Read Te Tusi Tapu I Te Gana Tuvalu Lomiga Lua IOSUA 2 Bible Online

IOSUA 2 - Te Tusi Tapu I Te Gana Tuvalu Lomiga Lua bible

IOSUA 2

¹ Ne uga ne Iosua e tokolua tino lamalama mai Akasia, te koga ne ma'nava ei latou, ke olo o sukesuke a te fenua o Kanana, kae maise eiloa te fa'kai o Ieliko. I te okoatuga a laua ki kona, ne olo atu laua o nofo i te po tena i te fale o te fafine tali tagata e igoa ki a Lahapa.

²Ne logo te tupu o Ieliko me e isi ne tino Isalaelu ne o'mai i te po o sukesuke te lotou fenua,

³tena ne ave ei tena fekau ki a Lahapa penei: “A tagata kona i tou fale ne 'mai o sukesuke te fenua kātoa tenei! Aumai ki tua a tagata kona!”

⁴Ne tali atu Lahapa, “E isi ne tino ne o'mai ki toku fale, kae e seiloa ne au me ne o'mai mai fea. Ne toe olo foki eiloa i te afiafi, ka koi tuai ei o pono te mataloa o te fa'kai. Au seki sili ki ei me e olo ki fea, kae e maua eiloa ne koe manafai e na fano nei koe mo tau potukau o afuli.” (A Lahapa i te taimi tena, ko oti ne fakamuni ne ia te tokolua kona i te tuafale, kae taotao ki lakau lino kola ne tuku i kona.)

⁷Ne olo atu a te kau a te tupu ki tua mo te fa'kai, ko te mataloa eiloa o te fa'kai ko pono. Ne olo latou o onoono ki tino lamalama o Isalaelu ke oko eiloa ki te mata o te auala tela e ulu i loto i te Iolitana.

⁸A Lahapa ne fanatu ki te tokolua tagata Isalaelu i te tuafale ka koi tuai ei o moe,

⁹muna a ia penei, “E iloa ne au i te fenua tenei ko oti ne tuku atu ne te Aliki mō koutou. A tino katoa i te fenua nei ko oko eiloa i te ma'taku i a koutou.

¹⁰ A matou ko oti ne logo i te faiga ne te Aliki a te Tai Kula ke masa pakupaku i otou mua, i te taimi ne tiakina ei ne koutou a te fenua o Aikupito. A matou ne logo foki i te tamatega ne koutou a Sekono mo Oko, kola ko tupu o Amoli i te feitu ki te saegala o te Iolitana.

¹¹I te logoga o matou i mea kona, ko matou eiloa ko ma'taku; ko galo eiloa omotou loto 'toa ne fai ne koutou. A te Aliki te otou Atua, ko te Atua i te lagi mo te lalolagi.

¹²Tauto mai nei ki a au me ka fai faka'lei ne koutou toku kaiga e penei mo au ne fai fakalei atu ki a koulua, kae fai mai se fakailoga ke talitonu atu au ki a koutou.

¹³Tauto mai nei me ka fakasao ne koulua toku tamana mo toku matua, oku tuagaene mo oku taina mo olotou kaiga katoa! Sa tukugina matou ke mate!”

¹⁴Muna a tagata kona ki a Lahapa, “A te Atua ke tamate ne ia maua, manafai e se fakataunu ne maua a te ma feagaiga! [1] Kafai e se fakailoa ne koe ki se tino a ma mea ne fai, e tauto eiloa maua, me ka fai fakalei ne matou a koe.”

¹⁵A Lahapa e nofo i te fale e piki ki te pui o te fa'kai, tela la, ne kake ifo te tokolua kona i te lopu mai i te fakamalama.

¹⁶Muna a Lahapa ki te tokolua kona, “Olo ki te fenua maugā i a koulua ma maua ne te kau a te tupu. Muni i kona i aso e tolu ke oko ki te taimi e foki mai ei. Tena, ko mafai ei ne koulua o olo i te lua auala.”

¹⁷Muna a tagata kona ki a ia, “Ka tausi eiloa ne maua te ma feagaiga ki a koe.

¹⁸Tenei te mea e tau o fai ne koe. I te taimi e taua atu ei matou ki te otou fenua, masaua o sai te uka kula tenei ki te fakamalama tela ne kake ifo ei maua. Puke mai tou tamana mo tou matua, ou tuagaene mo te kaiga katoa o tou tamana ki tou fale.

¹⁹Kafai se tino e fano keatea mo te fale kae mate, e o ia eiloa te 'se, e se o maua; kae kafai e pakia se tino i loto i tou fale ko maua ka paku ki ei te 'se.

²⁰Kae kafai ne fakaasi ne koe ki se tino te mea tenei ne fai ne maua i te fenua tenei, ko se tau ei o tausi ne maua te ma feagaiga ne fai mo koe.”

²¹Ne lotomalie Lahapa ki te faiga tena, uga ei ne ia ke olo. I te galoatuga o te tokolua kona, te mea eiloa ko sai ne Lahapa te uka kula ki te fakamalama.

²²Ne olo atu te tokolua kona ki mauga, muni eiloa i ei. Ne salasala eiloa laua ne te kau a te tupu i aso e tolu, kae seki maua eiloa ne latou, tena foki atu eiloa latou ki Ieliko.

²³Tena ne foki mai a sipai kona mai mauga, ulu atu i loto i te vaitafe, foki atu eiloa ki a Iosua. Ne fakamatala atu ne laua a mea katoa ne tupu i te la malaga,

²⁴tena kae toe fai atu laua penei, “E talitonu maua me ko oti ne aumai ne te Aliki mo tatou a te fenua katoa. A tino katoa i ei e ma'taku i a tatou.”