Read Te Tusi Tapu I Te Gana Tuvalu Lomiga Lua EPELU 13 Bible Online

EPELU 13 - Te Tusi Tapu I Te Gana Tuvalu Lomiga Lua bible

EPELU 13

¹Ke fakatau alofa koutou e pela eiloa mo ne taina i a Keliso.

²Masaua o fakaafe ne koutou a tino fakaalofa i otou fale. E isi ne tino ne talimalo faka'lei ki tino, kae ne tali faka'lei foki ki agelu mo te se iloa ne latou me ne agelu.

³Ke masaua foki ne koutou a tino kola e i loto i fale puipui, ke pela me fale puipui fakatasi koutou. Ke masaua foki a latou kola e puapuagatia, ke pela me puapuagatia fakatasi koutou mo latou.

⁴E 'tau o faka'malu ne tino katoa a te fakaipoipoga, ka ko tauavaga e 'tau o fakatau a'lofa. E fakamasino ne te Atua a latou kola e fina lalolagi, pela foki mo latou kola e mulilua.

⁵Ke faka'mao koutou mai te matatupe, kae loto ma'lie ki mea ko maua ne koutou. Me ne muna mai te Atua, “E se tiakina lele eiloa ne au koutou, e se tuku tiaki lele eiloa ne au a koutou.”

⁶Tela la, ke loto 'toa tatou o fai ake penei, “A te Aliki ko toku fesoasoani, Ko se mataku au! Ki so se mea e fai mai ne se tino ki a au.”

⁷Masaua ne koutou otou takitaki muamua, kola ne taku atu ne latou a te muna a te Atua. Mafaufau me ne ola pefea, kae ne 'mate foki pefea; fakaakoako la ki te lotou fakatuanaki.

⁸A Iesu Keliso e pau eiloa i te aso anafi, i te aso nei, ke oko ki te se gata mai.

⁹Sa talia akoakoga fakaatea ke takitaki ei koutou keatea mai te auala tonu. Se mea 'tau ki te fakamalosi otou loto ne te alofa tauanoa o te Atua, e se i te fakalogo ki tulafono e uiga ki meakai; a latou kola e fakalogo ki tulafono konei, e se maua ne fesoasoani mai i ei.

¹⁰A faitaulaga kola e ga'lue i te fale tapuaki ave sale i malaga, e seai se lotou saolotoga o 'kai ki taulaga i te tou fata faitaulaga.

¹¹A te Faitaulaga Pule e aumai ne ia te toto o manu ki te Potu e Sili i te Tapu, o ofo atu ke fai mo taulaga o agasala; ka ko foitino o manu e 'sunu i tua o te fa'kai.

¹²Ona ko te mea nei, ne mate ei foki a Iesu i tua o te fa'kai, ko te mea ke faka'ma ne ia a tino mai olotou agasala e alatu i tona toto.

¹³Ke olo atu tatou ki a ia i tua o te fa'kai, ke kau fakatasi tatou mo ia i tona masiasi.

¹⁴Me e seai se fa'kai tumau mō tatou i te lalolagi; e fakatalitali fua tatou ki te fa'kai ka oko mai.

¹⁵Ke avatu eiloa ne tatou a tavaega ki te Atua ke fai mo o'tou taulaga ki a ia e alatu i a Iesu; ko tona uiga, ke 'viki faeloa tatou ki tona igoa i o'tou leo.

¹⁶Sa puli i a koutou o fai te mea 'lei, kae ke fesoasoani foki te sua tino ki te sua tino, me ko taulaga konei e fiafia ki ei te Atua.

¹⁷Fakalogo ki otou takitaki kae sasale foki i olotou fakatonuga. E se mapu eiloa latou i te tausiga o otou agaga, me 'tau mo latou o avatu se tala a olotou galuega ki te Atua. Kafai e faka'logo koutou ki ei, e fai olotou galuega mo te fiafia, kae masei te se faka'logo ki ei, ko fai ei olotou galuega mo te se fiafia, ko maumau ei olotou galuega mō koutou.

¹⁸Ke fai talosaga koutou mō matou. E talitonu matou me tonu faeloa omotou mafaufau, me ma'nako faeloa matou o fai te mea tonu i taimi katoa.

¹⁹Ko toe fakamolemole atu au ki a koutou, ke 'talo koutou ki te Atua ko te mea ke toe foki atu au ki a koutou, i se taimi pili mai.

²⁰Ko oti ne fakatu ne te Atua a te tou Aliki ko Iesu mai tino 'mate. A ia ko te Tausi Mamoe Sili o mamoe ona ko tona mate, tela ko te fakailoga o te feagaiga se gata mai.

²¹Ke tuku atu ne te Atua o te filemu ki a koutou a mea 'lei katoa e ma'nako koutou ki ei, ko te mea ke fai ne koutou tona loto, ka ke mafai foki ne ia e auala i a Iesu Keliso, o fai ne ia i o'tou loto a mea kola e fiafia a ia ki ei. Ke i a Keliso te 'malu ki te se gata mai! Amene.

²²Au e fakamolemole atu ki a koutou e oku taina, ke faka'logo koutou mo te kufaki ki te talaiga fakamalosi loto; me e toetoe fua a te tusi tenei ko tusi atu ne au.

²³E 'tau o iloa ne koutou i te tou taina ko Timoteo ko oti ne 'tala mai i te fale puipui. Kafai e oko vave mai a ia i se taimi pili mai, e olo atu maua manafai e fanatu au o asi koutou.

²⁴Ko a'lofa atu matou ki otou takitaki katoa pela foki mo kelisiano katoa. Ko a'lofa atu foki a taina mai i Italia ki a koutou.

²⁵Ke i a koutou katoa te alofa tauanoa o te Atua.