Read Te Tusi Tapu I Te Gana Tuvalu Lomiga Lua 2 TIMOTEO 4 Bible Online

2 TIMOTEO 4 - Te Tusi Tapu I Te Gana Tuvalu Lomiga Lua bible

2 TIMOTEO 4

¹Ko fakatonu malosi atu au ki a koe i mua o te Atua mo Keliso Iesu, tela ka fakamasino ne ia a tino ola mo tino 'mate: Ona ko tena oko mai i tona malo, ko fakatonu atu ei ne au koe,

²ke folafola atu ne koe te muna, o 'fuli mai a loto, ka ke mau eiloa koe i te folafola atu, i taimi 'tau mo taimi se 'tau, o fakatonu atu, o akoako atu, o fakamalosi atu, o akoako atu foki fakatasi mo te kufaki katoatoa.

³E oko mai te taimi ko se toe faka'logo ei tino ki akoakoga tonu, kae ka tautali atu ki olotou manakoga, kae ka fakapotopoto foki ne latou a faiakoga kola e logosala olotou akoakoga ki olotou taliga.

⁴Ka 'fuli latou keatea mai te mea tonu o faka'logo ki tala 'kai.

⁵Kae pela mo koe, e 'tau eiloa mo koe o mafaufau faka'lei i mea katoa, kufaki i puapuaga, fai te galuega a te tino folafola, kae fakataunu tau galuega totino, e pela mo se tavini a te Atua.

⁶Kae nei ko oko mai a te taimi e tuku atu ei au ke fai mo taulaga; me ko pili mai te taimi e tuku ei ne au a te olaga nei.

⁷Ko oti ne fai ne au te mea sili i te fakataufaiga, ko oti foki au ne tele i te fakatau'telega loa, ko oti foki ne taofi mau ne au te fakatuanaki.[3]

⁸Kae nei, ko oti ne fakatakato mo oku a te foualiki o te amiotonu, tela ka tuku mai ki a au ne te Aliki tela ko te famasino fai mea tonu i te Aso tena, kae se ki a au fua, kae pela foki ki a latou katoa kola e fakatali'tali mo te alofa ki tona toe foki mai.

⁹Taumafai malosi ke oko fakavave mai koe ki a au.

¹⁰ E pela mo Tema ne manatu ki te lalolagi, i aso nei ko oti ne tiakina ne ia a au kae fano ki Tesalonia. Ko Kelesene ne fano ki Kalatia ka ko Tito ki Talamatia.

¹¹ A Luka tenei eiloa e 'nofo maua. Puke mai a Maleko ke o'mai koulua; me ko oko eiloa i te aoga me fesoasoani mai ki a au i te galuega.

¹² Ko oti ne uga ne au a Tuiko ki Efeso.

¹³ Kafai foki e vau koe, puke mai toku gatu 'loa tela ne tuku ne au i a Kapasi i Teloa, pela foki mo tusi, kae sili eiloa i mea kona, ko tusitusiga kola e tusi ki luga i pakili o manu.

¹⁴ A Alesana te tagata tuki fiti, e faka'mae malosi ne ia a toku loto. Ka taui atu ne te Aliki ki a ia ana mea ne fai.

¹⁵Ke fakamao koe mai i a ia, me ko 'teke malosi ne ia te talaiga a tatou.

¹⁶E seai se tino ne tu mō oku i te taimi muamua ne fakamasino ei au, kae ne taumafai eiloa au o fakasao au, ne tiakina katoa ne latou au. Ke se taui atu ne te Atua a te mea tena ki a latou!

¹⁷Ka ko te Aliki ne tu eiloa i oku tafa, kae ne tuku mai ne ia ki a au a te malosi o folafola atu katoatoa te muna, ko te mea ke lagona katoa ne tino o fenua fakaatea; kae fakasaogina foki au mai te gutu o te leona.

¹⁸A te Aliki ka fakasao ne ia au mai mea masei katoa, kae avatu foki ne ia au fakalei ki tona Malo faka te lagi. Ke i a ia te vikiga ki te se gata mai, ki te se gata mai eiloa! Amene.

¹⁹ Ko alofa atu au ki a Pisila mo Akuila, pela foki te kaiga katoa o Onesefolo.

²⁰ A Elata ne nofo i Kolinito; Tolofimo ne tuku ne au i Meleto me masaki.

²¹Taumafai malosi ke oko mai koe mai mua o te tau 'moko. Ko alofa atu a Eupele, a Paute, a Lino, a Kalaotia pela foki mo te kau taina ki a koe.

²²Ke nofo te Aliki i tou agaga. Ke i a koutou katoa a te alofa tauanoa o te Atua.