Read Te Tusi Tapu I Te Gana Tuvalu Lomiga Lua EPELU 10 Bible Online

EPELU 10 - Te Tusi Tapu I Te Gana Tuvalu Lomiga Lua bible

EPELU 10

¹A te Tulafono faka-Iutaia, e se ko te ata katoa io me se tina fakatusa o mea tonu. Se ata 'nefu fua o mea 'lei ka oko mai. Ko taulaga mau eiloa kona e ofo atu ki te se gata mai, mai te sua tausaga ki te sua tausaga. Tela la, e mafai pefea ne te Tulafono o faka'ma ne ia a tino kola e o'mai ki te Atua e auala i taulaga konei?

²Kafai ko tino e tapuaki ki te Atua ko faka'magina katoatoa mai olotou agasala, e se toe agasala latou, ko se toe fakaaoga foki a taulaga.

³Kae tonu, a taulaga e fakamasaua ki tino i olotou agasala, mai te sua tausaga ki te sua tausaga.

⁴Me i te toto o pulumakau mo kouti, e se mafai lele ne latou o fakamagalo agasala.

⁵Tenei te pogai ne fai atu ei a Keliso ki te Atua, ka ko pili o vau a ia ki te lalolagi, ana muna: “E se manako a koe ki se taulaga io me se taulaga o manu ne 'ta, Ko oti ne fakatoka ne koe se foitino mo oku.

⁶E se fiafia foki koe ki te taulaga e fai ki manu e 'sunu katoa i luga o te fata faitaulaga, Pela foki mo te taulaga mō agasala,

⁷Tela, fai atu ei au, ‘Tenei au e te Atua, O fai a te mea e loto koe ki ei, E pela eiloa mo muna ne tusi e uiga ki a au i te tusi o te Tulafono.”’

⁸Ne fai mai muamua a ia penei: “E se manako koe ki taulaga, e se fiafia foki koe ki taulaga o manu ne 'ta, io me ko te taulaga o manu 'sunu i luga o te fata faitaulaga io me ko taulaga mō agasala.” Konei a taulaga e fai e tusa mo te Tulafono.

⁹Ne fai mai foki penei: “Tenei au e te Atua, o fai te mea e loto koe ki ei.” Tela, ave ei keatea ne te Atua a taulaga mua, kae sui atu ne ia ki te taulaga ko Keliso.

¹⁰Tela la, ne fai eiloa ne Iesu Keliso te mea tela ne loto ki ei te Atua ke fai ne ia, ko fakamagalogina ei o'tou agasala, e alatu i te taulaga ne fai ne ia, ko tona foitino, tela ne ofo atu fakatasi mō tino katoa.

¹¹A faitaulaga Iutaia e fai sale olotou tiute fakafaitaulaga i aso katoa, kae fai faeloa ne latou a vaega taulaga e masani ei latou. Kae se mafai eiloa o magalo agasala i ei.

¹²Ka ko Keliso ne ofo atu ne ia e tasi faeloa te taulaga mō agasala, ko te taulaga e tumau tona 'lei ki te se gata mai; nofo ei a ia i te koga taua ko te feitu fakaatamai o te Atua.

¹³Ko fakatali nei i kona ke oko ki te taimi e tuku ei ne te Atua ona fili ke fai mo mea e tuku ei ona vae.

¹⁴Tela la, mai te taulaga e tasi tenei, ko faka katoatoa ne ia ki te se gata mai a latou kola ko oti ne faka'magina mai i olotou agasala.

¹⁵Me i te Agaga Tapu ne molimau mai muamua ki a tatou penei:

¹⁶“Tenei te feagaiga e fai ne au mo latou Mai tua o aso kona, muna a te Aliki: E tuku ne au i olotou loto aku tulafono, Kae tusi foki ne au i olotou mafaufau.”

¹⁷Ne toe fai mai foki, “E se toe mafaufau foki au ki olotou agasala mo olotou amio masei.”

¹⁸Tela la, kafai ko fakamagalogina a agasala konei, ko se toe manakogina a te taulaga mō agasala.

¹⁹Taina, ko maua ne tatou te saolotoga katoatoa o ulu atu ki loto i te Potu e Sili i te Tapu, e alatu i te mate o Iesu.

²⁰Ko 'tala ne ia te auala fou mō tatou, ko te auala ola tela e ui atu ei i te 'pui; ko tona uiga ko tona foitino tena.

²¹E isi se tou faitaulaga maluga e pule i te fale o te Atua.

²²Ke fakapilipili tatou ki te Atua, i te loto talitonu fakamaoni mo te fakatuanaki, mo loto foki ko faka'magina mai te agasala o te mafaufau, mo foitino foki ko fakakoukougina ki te vai 'ma.

²³Ke puke mautakitaki tatou ki te fakamoemoega e folafola atu ne tatou, me mafai ne tatou o talitonu i te Atua e tausi ki tena folafolaga.

²⁴Ke mafaufau te sua tino ki te sua tino, ke fakatau fesoasoani foki koutou o fakaasi te alofa mo te fai mea 'lei.

²⁵Ke tumau faeloa te maopoopo sale o tatou, e pela eiloa mo te mea e masani ei a nisi tino o koutou. A te mea sili ke fakatau fakamalosi eiloa ne tatou otou loto; i te mea ko iloa ne koutou i te Aso o te Aliki ko pili mai.

²⁶Kafai e fakamoemoe tonu faeloa tatou o fai te agasala ka ko oti ne talia ne tatou te munatonu, ko tena uiga, ko se toe iai se isi taulaga e mafai o fakamagalo ei otou agasala.

²⁷A tino e 'tau o mataku ki mea ka 'tupu; tela ko te fakamasinoga mo te afi fakamataku, me fakamalaia ei a tino kola e 'teke ki te Atua!

²⁸So se tino e ofa ne ia te Tulafono a Mose e tamate e aunoa mo te alofagina, manafai e fakamasinogina a ia mai te molimau a se tokolua io me se tokotolu.

²⁹Se a te mea e fai ki te tino e fakaseaoga ne ia a te Tama a te Atua? Io me ko te tino e manatu māmā ki te toto o te feagaiga a te Atua ne faka'ma ei a ia? Io me faifai muna foki ki te Agaga o te alofa tauanoa? Mafaufau faka'lei i te sili atu o te fakasalaga e maua ne ia!

³⁰E iloa ne tatou a ia tela ne fai mai penei: “E aku te taui mo sui, e toe taui atu foki ne au,” ne toe fai mai foki, “A te Aliki e fakamasino ne ia ona tino.”

³¹Se mea fakamataku mana maua koe ne te fakasalaga a te Atua ola!

³²Ke masaua a mea ne 'tupu ki a koutou i aso ko teka. I aso kona, i te otiga ne 'sulu atu te mainaga o te Atua ki a koutou, e uke a puapuaga ne fepaki mo koutou, kae ne seki takavale koutou i ei.

³³E isi ne taimi ne muna maseigina kae fai maseigina koutou i mata o tino, ka ko nisi taimi ko toka foki koutou o kau fakatasi mo latou kola ne fai pena.

³⁴Ne kau fakatasi foki koutou ki puapuaga o pagota, kae i te otiga ne puke malo otou koloa, ne kufaki mo te fiafia ne koutou a te mea tena, i te mea e iloa ne koutou me isi se mea e sili atu e fakamoemoe koutou ki ei, tela e tumau ki te se gata mai.

³⁵Loto ma'losi me maua ei te taui sili.

³⁶E 'tau koutou o kufaki, ko te mea ke fai ne koutou a te loto o te Atua, ke maua a te mea ne folafola mai ne ia.

³⁷E pela mo muna a te Tusi: “E se leva eiloa nei, Kae oko mai a ia tela e vau; E se fakatuatuai eiloa.

³⁸E ola a tino amiotonu i te fakatuanaki; Kae kafai se tino o latou e toe foki ki tua, e se fiafia toku loto ki a ia.”

³⁹A tatou e se ne tino e 'tau o toe 'foki ki tua ki te malaia. Kae nei, ko iai te tou fakatuanaki e ola ei tatou.