Read Te Tusi Tapu I Te Gana Tuvalu Lomiga Lua IOSUA 6 Bible Online

IOSUA 6 - Te Tusi Tapu I Te Gana Tuvalu Lomiga Lua bible

IOSUA 6

¹A mataloa o te fa'kai o Ieliko e pono katoa kae tausi faka'lei foki ne olotou sotia, ko te mea ke mo a e to mai a tino Isalaelu ki loto i ei. Tela la, e seai se tino e mafai o ulu ki loto, seai foki se tino e mafai o ulu ki tua mo te fa'kai.

²Muna a te Aliki ki a Iosua, “Ko tuku atu nei ne au ki ou lima a te fa'kai o Ieliko, mo ona tupu katoa, pela foki a sotia toa katoa i ei.

³A koe mo tau kautau e tau o mati fakatamilo i te fa'kai o Ieliko e fakatasi i te aso, i aso e ono.

⁴E tokofitu a faitaulaga, e tofu mo pu takitasi e tau o olo i mua o te Pusa o te Feagaiga. I te fitu o aso ka mati fakatamilo koutou i te fa'kai o Ieliko e fakafitu taimi ka ko faitaulaga e fakatagi a pu.

⁵Ka oti, ko fakatagi ei ne latou se nota loa eiloa e tasi. I te taimi eiloa e lagona ei ne koutou, e tau o kalaga fakatasi katoa a tagata ki luga, ko te pui eiloa o te fa'kai ka maofa ki lalo. Tena, ko tele atu ei te otou kautau ki loto i te fa'kai.”

⁶Ne kalaga atu a Iosua ki faitaulaga kae fai atu ki a latou penei, “Puke te Pusa o te Feagaiga, kae e tokofitu i a koutou e tau o olo i mua mo pu.”

⁷Tena ne fakatonu ei ne ia tena kau ke kamata te mati a latou o fakatamilo te fa'kai, kae e isi se potukau e olo i mua o te Pusa o te Feagaiga, e tausi ne latou te Pusa o te Feagaiga a te Aliki.

⁸Tena, e pela eiloa mo te fakatonuga a Iosua, ne olo atu te potukau tausi i mua o faitaulaga kola e fakatagi a pu; mai tua, ko faitaulaga kola e amo ne latou te Pusa o te Feagaiga, kae tautali atu i olotou tua ko te potukau tausi o te feitu ki tua. I te taimi nei, a pu e tagi faeloa.

¹⁰Ka ko Iosua ko oti eiloa ne fakatonu ki tena kau ke se ka'laga ki luga io me faipati, ke oko eiloa ki te taimi e fai atu ei ne ia a te fakatonuga.

¹¹Tena ne fai atu ei a ia ki te kau tena ke ave te Pusa o te Feagaiga a te Aliki, o fakatamilo te fa'kai e fakatasi te taimi. Oti aka, foki mai ei latou ki te koga ne ma'nava ei latou.

¹²Ne pula aka Iosua i te taeao 'malu o te sua aso, tena toe mati foki ei a sotia mo faitaulaga o fakatamilo te fa'kai e pela mo te fakatulaga i te aso muamua: e muamua a sotia tausi o te feitu ki mua, tao atu ki ei ko faitaulaga e tokofitu kola e fakatagi a pu e fitu, tao atu ei ko faitaulaga kola e amo te Pusa o te Feagaiga a te Aliki; kae fakaoti ko sotia tausi o te feitu ki tua. I taimi katoa konei, a pu e tagi faeloa.

¹⁴I te lua o aso ne solo fakatamilo latou i te fa'kai, oti, toe foki atu ei ki te koga e nofo latou i ei. Ne fai eiloa latou pena i aso e ono.

¹⁵I te fitu o aso, ne ala malu latou o mati fakatamilo i te fa'kai o Ieliko e pela mo te faiga i taimi muamua, kae tenei fua te aso ko fakatamilo fakafitu ei ne latou te fa'kai o Ieliko.

¹⁶I te fitu o tamiloga, ka ko faitaulaga ko fakatoka o faka'tagi a pu, ne fakatonu atu ei ne Iosua tena kautau ke kalaga ki luga. Muna a Iosua, “A te fa'kai ko oti ne tuku mai ne te Aliki ki a koutou!

¹⁷A te fa'kai mo mea katoa i ei e tau katoa o fakama'sei, e fai mo taulaga ki te Aliki. Ko Lahapa fua, te fafine tali tagata, mo tena kaiga e fakasao, me ne fakamuni ne ia a o'tou tino lamalama.

¹⁸Kae e tapu se tino e puke ne ia so se mea tela e tau o fakamasei; kafai e fai ne koutou te mea tena, ka aumai fua ne koutou te fakalavelave mo te masei ki te koga e nofo ei a tino Isalaelu.

¹⁹So se mea e faite ki siliva, aulo, palasi io me ne fiti e tuku ma te Aliki. E tau o teu i te fale koloa a te Aliki.”

²⁰ Tena, ne fakatagi ei ne faitaulaga a pu. I te taimi ne logo ei te kautau a Iosua, te mea eiloa ko kalaga ki luga, ko pui eiloa o Ieliko ko maofa ki lalo. Tena ne olo atu ei te kautau ki loto i te fa'kai i luga i te mauga foliki, puke eiloa ne latou.

²¹Ne tamate ne latou a tino katoa i loto i te fa'kai ki olotou pelu, tagata mo fafine, mai te tamaliki foliki ke oko ki tino matua. Ne tamate foki ne latou a pulumakau, mamoe, mo asini.

²²Tena, ne fai atu a Iosua ki te tokolua lamalama penei, “Olo ki te fale o Lahapa, o puke mai ki tua, fakatasi mo tena kaiga, e pela mo te lua feagaiga ki a ia.”

²³Tena ne olo atu laua, puke mai ei a Lahapa, fakatasi mo tena tamana, tena matua, ona tuagaene, mo te kaiga katoa o ia. Ne puke mai katoa ne laua te kaiga tena mo olotou tavini ki tafa o te koga e nofo ei tino Isalaelu, e sao lei ei latou.

²⁴Tena, sunu ei ne latou te fa'kai fakatasi mo mea katoa i ei, na ko mea fua kola ne faite ki siliva, aulo, palasi mo fiti ne puke ne latou o tausi i te pusa teu koloa a te Aliki.

²⁵ Ka ko Lahapa ne fakasao ne Iosua, fakatasi mo ana kaiga, me ne fakamuni ne ia a olotou tino lamalama e tokolua kola ne uga ne ia ki Ieliko. (A te gafa o Lahapa ne nofo eiloa i Isalaelu ke oko mai ki aso nei.)

²⁶ I te taimi tena, ne fai ne Iosua se fakapulaga penei: “So se tino e taumafai o toe faite a te fa'kai o Ieliko ka fakamalaia ne te Aliki. So se tino e fakatakato ne ia te fakavae ka mate tena toekimua; So se tino e faite ne ia te pui ka mate tena toekimuli.”

²⁷Tena, ne fakatasi faeloa te Aliki ki a Iosua, tela la, tena igoa ko salalau atu eiloa i te fenua katoa.