Read Te Tusi Tapu I Te Gana Tuvalu Lomiga Lua EPELU 11 Bible Online

EPELU 11 - Te Tusi Tapu I Te Gana Tuvalu Lomiga Lua bible

EPELU 11

¹A te fakatuanaki, ko te talitonu ki mea e fakamoemoe tatou ki ei, ko te talitonu fakamaoni foki ki mea e se matea ki mata.

²Ko te fakatuanaki foki ko ala ei o taku'leia ne te Atua a tino taumua.

³Ko te fakatuanaki foki ko ala ei o iloa ne tatou i mea katoa i te lagi mo te lalolagi ne faite i te muna a te Atua, ko te mea ke iloa ne tatou i mea konei e matea ki mata, ne mea fua ne faite mai mea e se mafai o matea ki mata.

⁴Ko te fakatuanaki foki ne tuku atu ei ne Apelu a te taulaga ki te Atua e sili atu i te taulaga a Kaino. Ne maua foki ne ia a te taku'leia mai te Atua, i a ia se tino amiotonu mai tona fakatuanaki, me ne talia ne te Atua tena taulaga. Ona ko tena fakatuanaki, koi tumau eiloa tona faipati mai, kae tonu la me ko mate.

⁵Ko te fakatuanaki foki ne ala ei o se mate a Enoka, kae ne avake ola ki te Atua, kae seai foki se tino ko maua ne ia a ia, me ko te Atua eiloa ne avake ne ia ki te lagi. E penei muna a te Tusi, me koi tuai o avake a Enoka ki te lagi, ka ko oti ne fakafiafia ne ia a te Atua.

⁶E seai se tino e mafai ne ia o fakafiafia te Atua e aunoa mo te fakatuanaki. So se tino e vau ki te Atua e 'tau mo ia o fakatuanaki me iai te Atua, kae tuku atu foki ne ia te taui 'lei ki tino kola e salasala ki a ia.

⁷Ko te fakatuanaki foki ne ala ei a Noa o lagona ne ia te fakatonuga a te Atua i mea ka 'tupu i aso mai mua, kola e se mafai o matea ne ia. Ne fakalogo ki te Atua, faite ei ne ia a te vaka tela ne ola ei a ia mo tena kaiga. Ona ko te mea nei, ne fakasala ei ne ia te lalolagi, kae ne maua ne ia te amiotonu mai te Atua e alatu i te fakatuanaki.

⁸Ko te fakatuanaki foki ne ala ei Apelaamo o fakalogo ki tona kalagagina ne te Atua, kae fano ki te fenua ne folafola atu ne te Atua me tuku atu mō ia. Ne tiakina ne ia tona fenua tonu kae fano ki te fenua e se iloa ne ia.

⁹Ko te fakatuanaki foki ne ala ei o nofo mau a ia i te fenua o te folafolaga, ke pela mo se tino fakaalofa i te fenua tena, ne nofo a ia i fale ie fakatasi mo Isaako mo Iakopo, kola ne maua foki ne laua te folafolaga tena mai te Atua.

¹⁰Ne fakatalitali Apelaamo ki te fa'kai tela ne fuafua kae faite ne te Atua, ko te fa'kai e faite ki fakavae mautakitaki.

¹¹Ko te fakatuanaki ne ala ei a Apelamo o fai mo tamana, e ui eiloa tena matua pena foki a Sala ko se mafai o maua ne ana tama. A ia [11]ne talitonu i te Atua e tausi ki tena feagaiga.

¹²Kae tonu la me ko pili ki ei te mate, kae ne tupu mai i te tino e tokotasi tenei, a fanau e tokouke e pela mo fetu o te lagi, pela foki eiloa mo te one i te tafatai ko se lausia.

¹³Ne 'mate foki a tino konei i te fakatuanaki. Ne seki maua ne latou a mea ne folafolagina ne te Atua, ka ko leva ne iloa 'mao ne latou, talia foki ne latou, kae takutonu mai foki ne latou me i a latou ne fakaalofa mo tino se 'nofo mau i te lalolagi.

¹⁴Ko tino e fai'pati pena, e fakaasi mai i a latou e salasala eiloa ki te lotou fenua tonu.

¹⁵Ko se toe mafaufau latou ki te fenua ko oti ne tiaki ne latou; kafai koi mafaufau ki ei, ko tona uiga e maua se lotou avanoa o toe 'foki ki ei.

¹⁶Kae nei, ko fakamoemoe latou ki se fenua e sili atu, ko te fenua faka te lagi. Tela la, e se ma foki a te Atua manafai e taku a ia ne latou ko te lotou Atua, i te mea ko oti ne fakatoka ne ia a te fa'kai mō latou.

¹⁷Ko te fakatuanaki foki ne ala ei o ofo atu ne Apelaamo a tena tama ko Isaako mō fai tena taulaga ki te Atua, i te taimi ne tofotofo ei a ia ne te Atua. A Apelaamo, ko ia tena ne fai ki ei a te folafolaga a te Atua, ka ko toka foki a ia o tuku atu tena tama ke fai mō fai tena taulaga.

¹⁸Muna a te Atua ki a ia, “E 'tupu mai au fanau i a Isaako.”

¹⁹Ne manatu a Apelaamo me mafai ne te Atua o fakatu ake a Isaako mai te mate, kae tonu eiloa, ne toe maua eiloa ne Apelaamo a Isaako ko toetu ake mai te mate.

²⁰Ko te fakatuanaki foki ne ala ei a Isaako o folafola atu ne ia ki a Iakopo mo Esau a fakamanuiaga e maua ne laua i aso mai mua.

²¹Ko te fakatuanaki foki ne ala ei o fakamanuia ne Iakopo a tama takitokotasi a Iosefa ka ko pili a ia o mate; fakapale ifo tona ulu i luga o tona tokotoko kae tapuaki atu ki te Atua.

²²Ko te fakatuanaki foki ne ala ei a Iosefa o faipati e uiga ki te olo keatea o fanauga a Isalaelu mai Aikupito ka ko pili a ia o mate, kae tuku atu foki a fakatonuga ki mea e 'tau o fai ki tona foitino ma mate a ia.

²³Ko te fakatuanaki foki ne ala ei a mātua o Mose o 'funa ne laua a ia i te tolu masina i tena fanaumaiga. Ne matea ake ne laua me se tamaliki taulekaleka, ne se ma'taku foki laua o ofa te fakatonuga a te tupu.

²⁴Ko te fakatuanaki foki ne ala ei a Mose o ita manafai e taku a ia ko te tama a te tama fafine a Falao i te taimi ne matua ei a ia.

²⁵E fiafia atu manafai e puapuagatia fakatasi a ia mo tino o te Atua, i lo te fiafia o fai te agasala i ne mo taimi.

²⁶Ne manatu a ia me sili eiloa i te aoga o te puapuagatia mō te Keliso i lo koloa o Aikupito; me fakamoemoe eiloa a ia ki te taui 'lei ka oko mai.

²⁷Ko te fakatuanaki ne ala ei a Mose o fano keatea mai i Aikupito mo te se mataku ki te fakasaua o te tupu; e tumau foki tona talitonu me ko matea eiloa ne ia te Atua tela e se mafai o matea.

²⁸Ko te fakatuanaki foki ne ala ei o fakatu ne ia te Paseka, kae fakatonu atu foki ke nini ne toto i mataloa, ko te mea ke se tamate ne te Agelu o te Mate a toekimua tagata katoa o Isalaelu.

²⁹Ko te fakatuanaki foki ne mafai ei te fanauga a Isalaelu o sasale i loto i te Tai Kula, e pela eiloa me sasale i te laukele malō; kae i te taumafaiga foki a tino Aikupito o sasale i ei, ne folo katoa latou ne te tai.

³⁰Ko te fakatuanaki foki ne mafai ei o maofa te 'pui o Ieliko, i te otiga ne foli ne te fanauga a Isalaelu a te 'pui i aso e fitu.

³¹Ko te fakatuanaki foki ne ala ei o se tamate a Lahapa te fafine tali tagata, fakatasi mo tino se fakalogo ki te Atua, i tena fesoasoaniga o talimalo a tino alamati.

³²Ne a foki nisi mea ka taku atu ne au? Ko se lava te taimi e tala fakamaea atu ei ne au a latou konei: Kitiona, Palako, Samasoni, Iefata, Tavita, Samuelu mo pelofeta.

³³Ne taua mo fenua katoa, kae ne manumalo latou ona ko te fakatuanaki. Ne fai eiloa ne latou te mea tonu, ne maua foki ne latou te mea ne folafolagina ne te Atua. Ne 'pono ne latou a gutu o leona;

³⁴ne tamate ne latou a afi 'ka ulaula fakamataku, ne 'sao mai mata o pelu. Ne vaivai kae ne ma'losi fakamuli ifo, ne tino takutakua i taua, kae ne fakatakavale ne latou a kautau a nisi fenua.

³⁵Mai te fakatuanaki, ko toe maua ei ne fafine olotou tino ne 'mate ka ko toe ola mai latou. Nisi tino e 'teke ne latou a te saolotoga, 'mate ei latou i puapuaga, ko te mea ke toetu ake latou ki te olaga e sili atu i te 'lei.

³⁶Nisi ne fakatauemugina kae kini, nisi ne saisaigina kae pei ki loto i fale puipui.

³⁷Ne peipeigina ki fatu, ne soa vaelua, kae tamate foki ki pelu. Ne olo sale kae pei ki pa'kili o mamoe io me ko kouti, ne ma'tiva ne faka-sauagina kae fai maseigina foki.

³⁸E se aoga te lalolagi mō latou! E oloolo sale e pela mo ne tino ko 'sola o fakalafi i te vao, mauga, ana mo pu i te laukele.

³⁹Ka ko tino katoa konei, ne taku'leia ona ko te lotou fakatuanaki! Kae ne seki maua ne latou te mea ne folafolagina ne te Atua,

⁴⁰me ko oti ne fuafuagina ne te Atua se fuafuaga e sili atu mō tatou. A tona fakamoemoega ke fakakatoatoagina fakatasi latou mo tatou.