Read Te Tusi Tapu I Te Gana Tuvalu Lomiga Lua EPELU 12 Bible Online

EPELU 12 - Te Tusi Tapu I Te Gana Tuvalu Lomiga Lua bible

EPELU 12

¹Kae penei mo tatou, ko sio fakatamilo ne akoakoga 'lei a tino talitonu fakamaoni i aso ko teka. Tela la, ke tiakina ne tatou a mea 'mafa katoa kola e fakalavelave mai, mo agasala kola e 'piki mau ki luga i a tatou, kae ke 'tele tatou mo te loto fai ki mua ke maua te manumalo i te fakatau'telega tenei e takato mai i mua o tatou.

²Ke tumau te tou 'kilo atu ki a Iesu, tela e fakavae ki ei te tou fakatuanaki mai te kamataga ki te gataga. Ne kufaki ne ia te sataulo ona ko te fiafia tela e fakatalitali mai ki a ia, kae ne seki fia saga foki ki tona mate fakalumalumagina i luga i te sataulo, ka ko nofo nei i te koga taua, ko te feitu fakaatamai o te nofogaaliki o te Atua.

³Mafaufau ake ki te auala ne ui ne ia, i tona loto kufaki i te ukega o mea masei ne fai ne tino agasala ki a ia! Tela la, sa loto vaivai, kae fai ki mua.

⁴Me i te otou fekikiga mo te agasala, e seki taua eiloa koutou ke oko ki te okoga, tela ko te mate.

⁵E a, ko puli i a koutou a muna fakamalosi loto, kola ne faipati atu ne te Atua i a koutou ko ana tama? “Taku tama, fakalogo fakalei manafai e fakasala koe ne te Aliki, Kae sa loto vaivai manafai e polopoloki koe ne ia.

⁶Me i te Aliki e fakasala ne ia tino katoa kola e alofa a ia ki ei, Kae kini ne ia a tino katoa kola e talia ne ia ke fai mo ana tama.”

⁷Kufaki i puapuaga e oko atu, me ne fakasalaga fakatamana; me i otou puapuaga e fakaasi mai ei i te Atua e tausi atu ki a koutou, me i a koutou ko ana fanau. E a, e isi se tamaliki e seki fakasala ne tona tamana?

⁸Kafai e seki fakasala koutou, e pela eiloa mo te mea e masani o fai ne ia ki ana tama katoa, ko tona uiga a koutou e se ne tama tonu a ia, kae ne tama fakatosala.

⁹I te feitu ki o'tou tamana faka te foitino, e fakasala foki ne latou a tatou, kae avatu eiloa ne tatou te ava ki a latou. E a, e se sili atu la te faka'logo o tatou ki te tou Tamana faka te Agaga, ke ola tatou?

¹⁰A o'tou tamana faka te foitino e fakasala ne latou tatou i se taimi toetoe, e pela eiloa mo te mea e tonu ki olotou mafaufau. Ia, ka ko te Atua e fai eiloa ne ia ko te mea ke manuia ei tatou, ke kau fakatasi ei foki tatou i tona 'malu.

¹¹Kafai ko fakasalagina tatou, e foliga mai i te taimi tena, me isi se mea e fai ne ia ke fanoa'noa tatou kae se fia'fia. Kae fakamuli ifo, ko latou kola e maua ne fakasalaga penei, e maua ne latou a te taui filemu o te olaga amiotonu.

¹²Siki ki luga otou lima ko 'vale, kae fakamalosi otou tulivae ko vaivai!

¹³Taumafai o ola i te olaga tapu, ko te mea ko latou e vaivai i te fakatuanaki, ka mafai ne latou o tautali i ei.

¹⁴Taumafai ke ola filemu koutou mo tino katoa, kae fakama'losi foki o ola i se olaga tapu, me seai se tino e mafai ne ia o matea te Aliki e aunoa mo te olaga tapu.

¹⁵Fakaeteete, ke mo a e 'fuli keatea se tino mai te alofa tauanoa o te Atua. Fakaeteete foki, ke mo a e tupu ake se tino ke fai mo tino poisini, tela ka fakatupu fakalavelave ki te tokoukega i tona poisini.

¹⁶Fakaeteete foki, ke mo a ma fai se tino o koutou mo tino fina lalolagi, kae e se ola faka te Agaga e pela mo Esau, tela ne fakatau atu tona tofi faka toekimua ki te 'kaiga e tasi.

¹⁷Fakamuli ifo, e iloa ne koutou me ne manako a ia ke maua te fakamanuiaga a tona tamana; kae ne se talia, i te mea ko se mafai ne ia o fai se mea ke 'fuli ei te mea ne fai ne ia,[12]kae ui eiloa i tona taumafai atu mo loimata, ka ko faigata eiloa.

¹⁸Ne seki oko koutou ki mea kola e mafai o puke ki ei a lima, ko te afi ka ulaula i te mauga o Sinai, te pouli tagataga mo te afā,

¹⁹te tagi o te pu mo te leo. I te lagonaga ne tino a te leo, ne fakamolemole atu me se toe fia lagona eiloa ne latou se isi muna,

²⁰me ko se mafai eiloa ne latou o kufaki te fakatonuga, tela ne fai mai penei: “Kafai foki eiloa se manu e patele ki te mauga, e 'tau eiloa o peipei ki fatu ke mate.”

²¹Ko oko eiloa i te fakamataku i te kilo ki te koga tena, tela fai mai ei a Mose penei, “Au e polepole mo te mataku!”

²²Kae nei, ko oko koutou ki te Mauga o Siona mo te fa'kai o te Atua ola, tela ko te Ielusalema faka te lagi fakatasi mo ana agelu e se mafai o faitau.

²³Ko oko nei koutou ki te fakatasiga fiafia a uluaki a te Atua, kola ko tusi olotou igoa i te lagi. Ko oti ne o'mai koutou ki te Atua, tela ko te Famasino o tino katoa pela foki mo agaga o tino amiotonu kola ko fakakatoatoagina.

²⁴Ko oti foki ne oko koutou ki a Iesu, tela ko oti ne fakatoka ne ia a te feagaiga fou, mo te toto ne fakamaligiligi, tela e taku mai ne ia a mea e sili atu i te 'lei i lo te toto o Apelu.

²⁵Fakaeteete la, sa 'teke, kae faka'logo ki a ia tela e faipati mai. Ko latou kola ne se fia fakalogo ki a ia tela ne folafola mai a te talaiga fakaatua ki te lalolagi, e se 'sao eiloa keatea. Ko oko eiloa i te foliki o te avanoa e 'sao ei tatou keatea, manafai e 'fuli atu o'tou tua ki a ia tela e faipati mai te lagi.

²⁶A tena leo ne lūlū ne ia te lalolagi i mu taimi kona, kae nei ko oti ne folafola mai ne ia penei, “Nei, e toe lūlū ne au e se na ko te lalolagi fua, kae pela foki mo te lagi.”

²⁷A te muna pela “toe lūlū” e fakaasi mai ei i mea ne faite e lūlūgina kae ave foki keatea; tela la, ko mea kola e seki lūlūgina e tumau.

²⁸Ke loto fakafetai tatou, me ko maua ne tatou a te malo tela e se mafai o lūlūgina. Ke fia'fia la tatou kae tapuaki atu ki te Atua i se auala e fiafia a ia ki ei, i te loto fakaaloalo mo te mataku;

²⁹me i te tou Atua se afi e fakamasei ne ia mea.