¹Konei a fa'kai o Manase kola e tu i loto i te laukele o Isakala mo Asela: ko Peta Sana mo Ipeleamo, fakatasi mo fa'kai foliki i o la tafatafa, pela foki a Toa tela e tu i te matafaga,[10] Enetolo, Tanaka, Mekito, mo fa'kai fo'liki i olotou tafatafa.

¹² Ne seki mafai ne tino o te matakaiga o Manase o afuli a tino Kanana kola e nofo i fa'kai kona, tela la, ne nofo mai eiloa i koga ne nofo ei latou.

¹³Ke oko foki eiloa ki te taimi ko malosi ei te malo o Isalaelu, ne seki afuli eiloa ne latou a tino Kanana katoa, kae ne fai ne latou ke galue mō latou.

¹⁴Ne fai atu a tino mai i te gafa o losefa ki a Iosua penei, “Ai a e tasi fua ei te vaega o te fenua ne aumai mo matou? A matou e tokouke me i matou ne fakamanuia ne te Aliki.”

¹⁵Ne tali atu Iosua, “Kafai ko se lava koutou i te fenua maugā me ko to foliki mo koutou, olo la o vele a vao kona i te fenua o tino Pelise mo tino Lefaima mo otou nofo.”

¹⁶Ne toe fai mai latou penei, “A te fenua maugā ko to foliki mo matou, ka ko tino Kanana kona i kogā koga laugatasi e isi ne kaliota fiti a latou; ko tino e nofo i Peta Sana mo fa'kai foliki i ona tafatafa mo tino i te Vanu o leseleelu.”

¹⁷Muna a Iosua ki matakaiga o Efalaima mo Manase ki te Togala, “A koutou e tokouke ki eiloa, kae ma'losi. E toe isi aka foki eiloa ne vaega e maua ne koutou.

¹⁸A te fenua mauga ka fai mo koutou. Tiga eiloa se vao te koga tena, kae ke vele ne koutou mo koutou, mai te mata e tasi ki te sua mata. Ka ko tino Kanana ka afuli ne koutou keatea, tiga eiloa e isi ne lotou kaliota fiti kae ne tino malosi foki.”