Read Te Tusi Tapu I Te Gana Tuvalu Lomiga Lua IOSUA 9 Bible Online

IOSUA 9 - Te Tusi Tapu I Te Gana Tuvalu Lomiga Lua bible

IOSUA 9

¹A te manumalo o Isalaelu ko logo katoa ei a tupu i te feitu ki te togala o te Iolitana — ko tupu i fenua maluga, i lalo o mauga, pela foki i te matafaga o te Tai Metitilani, ke oko eiloa ki Lepanona i matu; a tupu kona ko tupu o tino Heti, tino Amoli, tino Kanana, tino Pelise, tino Hivi, mo tino Iepuse.

²Ne kau fakatasi a tupu katoa kona o taua atu ki a Iosua mo te kau Isalaelu.

³Ka ko tino Kipeona, kola ne tino Hivi, ne logo i te mea ne fai ne Iosua ki fa'kai o Ieliko mo Ai,

⁴tela ne mafaufau ei latou o fakaloiloi a Iosua. Ne olo atu latou o fakauta olotou asini ki meakai e fao i taga masaesae mo uaina e fao i taga ko Leva.

⁵Ne pei latou ki gatu masaesae mo taka masei. A falaoa ne olo mo latou ko mata leva kae se 'lei.

⁶Tena, ne olo atu latou ki te koga e nofo ei tino Isalaelu, i Kilikala, kae fai atu penei ki a Iosua mo tino Isalaelu, “A matou ne o'mai mai fenua mao. A matou e ma'nako ke fai se fakataugasoa i te va o tatou.

⁷ Kae ne fai atu a tino Isalaelu, “Ai a ka fai ei se fakataugasoa i te va o tatou? A koutou kaati e nofo fua i se koga pili mai.”

⁸Muna a latou ki a Iosua, “A matou ko toka o fakalogo ki te mea e manako koe ke fai ne matou.” Ne fesili atu a Iosua ki a latou penei, “Ko oi koutou? A koutou ne o'mai mai fea?”

⁹Tena ne fakamatala atu ei ne latou te tala tenei: “Tou malu, matou nei ne o'mai mai se fenua mao, me i matou ko oti ne logo i te Aliki te otou Atua. A matou ko oti ne logo i mea katoa ne fai ne ia i Aikupito

¹⁰ pela foki mo te mea ne fai ne ia ki tupu e tokolua o Amoli i te feitu ki te saegala o te Iolitana: ko te Tupu ko Sekono o Hesepono mo te Tupu ko Oko o Pasana, kola e nofo i Asatalota.

¹¹A omotou takitaki, pela foki mo tino katoa i te motou fenua ne fai mai ki a matou ke fakatoka ne meakai mo te malaga, ke olo atu matou o fakafetaui ki a koutou. A matou ne fakatonu mai ke tavini atu ki a koutou, kae ke fai atu ki a koutou ke fai se feagaiga i te va o tatou.

¹²Kiloke ki omotou falaoa. I te taimi ne tiakina ei ne matou te motou fa'kai, a falaoa konei koi velavela faeloa. Kae kilo mai, ko malo faka eiloa kae ko taelagoa foki.

¹³I te taimi ne utu ei omotou taga uaina konei, koi fou faeloa, kae kilo mai, ko masaesae valevale. A omotou gatu mo taka ko masaesae faka eiloa i te loa o te motou malaga.”

¹⁴Ne puke ne tino Isalaelu ne meakai mai i a latou, kae e seki ka'laga mua ki te Aliki me se a te mea e tau o fai ne latou.

¹⁵Ne fai ne Iosua te feagaiga fakataugasoa mo tino kona o Kipeona, tena, talia ei ne ia ke se tamate. Ne tauto faka'lei a takitaki o Isalaelu ke tausi ne latou te lotou feagaiga.

¹⁶E tolu aso mai tua o te faiga o te feagaiga kae logo tino Isalaelu i tino kona e nofo fua i se koga pili mai.

¹⁷Tena, ne malaga atu ei a tino Isalaelu i aso e tolu, oko atu ei ki fa'kai e nofo ei a tino kona: ko te fa'kai o Kipeona, Kafila, Pelota, mo Kiliata Iealima.

¹⁸Ko se mafai la nei ne tino Isalaelu o tamate tino kona, me i te feagaiga tela ne fai ne olotou takitaki mo tino kona, ne fai i te igoa o te Aliki, te Atua o Isalaelu. Ne muimui a tino ki olotou takitaki e uiga ki te mea tena,

¹⁹kae ne tali mai latou penei, “A te motou feagaiga ne fai mo latou i te igoa o te Aliki, te Atua o Isalaelu. E se mafai eiloa ne tatou o fai se mea ki a latou.

²⁰E tau eiloa o faka'sao ne tatou; kafai e se faka'sao ne tatou, ko tatou ka fakasala ne te Atua.

²¹Tuku ei latou ke sao, kae ka kati sale ne latou a fafie ma tatou, kae asu foki ne latou o 'tou vai.” Tena te taofi o takitaki.

²²Ne fai te fakatonuga a Iosua ke puke mai a tino Kipeona ki ona mua, tena ne fesili atu ei a ia ki a latou penei, “Ai a ne o'mai ei koutou o fakaloiloi matou i a koutou e nofo i te fenua mao, kae tenei koutou e nofo fua i te koga pili mai?

²³A koutou ko fakamalaia ne te Aliki me ne fai ne koutou te mea tena. A koutou ka fai faeloa mo pologa, o kati fafie kae tali vai mō te tausiga o te faletapu o te motou Atua.”

²⁴Ne tali mai latou penei, “Tou malu, ne fai ne matou te mea tena, me i matou ne logo me se mea tonu eiloa i a Mose ne fakatonu ne te Aliki te otou Atua ke tuku atu mo koutou te fenua katoa tenei, kae ke tamate foki a tino katoa e pono i otou mua. Ne fai ne matou te mea tena i a matou ko oko eiloa i te ma'taku i a koutou. Matou e ma'taku i a matou ma mate.

²⁵Matou nei ko i lalo i tau pulega; fai te mea e loto koe o fai ki a matou.”

²⁶Tena la, ne puipui ne Iosua latou, kae fai ki tino Isalaelu ke se ta ne latou a tino kona.

²⁷Ne fai ne Iosua latou mo pologa, ke kati fafie kae asu vai mō tino Isalaelu pela foki mo te fata-fai-taulaga a te Aliki. Ke oko mai ki aso nei, e tumau eiloa te lotou galuega tena i te koga tela ne filifili ne te Aliki ke tapuaki atu ei a tino ki a ia.