Read Te Tusi Tapu I Te Gana Tuvalu Lomiga Lua IOSUA 21 Bible Online

IOSUA 21 - Te Tusi Tapu I Te Gana Tuvalu Lomiga Lua bible

IOSUA 21

¹Ne olo atu a takitaki o te matakaiga o Levi ki a Eleasalo te faitaulaga, Iosua te tama a Nuno pela foki ki takitaki katoa o kaiga takitasi i matakaiga o Isalaelu.

² I Sailo, i te fenua o Kanana, ne fai atu ei latou penei, “Ne fai te fakatonuga a te Aliki ki a Mose ke maua mai ne fa'kai mō matou, fakatasi mo ne malae mouku mo fagai omotou pulumakau.”

³Tena la, e pela eiloa mo te fakatonuga a te Aliki, ne tuku ei ne tino Isalaelu ki sa Levi ne nai fa'kai mo ne laukele moukua mai te fenua o latou.

⁴Ko kaiga i te kaukaiga o Koate ne mua o avatu te lotou vaega. A kaiga ne tupu mai i a Alona ne maua ne latou e sefulu tolu fa'kai lasi mai i vaega o Iuta, Simeona mo Peniamina.

⁵A te toega o te kaukaiga o Koate ne maua ne latou e sefulu fa'kai mai Efalaima, Tanu mo Manase ki te Togala.

⁶A te kaukaiga o Kelesona ne avatu ki ei e sefulu tolu fa'kai lasi mai i vaega o Isakala, Asela, Nafatali mo Manase ki te Saegala.

⁷E sefulu lua fa'kai lasi ne avatu mō te kaukaiga o Melali, mai vaega o Leupena, Kato, mo Sepulona.

⁸Ne tuku atu ne tino Isalaelu a fa'kai lasi kona mo olotou laukele moukua ki te kau sa Levi, e tusa mo te faiga o te vili[15] e iloa ei te loto o te Aliki, e pela eiloa mo te fakatonuga a te Aliki ki a Mose.

⁹Konei a igoa o fa'kai mai laukele o Iuta mo Simeona kola ne tuku ki te gafa o Alona kola ko te kaukaiga o Koate, kola ne tupu mai i a Levi.

¹⁰Ko te vaega o latou ne muamua o avatu.

¹¹Ko te fa'kai o Alapa ne tuku atu ki a latou (Alapa ko te tamana o Anaki) kae nei ko fakaigoa ki a Hepelona, kae e tu i te fenua mauga o Iuta, fakatasi mo te laukele moukua tela i ona tafatafa.

¹²A fatoaga o te fa'kai mo ona fa'kai foliki ko oti ne tuku mō Kalepo te tama a lefune.

¹³Konei a fa'kai ne tuku atu ki te gafa o Alona te faitaulaga, e fakaopoopo ki te fa'kai o Hepelona, te fa'kai fakalafi e tasi: ko Lipina,

¹⁴Iatila, Esetemoa,

¹⁵Holono, Tipeli,

¹⁶Aino, Iuta mo Peta Semese, fakatasi ei mo olotou laukele moukua: e iva fa'kai lasi mai te matakaiga o Iuta mo te matakaiga o Simeona.

¹⁷E fa olotou fa'kai mai i te laukele o Peniamina: ko Kipeona, Kepa,

¹⁸Anatota, mo Alamoni, fakatasi mo olotou laukele moukua.

¹⁹E sefulu tolu te aofaki katoa o fa'kai ne tuku ki faitaulaga, kola ko te gafa o Alona, fakatasi mo olotou laukele moukua.

²⁰A nisi kaiga i te kaukaiga o Koate i te matakaiga o Levi, ne avatu olotou fa'kai mai i fa'kai o Efalaima.

²¹E fa fa'kai lasi ne tuku atu mo latou: ko Sekema mo ona laukele moukua i te fenua mauga o Efalaima, te fa'kai fakalafi e tasi, Kesela,

²²Kipisaima, mo Peta Holono mo olotou laukele moukua.

²³E fa foki fa'kai ne tuku atu mo latou mai fa'kai o Tanu: ko Eleteke, Kipetoni,

²⁴Aitialona, mo Katalimoni, fakatasi mo olotou laukele moukua.

²⁵E lua fa'kai ne avatu mo latou mai i te vaega o Manase ki te togala: ko te fa'kai o Tanaka mo Katalimoni, fakatasi mo o la laukele moukua.

²⁶A kaiga kona i te kaukaiga o Koate ne maua eiloa e sefulu fa'kai lasi fakatasi mo olotou laukele moukua.

²⁷E lua fa'kai ne tuku atu mo te kaukaiga o Kelesona mai i fa'kai o Manase ki te Saegala: ko Kolana i Pasana, se fa'kai fakalafi e tasi tena, mo Pesetela, fakatasi mo laukele moukua.

²⁸E fa fa'kai lasi ne tuku atu mo latou i fa'kai lasi i te laukele o Isakala: ko Kisiona, Tapelata,

²⁹Ialamuta, mo Eganima, fakatasi mo olotou laukele moukua.

³⁰E fa foki fa'kai lasi mai te matakaiga o Asela: ko Misala, Apatonu,

³¹Helekata, mo Lehopa, fakatasi mo olotou laukele moukua.

³²E tolu fa'kai o latou mai i te matakaiga o Nafatali: ko Ketesa i Kalilaia, se fa'kai fakalafi e tasi, fakatasi mo tena laukele moukua, ko Hamota Toa, mo Katana, fakatasi mo o la laukele moukua.

³³A kaiga takitasi i te kaukaiga o Kelesona ne maua ne latou e tusa mo te sefulu tolu fa'kai lasi mo olotou laukele moukua.

³⁴A te kaukaiga o Melali ne avatu ki a latou e fa fa'kai lasi mai i fa'kai lasi o te matakaiga o Sepulona: ko Iokeneamo, ko Kalata,

³⁵ko Timena, mo Nalala, fakatasi mo olotou laukele moukua.

³⁶E fa fa'kai o latou mai i te matakaiga o Leupena: ko Pesela, Lasa,

³⁷Katemota, mo Mefata, fakatasi mo olotou laukele moukua.

³⁸E fa foki fa'kai o latou mai i a Kato: ko Lamota i Kileata, se fa'kai fakalafi e tasi, mo olotou laukele moukua,

³⁹Hesepono, mo laseli, fakatasi mo olotou laukele moukua.

⁴⁰Tena la, e sefulu lua fa'kai lasi ne tuku mo te kaukaiga o Melali.

⁴¹Mai te laukele tela ko puke nei ne tino Isalaelu, e tusa mo te fasefulu valu fa'kai lasi mo olotou laukele moukua ne tuku mo te matakaiga o Levi.

⁴³Tena, ne tuku atu ei ne te Aliki ki tino Isalaelu a te fenua katoa tela ne tauto faka'lei ei a ia ki olotou tupuga ke avatu mo latou. I te otiga ne puke ne latou, te mea eiloa ko nofo i kona.

⁴⁴Ne aumai ne te Aliki te filemu i luga i te fenua katoa, e pela eiloa mo tena tautoga ki olotou tupuga. E seai eiloa se fili ne mafai o fakatakavale Isalaelu, me ko leva ne tuku ne te Aliki te manumalo ki a Isalaelu i ona fili katoa.

⁴⁵Ne tausi eiloa ne te Aliki ana tautoga katoa ne fai ki tino Isalaelu.