Read Te Tusi Tapu I Te Gana Tuvalu Lomiga Lua IOSUA 22 Bible Online

IOSUA 22 - Te Tusi Tapu I Te Gana Tuvalu Lomiga Lua bible

IOSUA 22

¹Ne fakamaopoopo ne Iosua a tino katoa i matakaiga o Leupena, Kato, mo Manase ki te Saegala,

² kae fai atu penei ki a latou, “Ko oti nei ne fai ne koutou a mea katoa kola ne fakatonu atu ne Mose, te tavini a te Aliki, ke fai ne koutou. Ko oti foki koutou ne faka'logo ki aku fakatonuga.

³E seki fulitua eiloa koutou ki otou taina Isalaelu. A koutou ne tausi faka'lei eiloa ki te fakatonuga a te Aliki te otou Atua.

⁴Nei, ko oti ne tuku mai ne te Aliki te otou Atua te filemu ki otou taina Isalaelu, e pela eiloa mo tena tautoga. Tela la, na o'mai o foki atu ki te fenua tela ko oti ne filifili ne koutou ke fai mo otou tofi, ko te fenua i te feitu ki te saegala o te Iolitana, tela ne tuku atu ne Mose te tavini a te Aliki mo koutou.

⁵Masaua o faka'logo ki tulafono ne tuku atu ne Mose: alofa ki te Aliki te otou Atua, fai te mea e loto a ia ki ei, tausi ki ana fakatonuga, 'piki 'mau ki a ia, kae tavini atu ki a ia mo otou loto mo otou agaga katoa.”

⁶Tena, ne uga atu ei ne Iosua latou ke foki ki te olotou fenua, ne fakamanuia ne ia kae fai atu penei, “Ko 'foki atu nei koutou mo te maumea lasi. Ko uke otou pulumakau, siliva, aulo, palasi, fiti, mo laugatu e uke. Masaua o tufa fakalei otou mea ne puke mai otou fili.” Tena, ne foki atu ei latou ki te lotou fenua. Ko Mose ne tuku ne ia se laukele i te feitu ki te saegala o te Iolitana mō te afā o te matakaiga o Manase, ka ko te sua afā ne avatu ne Iosua te lotou laukele i te feitu ki te togala o te Iolitana fakatasi mo nisi matakaiga.

⁹Tena, ne foki atu ei a tino o te matakaiga o Leupena, Kato, mo Manase ki te Saegala, ki te lotou fenua. Ne tiaki ne latou te sua vaega o Isalaelu i Sailo, i te fenua o Kanana, ma'laga atu eiloa latou ki te lotou fenua, tela ko te fenua o Kileata, tela ne puke ne latou, e tusa mo te fakatonuga a te Aliki ki a latou e auala i a Mose.

¹⁰I te okoatuga o matakaiga o Leupena, Kato, mo Manase ki te Saegala ki Kelilota,[16] i te feitu eiloa ki te togala o te Iolitana, ne faite ei ne latou se fata-fai-taulaga lasi kae gali, i tafa o te vaitafe.

¹¹E isi se tino ne fanatu o fai ki te sua vaega o Isalaelu penei, “Faka'logo mai! A tino o matakaiga o Leupena, Kato mo Manase ki te Saegala ko oti ne faite ne latou se fata-fai-taulaga i Kelilota, i te feitu mai o te Iolitana, te feitu o tatou!”

¹²I te 'logoga o te vaega tena o Isalaelu, ne maopoopo ei latou katoa i Sailo o olo atu o taua atu ki matakaiga kona ki te saegala.

¹³Tena, ne uga atu ne tino Isalaelu a Fineaso, te tama tagata a Eleasalo te faitaulaga, ke fano ki tino o matakaiga o Leupena, Kato mo Manase ki te Saegala, i te fenua o Kileata.

¹⁴E toko sefulu tagata ne olo mo Fineaso, e taki tokotasi mai i matakaiga takitasi o te togala. A tagata katoa kona ne ulu o kaiga i kaukaiga kesekese.

¹⁵Ne oko atu latou kona ki te fenua o Kileata, ki tino o matakaiga o Leupena, Kato, mo Manase ki te Saegala,

¹⁶ kae ne fai latou mo sui o te fenua o te Atua o fai atu penei, “Ai a ko fai ei ne koutou se mea masei penei ki te Atua o Isalaelu? A koutou ko oti ne teke ki te Aliki i te faitega ne koutou o te fata-fai-taulaga tenei mo koutou! A koutou ko se tautali i te Aliki!

¹⁷ Masaua ne koutou te 'tou agasala ne fai i Peolo, i te fakasalaga ne te Aliki tena fenua ki te mala? A tatou nei koi puapuaga eiloa ona ko te mea tena. E a, e se lava te agasala tena?

¹⁸E a, ko se fia tautali nei koutou i a ia? Kafai e teke nei koutou ki te Aliki i te aso nei, kae ka kaitaua a ia ki tino Isalaelu katoa fakamuli.

¹⁹Kiloke, kafai e se 'tau te otou fenua i te fai o tapuakiga, o'mai la ki te feitu nei, ki te fenua o te Aliki, tela e tu ei tena Faleie. O'mai o sala ne laukele i te motou feitu. Sa taumafai o teke ki te Aliki, io me fai ne koutou ke taia matou i te agasala teke, o fakatu se isi fata-fai-taulaga e fakaatea mo te fata-fai-taulaga a te Aliki te 'tou Atua.

²⁰ Masaua ne koutou a Akana te tama a Sela tela ne seki fakalogo ki te fakatonuga e uiga ki mea kola e tau o fakama'sei ke se puke; ne fakasala katoa eiloa a te fenua o Isalaelu i te agasala tena. Se ko Akana fua ne mate i tena agasala tena.”

²¹Ne tali atu a tino o matakaiga o Leupena, Kato, mo Manase ki te Saegala penei:

²²“A ia tela e tafasili i te Malosi, ko te Atua! A ia ko te Aliki! A ia tela e Tafasili i te Malosi, ko te Atua! A ia ko te Aliki! E iloa lei ne ia te pogai e fai ei ne matou te mea tenei, tela la, matou e manako ke iloa foki ne koutou! Kafai matou ne teke io me ko se tautali i te Aliki, ko tau o tamate katoa matou!

²³Kafai ko se faka'logo matou ki te Aliki o faite se fata-fai-taulaga ma matou mo sunu a taulaga i luga i ei, io me ofo i ei a taulaga Saito mo taulaga fakafetai, ko tau ke fakasala matou ne te Aliki.

²⁴Kiloke, matou se teke. Ne fai ne matou te mea tena, me i a matou e mataku me i aso fakamuli ka o'mai a tino i otou gafa o fai ki tino i omotou gafa penei, ‘Se a te otou mea e fai ki te Aliki te Atua o Isalaelu?

²⁵Ne fai ne ia te Iolitana mo tuakoi i te va o matou mo koutou tino o Leupena mo Kato. E seai se fekau a koutou ki te Aliki.’ Tena, e se taumate kaati ka fakagata ne tino i otou gafa a tino i omotou gafa o tapuaki atu ki te Aliki.

²⁶Tena te mea ne faite ei ne matou te fata-fai-taulaga, se mo sunu taulaga manu io me ofo i ei a taulaga saito,

²⁷kae ne faite ke fai mo fakailoga ki omotou tino mo otou tino, pela foki ki tupulaga i tua o tatou, me i a matou e tapuaki fakamaoni eiloa ki te Aliki i mua o tena Faleie tapu, mo omotou taulaga ke sunu, mo taulaga manu mo taulaga fakafetai. E fai te mea tena ke se fai aka pela a otou fanau me e seai se fekau a omotou fanau ki te Aliki.

²⁸Tena te manatu o matou, me kafai e tupu se mea pena, e mafai ne omotou fanau o tali penei, ‘Kiloke! Ne faite ne omotou tupuga se fata-fai-taulaga e pela mo te fata-fai-taulaga a te Aliki. E seki faite mō sunu taulaga saito io me ko taulaga manu, kae ke fai mo fakailoga i otou tino mo omotou tino.’

²⁹A matou se fia teke lele eiloa ki te Aliki, io me fakagata te motou tautali i a ia, o faite se isi fata-fai-taulaga mō sunu taulaga i ei. E seai se fata-fai-taulaga e faite ne matou ke fakaatea mo te fata-fai-taulaga a te Aliki te tou Atua tela e tu i mua o tena Faleie.”

³⁰Ne lagona ne Fineaso te faitaulaga, mo te tinogafulu tagata kola ne olo mo ia, a te tali a tino o matakaiga o Leupena, Kato mo Manase ki te Saegala, tena ne malie ei latou.

³¹Muna a Fineaso, te tama a Eleasalo te faitaulaga ki a latou, “Ko iloa nei ne matou i te Aliki e fakatasi mai ki a tatou. A koutou seki teke atu ki a ia, tela la, ko sao ei a tino Isalaelu mai i te fakasalaga a te Aliki.”

³²Tena, ne tiakina ei ne Fineaso mo tagata kona ne olo mo ia, a tino o matakaiga o Leupena, Kato mo Manase ki te Saegala i te fenua o Kileata, o foki atu ki olotou tino Isalaelu i te fenua o Kanana, fakamatala atu foki ei ne latou te tala o te lotou malaga.

³³Ne ma'lie a loto o tino Isalaelu, tena vikia ei ne latou te igoa o te Atua. Ko se toe faipati latou ke olo latou o taua kae fakamasei te fenua e nofo ei a tino o matakaiga o Leupena mo Kato.

³⁴Muna a tino o Leupena mo Kato penei, “A te fata-fai-taulaga tenei se molimau ki a tatou katoa i te Aliki ko te Atua.” Tena ne fakaigoa ei ne latou ko ‘Molimau’.