Read Te Tusi Tapu I Te Gana Tuvalu Lomiga Lua 2 TESALONIA 3 Bible Online

2 TESALONIA 3 - Te Tusi Tapu I Te Gana Tuvalu Lomiga Lua bible

2 TESALONIA 3

¹Taina, konei a toe pati, 'talo mo matou, ko te mea ke tumau te vave o salalau atu te muna a te Aliki, kae ke vikia foki, e pela eiloa mo te mea ne talai atu ki a koutou.

²'Talo foki ke fakasao matou ne te Atua mai te masei pela foki mai i tino ma'sei. Me se ko tino katoa e talitonu ki te talaiga.

³A te Aliki e fakamaoni. E fai ne ia koutou ke loto ma'losi kae tausi foki ne ia koutou mai te Tino Masei.

⁴A te Aliki e aumai ne ia a te loto talitonu ki a matou ona ko koutou; kae talitonu matou me fai ne koutou a mea e fai atu ne matou, kae ka tumau foki koutou i ei.

⁵Ke takitaki otou loto ne te Aliki i te a'lofa ki te Atua, mo te kufaki tela e maua mai i a Keliso.

⁶Taina, ko fakatonu atu matou i te igoa o te Aliki ko Iesu Keliso: ke faka'mao keatea koutou mai Kelisiano kola e ola i te olaga paie, kola e se tau'tali ki fakatonuga ne tuku atu ne matou ki a latou.

⁷E iloa 'lei eiloa ne koutou me e 'tau o fai ne koutou a mea ne fai ne matou. E se paie matou i te tou fakatasiga.

⁸E seki talia foki ne matou so se fesoasoani mai so se tino e aunoa mo te 'togi atu. Ne ga'lue eiloa matou fakamalosi i ao mo po, ke mo a e fai matou mo amoga 'mafa ki a koutou.

⁹Ne fai ne matou a te mea nei, e se ona ko te mea e se 'tau mo matou o fakatagi atu ki te motou tausiga; kae ne fai ne matou ke fai mo fakaakoakoga ke tau'tali koutou i ei.

¹⁰Ka koi fakatasi tatou, ne fai atu matou ki a koutou: “So se tino e se fia galue, e se talia foki a ia ke kai.”

¹¹Ko fai atu ne matou a te pati tenei, ona ko te mea e isi ne tino mai i a koutou na e ola i te olaga paie kola e seai ne olotou galuega, ka ko te olo fua o fai a galuega e seai eiloa ne olotou fekau i ei.

¹²Ko fakatonu atu kae fakatagi atu matou ki tino konei i te igoa o te Aliki ko Iesu Keliso, ke ga'lue mo te filemu, kae ga'lue foki mō te lotou ola.

¹³Ka ko koutou e taina, ke se 'fiu koutou i te fai o te mea 'lei.

¹⁴Kati e isi se tino i kona ka se fakalogo ki te talaiga tenei ko taku atu ne matou i te tusi tenei. Kafai e isi, fakamau ake tona igoa, kae mo a eiloa e fai ne koutou se faiga ki ei, ko te mea ke masiasi eiloa a ia i tena mea ne fai.

¹⁵Sa fai masei ki ei e pela mo se otou fili; kae akoako atu e pela eiloa mo se otou taina.

¹⁶A te Aliki, tela ko te pogai o te filemu, ke tuku atu ne ia ki a koutou a te filemu i taimi katoa i so se auala. Ke i a koutou katoa te Aliki.

¹⁷Ko tusi atu ne au a te tusi i taku tusi lima: “Alofaaga mai i a Paulo. Tenei te sainaga e saina ei ne au a tusi katoa. E tusitusi foki au penei.”

¹⁸Ke i a koutou katoa a te alofa tauanoa o te tou Aliki ko Iesu Keliso.