Read Te Tusi Tapu I Te Gana Tuvalu Lomiga Lua IOSUA 20 Bible Online

IOSUA 20 - Te Tusi Tapu I Te Gana Tuvalu Lomiga Lua bible

IOSUA 20

¹ Ne fai atu a te Aliki ki a Iosua

²ke fai atu ki tino Isalaelu penei, “Fili aka a fa'kai fakalafi kola ne fakatonu ne au ki a Mose ke fai atu ki a koutou.

³So se tino ne tatino i se mea pasala e mafai o fano ki fa'kai kona ke sao a ia mai i kaiga o te tino ne tamate ne ia.

⁴E mafai ne ia o tele ki so se fa'kai o fa'kai konei, kae fanatu ki te koga o fakamasinoga i te mataloa o te fa'kai, kae fakamatala fakalei ki takitaki a te mea ne tupu. Tena, ka faulu ei ne latou a ia ki loto i te fa'kai, kae tuku atu foki se koga mo ona nofo ko te mea ke nofo eiloa a ia i kona.

⁵Kafai se kaiga o te tino ne mate ne tautali atu eiloa o sala te tagata ne tamate ne ia tena kaiga i te fa'kai tena, e tau mo tino i te fa'kai tena o puipui fakalei a ia, kae ke se tuku atu ke ta ne tena fili, me i a ia ne tatino fua i se mea pasala; seki ta ne ia i tena kaitaua.

⁶E tau mo ia o nofo i te fa'kai ke oti tena fakamasinoga i te fono, ke oko foki ki te taimi ko mate ei te Faitaulaga Pule i te taimi tena. Tena, ko mafai ei ne ia o foki ki tena fale i te fa'kai tela ne vau ei a ia.”

⁷Konei a fa'kai ne fili ne latou i te feitu ki te togala o te Iolitana: ko Ketesa i Kalilaia, i te fenua mauga o Nafatali; ko Sekema i te fenua mauga o Efalaima; mo Hepelona, i te fenua mauga o Iuta.

⁸I te feitu ki te saegala o te Iolitana, i te kogā koga laugatasi i te vao, i te feitu ki te saegala o Ieliko, e tu ei a te fa'kai o Pesela tela ne fili ne latou, i te fenua o Leupena; ne fili foki ne latou a Lamota i Kileata, i te laukele o Kato; mo Kolana ei i Pasana, i te laukele o Manase.

⁹Kona a fa'kai fakalafi ne fili mo tino Isalaelu katoa, pela foki tino fakaalofa e nofo tasi latou. So se tino ne tatino i se mea pasala e maua sena lafiga i fa'kai kona mai i kaiga o te tagata ne mate; e se mafai a ia o sona tamate vagana ke oti tena fono ne fai.