Read Te Tusi Tapu I Te Gana Tuvalu Lomiga Lua IOSUA 5 Bible Online

IOSUA 5 - Te Tusi Tapu I Te Gana Tuvalu Lomiga Lua bible

IOSUA 5

¹A tupu katoa o te fenua o Amoli, i te feitu ki te togala o te Iolitana, mo tupu katoa o Kanana i te Tai Metitelani, ne logo katoa i te faka'masa pakupakuga ne te Aliki a te Iolitana, ke oko eiloa ki te taimi ne oko katoa atu ei a tino Isalaelu ki te sua feitu. Tena ne ma'taku ei latou i tino Isalaelu, kae loto vai'vai foki.

²Tena ne fai mai ei te Aliki ki a Iosua penei, “Faite ne naifi ki fatu falanite ko pilitome ei a tino Isalaelu.”

³Ne fai eiloa ne Iosua a te mea ne fakatonu mai ne te Aliki, tena ne pilitome ei ne ia a tino Isalaelu i te koga e igoa ko te Mauga o Pilitomega.

⁴ I te taimi ne tiakina ei ne tino Isalaelu a te fenua o Aikupito, a tagata ne pilitome katoa. Kae e seai eiloa se pepe tagata kai pilitome i te fasefulu tausaga ne olo sale ei a tino Isalaelu i te vao. I te fakaotiga o tausaga kona, a tagata katoa kola ko tau o fai mo sotia i te taimi ne tiakina ei ne latou Aikupito ko oti katoa ne mate, me ne teke ki te Aliki. E pela eiloa mo tena tautoga, ne seki matea eiloa ne latou te fenua maumea kae laukele ola tela ne tauto ne ia ki olotou tupuga.

⁷A tama tagata a tino kona e seki pilitome eiloa. Ko te tupulaga fou tena ne pilitome ne Iosua.

⁸I te otiga ne fai o te pilitomega, ne nofo te fenua katoa i te koga tena ne faka'tu ei olotou faleie ke oko ki te taimi ko 'mafu ei a koga ne pilitome.

⁹Muna a te Aliki ki a Iosua, “I te aso nei ko ave keatea ne au mai a koutou a te luma o te pologaaga a koutou i Aikupito.” Tena te mea ne fakaigoa ei te koga tena ko Kilikala,[2] ko tena igoa foki eiloa ki aso nei.

¹⁰ I te taimi ne nofo ei a tino Isalaelu i Kilikala i te kogā koga laugatasi i tafa o Ieliko, ne fakamanatu ei ne latou a te Paseka i te afiafi o te po sefulu fa o te masina tena.

¹¹A te aso tafa atu ki te aso tena, ko te aso muamua eiloa ne kai ei latou ki meakai o Kanana: ko saito tao mo falaoa e se palu ki te isi.

¹² A te manai ko se toe 'to i aso kona, tela la, ko se toe maua ei ne latou. Mai i te taimi tena, ko kai eiloa latou ki mea e ola i Kanana.

¹³I te taimi koi nofo ei a Iosua i tafa o Ieliko, ne matea ne ia te tagata e tu mo tena pelu i ona mua. Ne fanatu Iosua ki a ia kae fesili atu penei, “A koe na se tino o matou, me se tino o te fili?”

¹⁴Kae tali mai te tagata tena, ‘Au se se tino o te kau a koutou io me se tino o te fili. Au se takitaki o te kautau a te Aliki.” Ne fakasiga ifo a Iosua ki te laukele o tapuaki kae fai atu penei, “Tou malu, au ko tau tavini. E isi se mea e manako koe ke fai ne au?”

¹⁵Tena ne fai atu ei a te takitaki o te kautau a te Aliki ki a ia penei, “Tapale keatea ou taka; a koe e tu i luga i te laukele tapu.” Tena ne fai eiloa ne Iosua te mea ne fakatonu atu ki a ia.