Read Te Tusi Tapu I Te Gana Tuvalu Lomiga Lua IOSUA 8 Bible Online

IOSUA 8 - Te Tusi Tapu I Te Gana Tuvalu Lomiga Lua bible

IOSUA 8

¹Muna a te Aliki ki a Iosua, “Puke te kautau katoa kae olo ki te fa'kai o Ai. Sa ma'taku io me loto vaivai. Ka tuku atu ne au te manumalo ki a koe i te tupu o Ai. A tena fa'kai, ona tino mo tena fenua ka puke mo koutou.

²Masaua o fai ne koutou ki te fa'kai o Ai mo tena tupu, a te mea ne fai ne koutou ki te fa'kai o Ieliko mo tena tupu. I te taimi tenei, e mafai o tausi ma koutou a mea i ei, pela foki mo pulumakau. Fakatoka o puke te fa'kai i tena feitu ki tua.”

³Tena ne fakatoka ei a Iosua mo ana sotia o olo ki Ai. Ne fili aka ne ia e tolusefulu afe tino 'lei eiloa mai tena kautau, kae uga ne ia ke olo i te po

⁴mo te fakatonuga tenei: “Muni i te sua feitu o te fa'kai, sa to fakamao mai te fa'kai; kae fakatokatoka faeloa o taua.

⁵Ka olo atu matou mo taku kau o fakasae ki te fa'kai. Kafai e o'mai a te kautau a Ai o taua ki a matou, ko matou eiloa ko tele, e pela mo te afuliga foki o tatou i te taimi muamua.

⁶Ka afuli ne latou matou ke oko ki te taimi ko 'mao ei latou mo te lotou fa'kai. Ka manatu aka eiloa latou i a tatou e tele mai i a latou, e pela mo te taimi mua.

⁷Tena, ko o'mai ei koutou mai te koga e muni ei koutou o puke te fa'kai. Ko te Aliki te otou Atua ka tuku atu ne ia ki a koutou.

⁸Kafai ko oti ne fakatakavale ne koutou te fa'kai, ko sunu ei ne koutou, e pela eiloa mo te fakatonuga a te Aliki. Kona a fakatonuga e tau o fai ne koutou.”

⁹Tena, ne uga atu ei latou ne Iosua, ko latou eiloa ko olo ki te koga ne fakasino atu ke muni latou i ei, i te feitu ki te togala o Ai, i te va o Ai mo Peteli, tena, fakatalitali eiloa latou i te po i kona. A Iosua ne nofo eiloa i te koga e tu ei olotou faleie i te po tena.

¹⁰I te tafataeao, ne pula aka Iosua, fakamaopoopo ei ne ia tena kautau. Tena, taki ei ne ia mo takitaki o Isalaelu a te kautau tena ki Ai.

¹¹Ne olo atu latou mo sotia kona ki te feitu ki te mataloa o te fa'kai, faka'tu ei olotou faleie i te feitu ki matu, kae e isi se vanu i te va o latou mo te fa'kai o Ai.

¹²Ne fakamuni ne ia e tusa mo te lima afe tagata i te feitu ki te togala o te fa'kai, i te va o Ai mo Peteli.

¹³Tena ko toka ei te kautau a Iosua, a te koga e fakamautu ei latou e i matu o te fa'kai; ka ko te toega o te kau e nofo i te feitu ki te togala. A Iosua ne nofo i te po tena i te vanu.

¹⁴I te laveaga ne te tupu o Ai a te kau a Iosua, ne fai fakavave eiloa tena tonu. Ne olo atu a ia mo tena kau ki te Vanu o te Iolitana o taua atu ki tino Isalaelu i te koga foki eiloa tela ne tau ei latou muamua, kae se iloa eiloa ne ia me ka vau te sua potukau mai ona tua.

¹⁵Ne fakaloiloi a Iosua mo tena kau i a latou ko takavale tela tele ei latou ki te vao.

¹⁶A tagata katoa i te fa'kai ne o'mai katoa o afuli latou, tena la, ko gasolo eiloa latou o mao keatea mo te lotou fa'kai.

¹⁷Ne olo katoa a tagata i te fa'kai o Ai [3] o afuli a tino Isalaelu, tela la, ko seai eiloa se tagata e toe o 'pui te fa'kai, ka ko te fa'kai ko tuku fakasau eiloa.

¹⁸Tena ne fai mai ei te Aliki ki a Iosua penei, “Fakasaga te mata o tau tao ki te fa'kai o Ai, me ko tuku atu ne au ki a koe.” Tena, ne fai eiloa ne Iosua a te mea ne fai atu ki a ia.

¹⁹I te taimi eiloa ne sisi aka ei tena lima, ko tena kau eiloa kola ne muni ko tu aka ki luga o tele ki loto i te fa'kai, puke eiloa ne latou te fa'kai. Tena, sunu foki eiloa ne latou te fa'kai i te taimi tena.

²⁰I te kilomaiga o tagata Ai ki olotou tua, matea ei ne latou te au e fanake ki te lagi. Ko seai eiloa se koga e sao ei latou, me i te kau kola ne afuli atu ne latou ki te vao ko mafuli mai o tau ki a latou.

²¹I te mateaga ne Iosua mo tena kau me ko oti ne puke ne sua vaega o latou a te fa'kai kae ko 'ka foki, ne fuli mai ei latou o tamate valevale a tagata Ai kola ne olo atu o afuli latou.

²²A tagata Isalaelu kola ne puke ne latou te fa'kai, ko o'mai foki o tau fakatasi mo te kau a Iosua. Tena ne nikoi ei a tagata o Ai ne tagata Isalaelu, tena tamate katoa eiloa latou. E seai eiloa se tino ne sao keatea io me se tino ne ola

²³na ko te tupu fua o Ai. Ne puke fakapagota a ia kae avatu ki a Iosua.

²⁴Ne tamate ne tagata Isalaelu a tagata Ai katoa i te vao kola ne olo atu o afuli latou. Ne toe foki atu te kau Isalaelu ki Ai o tamate katoa a tino i ei.

²⁵Ne taofi eiloa ne Iosua tena tao fakasaga ki Ai, seki tuku eiloa ne ia ki lalo ke oko ki te taimi ne 'mate katoa ei a tino i ei. Tino katoa i te fa'kai o Ai ne mate katoa i te aso tena, e sefulu lua afe tagata mo fafine.

²⁷Ne tausi ne tino Isalaelu ma latou pulumakau mo mea taua kola ne maua ne latou i loto i te fa'kai, e pela mo pati a te Aliki ki a Iosua.

²⁸Ne sunu ne Iosua te fa'kai o Ai, tiakina ei ne ia pena. E pena eiloa ke oko mai ki aso nei.

²⁹Ne noaua ne ia te tupu o Ai i se lakau, fakatautau eiloa ne ia pena ke oko ki te afiafi. I te tōga o te la, ne fai te fakatonuga a Iosua ke ave ifo te foitino, tena ne pei atu ei ki te mataloa o te fa'kai. Ne taotao ne latou ki fatu, tena koi tu eiloa ke oko mai ki aso nei.

³⁰ Tena ne faite ei ne Iosua i luga i te Mauga o Epalu se fata-fai-taulaga ki te Aliki, te Atua o Isalaelu.

³¹ Ne faite ne ia e pela eiloa mo te faiga tela ne fakatonu ne Mose, te tavini a te Aliki, ki tino Isalaelu, e pela mo te mea tela e tusi i te Tulafono a Mose: “Se fata-fai-taulaga tela ne faite ki fatu kola e seki kati eiloa ki se mea faigaluega fiti.” Ne ofo ne latou olotou taulaga sunu ki te Aliki, ne ofo atu foki ne latou olotou taulaga fakafetai.

³²I kona, ne fai ei ne Iosua se kopi o Tulafono kola ne tusi ne Mose, i luga i fatu,[4] te kopi o Tulafono kola ne tusi ne Mose.

³³ A tino Isalaelu mo olotou takitaki, mo ofisa, famasino, pela foki a tino fakaalofa e nofo tasi latou, e tu i feitu e lua o te Pusa o te Feagaiga, o fakasaga ki faitaulaga sa Levi kola e amo ne latou. Te afā o tino e tu mo olotou tua e fakasaga ki te Mauga o Kelisima, ka ko te sua afa e fakasaga olotou tua ki te Mauga o Epalu. Ko Mose, te tavini a te Aliki, ne fakatonu ne ia ke fai ne latou te mea tena mafai ko oko mai te taimi ka maua ei ne latou te fakamanuiaga.

³⁴Tena ne faitau ei ne Iosua te Tulafono katoa, e aofia ei a fakamanuiaga mo fakamalaiaga, e pela eiloa mo te mea e tusi i te tusi o te Tulafono.

³⁵A tulafono katoa a Mose ne faitau ne Iosua ki te fenua katoa, e aofia ei fafine mo tamaliki, pela foki a tino fakaalofa kola e nofo tasi latou.