Read Te Tusi Tapu I Te Gana Tuvalu Lomiga Lua 1 TIMOTEO 2 Bible Online

1 TIMOTEO 2 - Te Tusi Tapu I Te Gana Tuvalu Lomiga Lua bible

1 TIMOTEO 2

¹A te mea muamua e fakatagi atu ei au, au e fakamolemole atu ki a koutou ke fai otou fakatagi mo talosaga, 'talo mo nisi tino, mo 'talo fakafetai ki te Atua mō tino katoa.

²Ke 'talo foki koutou mō tupu, pela foki mo nisi tino katoa e iai te pule i a latou, ko te mea ke ola tatou i se olaga filemu mo te 'lei, se olaga fakaatua mo te amio 'lei.

³Se olaga 'lei tenei, kae se mea fakafiafia loto foki ki te Atua te tou Fakaola,

⁴tela e manako a ia ke ola tino katoa, ka ke iloa foki ne latou te munatonu.

⁵E tokotasi te Atua, kae tokotasi foki te sokoga i te va o te Atua mo tino, ko te tagata e igoa ki a Keliso Iesu,

⁶tela ne tuku atu tona foitino o fakasaoloto a tino katoa. Tena te fakamaoniga o te mea tena, i te Atua e manako ke fakaolagina a tino katoa i te taimi 'tau.

⁷Tenei te pogai ne tofia ei au ke fai mo apositolo, mo faiakoga foki mō tino o fenua fakaatea, o folafola atu ki a latou a te muna o te fakatuanaki mo te munatonu. Au se loi, kae tonu eiloa au!

⁸Au e manako ki tagata katoa i so se koga ke 'talo, ko latou kola ko tuku katoatoa atu olotou loto ki te Atua, kola e mafai ne latou o sisi ake olotou lima o 'talo, ko te fakaasiga tena o te tuku atu katoatoa o te loto ki te Atua e aunoa mo te ita io me ko te kinau.

⁹Au e manako foki ki fafine ke teuteu faka'lei, kae ke mafaufau faka'lei ki feitu e uiga ki gatu e pei ei latou, ka ke fai faka'lei eiloa olotou gatu. Ke se teu fakagaligali olotou ulu, io me fakamau ne teuga aulo, io me ne teuga penina, io me fakaaoga ne gatu 'togi 'mafa,

¹⁰ka ke teu olotou foitino ki te amio 'lei, tena te teuga tonu tela e mafai o takua ei latou me ne fafine 'lotu.

¹¹E 'tau o tauloto ne fafine te amio filemu mo te loto malalo.

¹²E se fakasaoloto ne au a fafine ke akoako atu io me ke pule latou i luga i tagata; e 'tau mo latou o filemu.

¹³Me ko Atamu ne faite muamua, kae fakamuli ifo ko Eva.

¹⁴Kae se ko Atamu ne faka'segina; ka ko te fafine ne faka'segina, kae ofa foki ne ia te tulafono a te Atua.

¹⁵A te fafine ka fakasaogina mai te fanafanau [1] kafai a ia e tumau[2] i te olaga fakatuanaki, te alofa, mo te olaga tapu mo te olaga nofonofo 'lei.