Read Te Tusi Tapu I Te Gana Tuvalu Lomiga Lua FILEMONI 1 Bible Online

FILEMONI 1 - Te Tusi Tapu I Te Gana Tuvalu Lomiga Lua bible

FILEMONI 1

¹Ko au ko Paulo, se pagota ona ko Keliso Iesu, ko maua tasi i konei mo Timoteo te tou taina. Ko tusi atu au ki a Filemoni te tou taina fagasele tela ne ga'lue tasi tatou,

²mo Afia te tou tuagane, Alekipa te tou taina sotia, mo te Ekalesia i tou fale.

³Ke i a koutou te alofa tauanoa, mo te filemu mai i te Atua te tou Tamana mo te Aliki ko Iesu Keliso.

⁴Au e fakafetai faeloa ki toku Atua manafai e manatua ne au koe i aku talosaga,

⁵me ne logo tala au i tou alofa ki Kelisiano katoa mo tou fakatuanaki ki te Aliki ko Iesu.

⁶Au e 'talo i te tou mafutaga mo koe, ke fakalasi ne ia te iloa o fakamanuiaga katoa, kola ne maua mai ne tatou mai i a Keliso.

⁷Toku taina, ne maua ne au a te fiafia lasi mo te fakamafanafanaga mai tou alofa, i te mea ne fakafiafia ne koe a loto o Kelisiano.

⁸Ona ko te mea nei, e mafai faeloa o toa au i a Keliso o fakatonu atu koe ke fai a te mea e 'tau o fai.

⁹Ona ko au e alofa ki a koe; tela la, au e se manako o fakatonu atu koe, kae o fakamolemole ki a koe. Ko fai ne au a te mea nei i a au ko Paulo, se sui kae nei ko fai au mo pagota ona ko Keliso Iesu.[1]

¹⁰Ko fakamolemole atu au ki a koe mō taku tamaliki ko Onosemu, tela ne fai au mō ona tamana faka te Agaga i te fale puipui.

¹¹Ne se aoga muamua a ia ki a koe, kae nei ko oko eiloa i tona aoga ki a koe,[2] e pela foki ki a koe mo au.

¹²Ko toe uga atu ne au a ia mo toku loto katoa.

¹³Ne fiafia faeloa au o taofi ke 'nofo maua, ko te mea ke fesoasoani mai ki a au i te talaiga o te tala 'lei, ka koi fale puipui au.

¹⁴Au se manako o fai se galuega ki a ia, e aunoa mo sau taliaga, ko te mea ke se fai tou 'lei mai ki a au i te fai malo atu, kae i tou loto malie eiloa.

¹⁵Kati tenei te pogai ne tele ei a ia keatea mai i a koe mo se taimi toetoe, ko te mea ke toe maua ne koe a ia ke oko ki te se gata mai,

¹⁶ke se fai pela mo se pologa, kae ke sili ake i te pologa; ke pela mo se taina fagasele ki a au, ka ko oko eiloa a tona fagasele ki a koe i feitu e lua, ko te feitu faka te foitino mo te feitu ki te Aliki.

¹⁷Tela la, kafai e manatu koe i a au se takaga o koe, ke talia la ne koe a ia e pela eiloa mo au ne talia ne koe.

¹⁸Kafai e isi sena 'se ki a koe, io me kaitalafu foki ki a koe i se mea, fakamau ake la tena kaitalafu ki a au.

¹⁹Ko au ko Paulo, ko tusi atu i taku tusi lima, “Ka 'togi eiloa ne au a te kaitalafu” ka ko au e se manako o fakamasaua atu ki a koe i a koe e kaitalafu i a au i tou ola.

²⁰Ona ko taua ne taina i te igoa o Keliso, tela la, ko fakamolemole atu au ke fakafiafia ne koe toku loto.

²¹Ko tusi atu au ki a koe ona ko toku talitonu i tou fakalogo muna, kae e iloa 'lei eiloa ne au me sili atu eiloa au faiga ki aku pati ka fai atu.

²²I te taimi tenei, sauni se potu mō oku moe, me i a au e fakamoemoe ki te Atua ke talia ne ia otou talosaga ke foki atu au ki a koutou.

²³Ko alofa atu ki a koe a toku taina pagota i a Keliso Iesu ko Epafala,

²⁴e pela foki mo Maleko, Alitako, Tema mo Luka, ko oku taina e ga'lue tasi matou.

²⁵Ke i otou agaga a te alofa tauanoa o te Aliki ko Iesu Keliso.