Read Te Tusi Tapu I Te Gana Tuvalu Lomiga Lua EPELU 2 Bible Online

EPELU 2 - Te Tusi Tapu I Te Gana Tuvalu Lomiga Lua bible

EPELU 2

¹Tena te pogai ko 'tau ei mo tatou o puke mautakitaki ki mea tonu ko oti ne lagona ne tatou, ko te mea ke mo a ma olo tatou keatea mai i ei.

²A te talaiga ne tuku mai ne agelu ne fakaasi mai me tonu, tela la, ko te tino ne se tautali i ei io me ne se fakalogo ki ei, ko maua ne ia te fakasalaga e 'tau ki ei.

³E pefea la o 'sao tatou mai te fakasalaga, manafai e se fia 'saga atu tatou ki te fakaolataga sili tenei? Ko te Aliki eiloa ne mua o folafola ne ia te fakaolataga tenei, kae ne fakatalitonu ki a tatou ne latou kola ne faka'logo ki ei, me tonu eiloa.

⁴Ne fakaopoopo foki ne te Atua ki olotou molimau i te fai ne ia o fakailoga 'mana, mea fakaofoofogina, mo vavega kesekese. Ne tufatufa atu foki ne ia a meaalofa mai te Agaga Tapu e pela eiloa mo te mea e loto a ia ki ei.

⁵A te Atua ne seki fai ne ia a agelu ke pule i te lalolagi tela ka faite ne ia, ko te lalolagi tenei e fai'pati tatou ki ei.

⁶Kae penei foki ana muna ne fai mai i se tusi o Tusi: “Te Atua, se a te tagata e manatu mai ei koe ki a ia? Io me ko te tama a te tagata e tausi mai ne koe?

⁷Ne faite ne koe a ia ke tai malalo ifo i agelu i se taimi toetoe, Kae nei, ko oti ne tuku mai ne koe ki a ia a te 'malu mo te fakaaloalo fakatupu,[3]

⁸Kae fai foki ne koe a ia ko te pule o mea katoa.” Ne fai mai foki i te Atua ne fai ne ia a te tagata, “ko te pule o mea katoa.” Ko tona uiga e aofia i ei a mea katoa. Ka ko se matea nei ne tatou a te tagata e pule i mea katoa.

⁹Kae e matea eiloa ne tatou a Iesu! Ne fai a ia ke tai malalo ifo i agelu i se taimi toetoe, ko te mea ke mate a ia mō tino katoa e alatu i te alofa tauanoa o te Atua. Nei, ko matea atu ne tatou me ko oti ne fakasopo a ia ke fai mo tupu i te 'malu mo te fakaaloalo e alatu i te mate ne puapuagatia ei a ia.

¹⁰Se mea 'lei ki te Atua, tela ne faite ne ia a mea katoa, kae tausi faka'lei foki ki ei, ke fai ne ia a Iesu ke 'lei katoatoa e alatu i te puapuaga, ko te mea ke aumai ei a tino e tokouke ke kau fakatasi i tona 'malu, ka ko Iesu e takitaki ne ia latou ki te fakaolataga.

¹¹E faka'ma ne ia a tino mai i olotou agasala, ko tasi ei te Tamana o Iesu mo latou kola ne faka'magina. Tena te pogai e se ma ei a Iesu o taku ne ia latou ko ona taina.

¹²E penei ana muna, “Te Atua, au e faipati ki oku taina e uiga mō koe, E pese atu foki au i pese ki a koe i mua o te fakapotopotoga katoa.”

¹³E penei foki ana isi muna, “E fakatuanaki au ki te Atua.” Kae toe fai ake foki penei ana isi muna, “Au tenei e fakatasi mo fanau a te Atua ne tuku mai ne ia ki a au.”

¹⁴Ona ko fanau konei ne tama a te foitino mo te toto, e pena foki a Iesu, kae ne kau fakatasi foki ki olotou uiga faka te foitino. Ne fai ne ia e alatu i tona mate, ko te mea ke fakatakavale ne ia a te Tiapolo, tela e isi sena pule i te mate,

¹⁵kae fakasaoloto atu a latou kola ne fai mo pologa i olotou olaga katoa ona ko te ma'taku ki te mate.

¹⁶Se mea e iloa 'lei eiloa me sē fesoasoani a ia ki agelu, kae pela mo muna a te tusi, “E fesoasoani a ia ki fanau a Apelaamo.”

¹⁷Ko te uiga o te muna tenei, e 'tau mo ia o fai ke pela mo ona taina i mea katoa, ko te mea ke fai a ia mo olotou faitaulaga pule e alofa kae fakamaoni i tena galuega mo te Atua, ko te mea ke fakamagalogina agasala a tino.

¹⁸Kae nei la, ko mafai ne ia o fesoasoani ki a latou kola e fakaosoosogina, me i a ia ne fakaosoosogina kae puapuagatia foki.