Read Te Tusi Tapu I Te Gana Tuvalu Lomiga Lua IOSUA 23 Bible Online

IOSUA 23 - Te Tusi Tapu I Te Gana Tuvalu Lomiga Lua bible

IOSUA 23

¹Fakamuli ifo eiloa, ne fai ne te Aliki a Isalaelu ke malu lei mai ona fili i ona tafatafa. I te taimi tena, a Iosua ko matua eiloa,

²tena ne fakamaopoopo ei ne ia a tino Isalaelu katoa, toeaina, takitaki, famasino, mo ofisa o te fenua, kae fai atu penei, “Au nei ko matua eiloa.

³Ko oti ne matea ne koutou a mea katoa ko oti ne fai ne te Aliki te otou Atua ki malo katoa konei, me i a ia e alofa ki a koutou. A te Aliki te Atua ne taua mō koutou.

⁴Ko oti ne tuku atu ne au ke fai mo tofi o matakaiga kesekese o Isalaelu a te laukele o malo kola koi toe mai, pela foki a laukele o malo kola ko oti ne fakatakavale ne au, e kamata mai i te Vaitafe o Iolitana i te saegala, ke oko ki te Tai Metitilani i te togala.

⁵Ka fai ne te Aliki te otou Atua a latou ke tele ki tua, kae ka afuli ne ia latou keatea i te taimi e olo atu ei koutou ki mua. Ka puke eiloa mō koutou te lotou fenua e pela eiloa mo te tautoga a te Aliki te otou Atua ki a koutou.

⁶Tela la, masaua o faka'logo kae tausi ki mea katoa kola e tusi i te tusi o Tulafono a Mose. E tapu eiloa e manatu fataua koutou ki se vaega i ei,

⁷tena, ko tau ei o se toe fia kau koutou ki tino kona koi nofo tasi mai koutou, se gata i kona, kae kalaga sale foki ki atua io me fakaaoga foki a igoa kona o fai a tautoga io me tapuaki atu ki nisi atua io me ifo atu ki latou.

⁸Masaua o fakamaoni ki te Aliki e pela mo aso mua eiloa.

⁹Ko oti ne afuli ne te Aliki a malo lasi kae malosi i otou mua, i te taimi ne olo atu ei koutou ki mua, kae e seai eiloa se malo e mafai o pono i otou mua.

¹⁰ So se tagata i a koutou e mafai ne ia o afuli se toko afe, me i te Aliki te otou Atua e kau atu ki a koutou, e pela eiloa mo tena tautoga.

¹¹Masaua la o a'lofa ki te Aliki te otou Atua.

¹²Kafai ko se fakamaoni koutou ki te Aliki kae kau atu ki malo konei koi toe kae fakatau avaga foki koutou mo latou,

¹³ko tau ei o iloa ne koutou me ko se toe afuli ne te Aliki te otou Atua, a malo kona i te taimi e olo atu ei koutou ki mua. Ka fai latou pela me se malei io me se lua i te fakamataku, kae fakamae e pela me se kini i otou tua io me ne lakau talatala i otou mata. Ka tumau eiloa te mea tena ke oko ki te taimi ko seai ei se tino e toe i te fenua gali tenei ne tuku mai ne te Aliki te otou Atua mo koutou.

¹⁴“Ko oko mai ki te taimi ko tau ei mo au o mate. E iloa faka'lei ne koutou katoa i otou kano loto taki tokotasi, me i te Aliki te otou Atua ko oti ne tuku atu ne ia ki a koutou a mea lei katoa, kola ne tauto a ia ke tuku atu. A tautoga katoa a ia ne fai, ko oti katoa ne fakataunu; e seai se mea e seki fakataunu.

¹⁵E fakataunu foki ne ia a mala kola ne folafola ne ia, e pela eiloa mo te fakataunuga o ana tautoga ki mea lei.

¹⁶Kafai e se tausi ne koutou te feagaiga tela ne fakatonu atu ne te Aliki te otou Atua ke tausi, kae kafai foki e tavini kae tapuaki atu koutou ki nisi atua, tena ka fakasala ei ne ia koutou i tena kaitaua, kae e se leva te mea eiloa ko seai se tino o koutou e toe i te fenua gali tenei, tela ne avatu ne ia.”