Read Te Tusi Tapu I Te Gana Tuvalu Lomiga Lua TITO 3 Bible Online

TITO 3 - Te Tusi Tapu I Te Gana Tuvalu Lomiga Lua bible

TITO 3

¹Fakamasaua atu ki otou tino, ke tuku atu katoatoa olotou loto ki olotou pule mo faipule i te faka'logo ki ei, kae ke toka foki o fai so se mea 'lei.

²Fakatonu ke mo a e fakamasei ne latou so se tino, ka ke filemu kae fakatau alofa, ka ke fakaasi foki ne latou a te uiga loto malalo ki tino katoa.

³Me i a tatou ne tino va'lea muamua, ne se fakalogo, kae ne takitaki'segina foki. Ne pologa foki tatou ki manakoga mo fiafiaga valevale. Ne fakamaumau te tou olaga ki te loto masei mo te kaimanako; ko nisi e ita mai ki a tatou ka ko tatou e ita ki a latou.

⁴Kae i te fakaasimaiga o te alofa kaimalie mo te 'lei o te Atua te tou Fakaola,

⁵tela ne fakaola ne ia tatou, e se pogai mai i galuega 'lei kola ne fai ne tatou i te amiotonu, kae ne pogai mai i tona alofa 'nau tela ne ana fakaolagina ei tatou, i te fakamaga tela ne aumai ei ne te Agaga Tapu te fanau fou mo te ola fou.

⁶Me i te Atua ne fakamaligi ne ia a te Agaga Tapu i luga i a tatou, e alatu i a Iesu Keliso te tou Fakaola,

⁷ko te mea ke takuamiotonugina tatou i tena alofa tauanoa, kae fai foki mo suitonu i te fakamoemoe o te ola se gata mai.

⁸E tonu eiloa te faigamuna. Au e manako ke tumau koe i mea konei, ko te mea ko latou kola ne talitonu ki te Atua, ke finafinau latou o tuku atu olotou taimi o fai a galuega 'lei. A mea konei e 'lei kae aoga mō tino katoa.

⁹Fakagata finauga valea, fakasologa o gafa, finauga mo te faitaua ki te Tulafono, me ko muna se aoga kona mo te seai se uiga.

¹⁰Fakatonu fakalua fua a te tino tela e fakatupu ne ia a te fevaevaeaki, sa toe saga atu la ki ei.

¹¹Me e iloa eiloa ne koe i te vaega tino pena, e masei tona olaga, ka ko ana agasala e fakamaoni ei me 'se eiloa a ia.

¹²I te ugaatuga ne au Aletima io me ko Tuiko ki a koe, taumafai malosi ke oko mai koe ki a au i Nikapoli, me ko oti ne mafaufau au o nofo i kona i te vaitaimi o te tau 'moko.

¹³Taumafai malosi o fesoasoani ki a Senasa te loia mo Apolo, ke na kamata te la faigamalaga, kae 'tau mo koe o onoono faka'lei ke katoa a mea katoa e ma'nako a laua ki ei.

¹⁴Ke tauloto ne tino o tatou te tuku atu olotou taimi o fai a galuega 'lei, o fesoasoani foki ki fakatagi fakavave kola e manakogina i ei a te fesoasoani, ko te mea ke fakaaoga tonu a taimi o olotou olaga.

¹⁵Ko alofa atu ki a koutou katoa a latou konei e 'nofo tasi matou. 'Moli atu omotou alofaaga ki omotou taugasoa i te fakatuanaki. Ke i a koutou katoa a te alofa tauanoa.