Read Te Tusi Tapu I Te Gana Tuvalu Lomiga Lua 1 TIMOTEO 6 Bible Online

1 TIMOTEO 6 - Te Tusi Tapu I Te Gana Tuvalu Lomiga Lua bible

1 TIMOTEO 6

¹A pologa katoa e 'tau mo latou o mafaufau me se mea 'lei te ava ki olotou pule i feitu katoa, ko te mea ke seai se tino e muna masei ki te igoa o te Atua, pela foki mo te tou akoakoga.

²Ko pologa kola ne kelisiano olotou pule, e 'tau mo latou o ava ki ei, me ko olotou taina kona. Kae 'tau mo latou o tavini atu faka'lei ki a latou, me ko pule kola e maua ne latou te 'lei i galuega a olotou pologa, ne Kelisiano kola e a'lofa latou ki ei. E 'tau mo koe o akoako atu kae lauga atu a mea konei.

³So se tino e akoako ne ia se akoakoga kese, kae se pau foki mo munatonu a te tou Aliki ko Iesu Keliso, e pela foki mo te akoakoga a te tou lotu,

⁴se tino ko faka'fetegina tona mafaufau i te fakamatamata, e seai eiloa sena mea e tasi e iloa. E i a ia te uiga se 'lei o kinau mo te faitaua ki uiga o muna, kae e tupu mai ei tena loto masei mo te kaisanosano, tena faitaua, mo ana muna masei mo ona masalosaloga masei,

⁵mo te finau va'lea foki o tino kola ko se 'lei olotou mafaufau, ka ko galo foki i a latou te munatonu. E manatu latou i te lotu se auala e maukoloa ei te tino.

⁶A te lotu e fai ne ia ke maumea te tino, manafai e loto malie eiloa a ia ki ana mea e i ona lima.

⁷Se a te tou mea e aumai ki te lalolagi? E seai! Se a te mea e mafai ne tatou o 'kave keatea mai te lalolagi? E seai!

⁸Tela la, kafai e maua ne o'tou meakai mo gatu, ko lava eiloa tatou i ei.

⁹Ka ko tino kola e ma'nako ke maumea latou, ko paku atu latou ki te fakaosoosoga, ka ko maleigina foki latou ne te uke o manatu valea mō manako masei, kola e 'futi ne latou ki lalo o fakamasei kae fakamalepe valevale.

¹⁰Me i te manako ki tupe, ko te mafuaga tena o mea masei katoa. A nisi tino ko oko eiloa i te ma'nako ke maua ne latou, ka ko olo foki keatea mai te fakatuanaki, ka ko fatifati nei olotou loto i puapuaga e uke.

¹¹Ka ko koe e te tagata o te Atua, ke kalo keatea koe mai mea konei. Taumafai o fai te amiotonu, te olaga amio Atua, te fakatuanaki, te alofa, te kufaki mo te loto malalo.

¹²Tele ki te mea e mafai ne koe i te fakatautelega o te fakatuanaki, ke maua ne koe te manumalo ki te ola se gata mai; me tenei te ola ne kalagagina ei koe ne te Atua i te tukutonu fakalei ne koe te fakatuanaki i mua o tino molimau e tokouke.

¹³Ko fakatonu atu ne au koe i mua o te Atua tela ne tuku mai ne ia te ola ki mea katoa, pela foki i mua o Keliso Iesu tela ne molimau ki te takutonuga 'lei i mua o Ponotio Pilato:

¹⁴Faka'logo ki te fakatonuga, kae tausi faka'lei ki ei ke 'ma kae ke seai foki se pona i ei, ke oko eiloa ki te oko mai o te Aso o te tou Aliki ko Iesu Keliso.

¹⁵A tona oko mai, ka fakataunu eiloa ne te Atua i te taimi 'tau, tela ko ia ko te Aliki o te manuia ka ko te Pule foki eiloa e tokotasi, ko te Tupu o tupu mo te Aliki o aliki.

¹⁶E se oko foki te mate ki tona foitino; kae nofo foki i te mainaga tela e se mafai o oko ki ei se tino. E seai se tino kai matea ne ia a ia, kae e seai foki eiloa se tino e mafai o matea ne ia a ia. Ke i a ia te 'malu mo te malosi se gata mai! Amene.

¹⁷Fakatonu ki tino kola e mauko'loa i mea o te olaga nei ke se fakamata'mata, ka ke se tuku atu foki olotou fakamoemoega ki mea e gata i lalo nei te lotou aoga, ka ke tuku atu olotou fakamoemoega ki te Atua, tela e alofa o tuku mai ne ia a mea katoa e manuia ei tatou.

¹⁸Fakatonu atu ke fai ne latou te 'lei, ke mau'koloa foki latou i galuega 'lei, ke kaima'lie ka ke fia'fia foki o suiaki olotou mea mo nisi tino.

¹⁹Kafai e fai ne latou te faiga tenei, ka fakatupu ne latou a koloa kola ka fai mo olotou fakavae mautakitaki mo aso fakamuli. Tela la, ka mafai o maua ne latou te ola tela ko te ola tonu.

²⁰Timoteo, tausi fakalei ki akoakoga ne tuku atu ne au ki a koe. Kalo keatea mai i finauga va'lea mo tino kola e fai mai me ne maua ne latou mai te Atua se fakaasiga fakapitoa.

²¹A te mea nei se fakaasiga loi fua, e takitaki ei latou keatea mai te fakatuanaki. Ke i a koutou katoa te alofa tauanoa o te Atua.